బాబూ..హ్యాపీ బర్త్ డే

తమ పార్టీ అధినేత నారా చంద్రబాబు నాయుడు జన్మదినోత్సవాన్ని శనివారం జిల్లా అంతటా పార్టీ నాయకులు, కార్యకర్తలు ఘనంగా నిర్వహించారు. అనేక చోట్ల కార్యకర్తలు, పండుగ వాతావరణంలా జన్మదినోత్సవాన్ని నిర్వహించుకున్నారు. ఏలూరు నగరంలో ఫైర్‌స్టేషన్ సెంటర్లో ఉన్న ఎన్టీఆర్ విగ్రహం వద్ద 64 కిలోల కేక్‌ను ఎమ్మెల్యే చింతమనేని ప్రభాకర్ సమక్షంలో పార్టీ పరిశీలకులు కాగిత వెంకట్రావు అధ్యక్షతన అత్యంత ఉత్సాహభరితంగా కట్ చేసి నిర్వహించారు. ఎమ్మెల్యే ప్రభాకర్, ఆయన అనుచరులు పెద్దఎత్తున చంద్రబాబుకు బర్త్‌డే శుభాకాంక్షలు తెలుపుతూ నినాదాలు చేశారు. పార్టీ ఏలూరు నియోజకవర్గ కన్వీనర్ అంబికా కృష్ణ,బడేటి బుజ్జి,పాలి ప్రసాద్‌తో అనేకమంది నాయకులు కార్యక్రమంలో పాలు పంచుకున్నారు. ఎన్టీఆర్ విగ్రహానికి కూడా పూలమాలు వేసి నివాళులు అర్పించారు.

అనంతరం పార్టీ జిల్లా అధ్యక్షురాలు తోట సీతారామలక్ష్మి, ఎమ్మెల్యే చింతమనేని ప్రభాకర్, ఇతర నేతలు ఏలూరు ప్రభుత్వాసుపత్రిలో రోగులకు పండ్లు పంచారు. పాలకొల్లు పట్టణంలో ఎమ్మెల్సీ అంగర రామ్మోహన్, మాజీ ఎమ్మెల్యే డాక్టర్ బాబ్జి, నిమ్మల రామానాయుడు చంద్రబాబు జన్మదినోత్సవం నిర్వహించి పేదలకు చీరలు పంపిణీ చేశారు.