గుడివాడటౌన్: గుడివాడ అంటేనే ఎన్టీఆర్ అని ఆయన రాజకీయ ప్రస్థానం ఇక్కడ నుంచే ప్రారంభమైందని కుప్పం తర్వాత గుడివాడకే తాను ప్రాధాన్యత ఇస్తానని మాజీ ముఖ్యమంత్రి, టీడీపీ అధినేత నారా చంద్రబాబు నాయుడు అన్నారు. 'వస్తున్నా మీకోసం' పాదయాత్రలో భాగంగా ఆయన గుడివాడ నెహ్రూ చౌక్‌లో మంగళవారం రాత్రి ప్రసంగించారు. ఎన్టీఆర్‌కు సాటిగల నాయకుడు లేడని, రాడని, రాబోడని ఉద్ఘాటించారు. రాష్ట్ర రాజకీయాల్లో చరిత్ర సృష్టించిన యుగపురుషుడు ఎన్టీఆర్ అని ప్రస్తుతించారు. ఢిల్లీతో పాటు కొన్ని రాష్ట్రాల్లో తెలుగువారిని మద్రాసిీలుగా పిలిచేవారని, అన్న ఎన్టీఆర్ టీడీపీని స్థాపించి తెలుగు తేజాన్ని దశ దిశలా చాటారన్నారు.

ఢిల్లీ నేతల గుండెల్లో రైళ్ళు పరిగెత్తించారన్నారు. దీంతో గుడివాడ చరిత్రకెక్కిందన్నారు. కిరికిరి ముఖ్యమంత్రి కిరణ్‌కుమార్‌రెడ్డి గుడ్డి కరెంట్‌తో గుడ్డి ప్రభుత్వాన్ని నడుపుతున్నారన్నారు. ఇంతటి చేతగాని అవినీతి అసమర్థ ప్రభుత్వాన్ని తాను చూడలేదన్నారు. కాంగ్రెస్‌ను నమ్ముకుంటే ఆధార్ ఎక్కౌంట్‌లో డబ్బులు సైతం కాంగ్రెస్ ఖాతాలోకి వెళ్ళిపోతాయన్నారు. తమ హయాంలో లోఓల్టేజ్, కరెంట్ కోతలు లేవన్నారు. ముందు జాగ్రత్తలు తీసుకోవడం ద్వారా నాణ్యమైన విద్యుత్‌ను ఇచ్చామన్నారు. సెల్‌ఫోన్లు, రోడ్లు తమ ప్రభుత్వ ప్రతిభేనని గుర్తు చేశారు. టీడీపీ అధికారంలో ఉంటే కేజీ బేసిన్ల గ్యాస్ ప్రథమ వాటా రాష్ట్రానికే దక్కేదన్నారు. సహజ వనరులను సైతం స్వలాభానికి దోచుకున్న రాజశేఖరరెడ్డి వల్ల రాష్ట్రానికి అనేక అనర్థాలు జరిగాయన్నారు. ఆయన వారసత్వాన్ని పుణికిపుచ్చుకున్న ప్రస్తుత కాంగ్రెస్ ప్రభుత్వ దొంగలను పొలిమేర్లు దాటేలా తరిమికొట్టాలన్నారు. ప్రజాస్వామ్యాన్ని కాపాడేందుకు విద్యావంతులు, యువకులు రాజకీయ రంగంలోకి రావాలన్నారు.

ఎన్టీఆర్, నేను నిప్పులాంటి మనుషులం

ఎన్టీఆర్ తాను నిప్పులాంటి మనుషులమని నిప్పులాగానే బతుకుతానని చం ద్రబాబు అన్నారు. విష కన్య సాక్షి ప్రచురించే ఆసత్య విషయాలపై పబ్లిక్ డిబేట్‌కు రమ్మని తాను అనేకసార్లు సవాల్ విసిరినా పలాయనం చిత్తగిస్తున్నారన్నారు. సర్కారు భూములు అమ్మి అక్రమంగా గడించిన సొమ్ము తో పెట్టిన పత్రికలో విపక్షాలను, సాటి పత్రికలను సైతం బ్లాక్ మెయిల్ చేసే విధంగా వార్తలు రాస్తున్నారని ధ్వజమెత్తారు. లక్షల కోట్లు దోచుకున్న వైఎస్సార్ పక్కన యుగపురుషుడు ఎన్టీఆర్ ఫొటో పెట్టడం ఏమిటని కార్యకర్త చంద్రబాబును ప్రశ్నించగా దొంగల పక్కన దేవుడు ఫొటో పెట్టి రాజకీయ బేరాలు సాగిస్తున్నారని వైఎస్ బతికున్నప్పుడు ఎన్టీఆర్‌ను అనేక ఇబ్బందు లు పెట్టారన్నారు. హైదరాబాద్ విమానాశ్రయానికి ఎన్టీఆర్ పేరు పెడితే దాన్ని తొలగించి ఘనత వైఎస్సార్‌దేనన్నారు. ఎన్టీఆర్ పేరు పెట్టేదాక విశ్రమించమన్నారు.

రౌడీల కోరలు పీకేశాం

తమ ప్రభుత్వం ఉన్నప్పుడు రాష్ట్రంలో రౌడీల కోరలు పీకేశామని, ఉగ్రవాదాన్ని ఉక్కుపాదంతో అణిచివేశామని చంద్రబాబు అన్నారు. మత కలహాలు లేకుండా తమ ప్రభుత్వం చట్టాలను సక్రమంగా వినియోగించిందన్నారు. కాంగ్రెస్ పాలనలో ఆడబిడ్డలకు రక్షణ లేకుండా పోయిందని, తమ హయాం లో మహిళల పట్ల దురాఘతాలకు పాల్పడే వారిని కఠినంగా శిక్షించామన్నారు. ప్రజలు ఓటు వేసే విషయంలో నిర్లక్ష్యంగా ఉండటం తగదన్నారు.

బాబు ప్రజానీకానికి అభివాదం చేస్తూ ముందుకు సాగారు. అన్న ఎన్టీఆర్ హయాంలో టీడీపీ వైభవాన్ని ప్రజలు గుర్తుకు తెచ్చే ప్రయత్నం చేశారు. రామన్నపూడి వద్ద సీనియర్ టీడీపీ నాయకులు లింగం సాయిబాబు, సూరపనేని రామచంద్రరావు పాదయాత్రలో పాల్గొన్నారు. గంగాధరపురం, బిళ్లపాడు కాలనీల మహిళలు బాబుకు మంగళ హారతులు పట్టి పూలాభిషేకం చేశారు. దారిలో స్కూ ల్ బస్సు ఎక్కిన బాబు విద్యార్థులతో ముచ్చటించారు. కూల్‌డ్రింక్ షాపులో డ్రింక్ తాగారు. వృద్ధురాలిని ఆప్యాయంగా పలుకరించి సాధక బాధలు అడిగి తెలుసుకున్నారు. వ్యవసాయ కూలీని పిలిచి బతుకు ఎట్టా సాగుతోందని ఆరా తీశారు. చంద్రబాబు పాదయాత్రను చూసేందుకు చిన్నారులు సైతం పొలాల వెంట పరుగులు తీస్తూ కన్పించారు. లారీలు, బస్సుల్లో వెళ్తు న్న ప్రయాణికులు సైతం బాబును చూసి కేరింతలు కొడుతూ చేతులు ఊపారు. కాంగ్రెస్ ప్రభుత్వం వల్ల తా ము ఎదుర్కొంటున్న సమస్యల చిట్టా ను ఒక మహిళ చంద్రబాబుకు అందించింది. మొత్తంమీద మంగళవారం బాబు పాదయాత్ర గుడివాడ వరకు అత్యంత ఉత్సాహంగా సాగింది.

డప్పులు, వాయిద్యాలతో కోలాహలం

పాదయాత్ర ప్రారంభం నుంచి డప్పులతోపాటు కరీంనగర్ నుంచి వచ్చిన 50 మంది వాయిద్యకారులు లయబద్ధం గా తమ డోలులపై నాదాలు చేస్తూ నాయకులు, కార్యకర్తలను హుషారెత్తించారు. విచిత్ర వేషధారణతో పాదయాత్ర ముందు భాగం ఆకట్టుకుంది. గుడివాడ రూరల్ మండలం మాజీ అధ్యక్షుడు గుత్తా శివరామకృష్ణ(చం టి), నూతక్కి బాలాజీల ఆధ్వర్యంలో 60 మంది తెలుగు మహిళలు పసుపు చీరలు ధరించి బాబుకు పూలతో స్వాగ తం పలికారు. హోరెత్తిన డప్పులు, నృత్యాలతో విజయవంతం చేశారు.

పెద్ద సంఖ్యలో యువత

బాబు పాదయాత్రకు యువత నుంచి పెద్ద ఎత్తున స్పందన లభించింది. గుడ్లవల్లేరు, గుడివాడ ఇంజనీరింగ్ కాలేజీలకు చెందిన వేలాది మంది విద్యార్థులు బాబు పాదయాత్రలో పాల్గొన్నారు. మరోవైపు 100 మందికి పైగా విద్యార్థులు భారీ మోటారు సైకి ళ్ళ ర్యాలీతో బాబుకు స్వాగతం పలికారు. ఎంపీ కొనకళ్ళ నారాయణరావు, మాజీ ఎంపీ గద్దె రామ్మోహనరావు,ఎమ్మెల్యేలు దేవినేని ఉమామహేశ్వరరావు, దాసరి బాలవర్ధనరావు, తంగిరాల ప్రభాకరరావు, మాజీ ఎమ్మెల్యే రావి వెంకటేశ్వరరావు, నేతలు వల్లభనేని వంశీమోహన్, కొనకళ్ళ బుల్లయ్య, లంకదాసరి ప్రసాదరావు, కాగిత వెంకట్రావ్, బొండా ఉమామహేశ్వరరావు, పంచుమర్తి అనురాధ పాల్గొన్నారు.

చిత్తూరు జిల్లా నగిరి నియోజకవర్గం నుంచి దాదాపు 20మంది నాయకులు, కార్యకర్తలు తరలివచ్చి బాబు ఆరోగ్య పరిస్థితిని తెలుసుకుని సంఘీభావం ప్రకటించారు. విజయవాడకు చెందిన దేవినేని చంద్రశేఖర్, కేశినేని నాని, కాట్రగడ్డ బాబు, గుంటూరుకు చెందిన లాల్‌జాన్‌బాషా, తిరువూరు మాజీ ఎమ్మెల్యే నల్లగట్ల స్వామిదాసు, బందరు నుంచి బచ్చుల అర్జునుడు తదితరులు ఉదయం నుంచే గాంధీఆశ్రమం వద్ద ఉన్నారు. కైకలూరు ఎమ్మెల్యే జయమంగళ వెంకటరమణ, ఈడ్పుగంటి వెంకట్రామయ్య, నియోజకవర్గ కార్యకర్తలు వచ్చి బాబును కలిశారు. వర్ల రామయ్యతో పాటు పామర్రు నియోజకవర్గ కార్యకర్తలు, దండోరా నాయకులు బాబును కలుసుకున్నారు. నాలుగుగంటలకు బాబు పాదయాత్ర ప్రారంభం కావడంతో ఆప్రాంతమంతా ఒక్కసారిగా బోసిపోయింది.

పాదయాత్రకు తరలివచ్చిన నేతలు

దొండపాడు నుంచి మాజీ సర్పంచ్ అడుసుమిల్లి వెంకటరత్నం ఆధ్వర్యంలో వందలాది మంది కార్యకర్తలు పాదయాత్రకు తరలివచ్చారు. రామన్నపూడి మాజీ సర్పంచ్ జుజ్జవరపు వీరభద్రరావు, నూజెళ్ళ మాజీ సర్పంచ్ అట్లూరి దుర్గాభవానీ ఆధ్వర్యంలో కార్యకర్తలు పాదయాత్రకు తరలివచ్చారు. రూరల్ మండలం నుంచి వందలాది మంది కార్యకర్తలు, నాయకులు పాల్గొన్నారు.

బాబు యాత్ర ఉండటంతో విద్యుత్ సరఫరా ఉంచుతున్నారని, ఈ ప్రాంతం దాటాక మళ్ళీ అంధకారమేనని ఒక కార్యకర్త అన్నారు. కొసరాజు బాపయ్యచౌదరి కార్యకర్తలను బాలయ్యకు పరిచయం చేయగా, ఆయన వారిని పేరు పేరునా పలుకరించారు. అందరు కష్టపడి పని చేసి పార్టీని నిలబెట్టాలని విజ్ఞప్తి చేశారు. మినపకాయ తీతకు వచ్చిన కూలీలు పనులకు వెళ్లకుండా చూసేందుకు రావడంతో ఆయన వారితో మా ట్లాడి ఫొటోలు తీయించారు. పశుభొట్లపాలెంకు చెందిన బాలయ్య అభిమాని పాములు ఫొటో దిగేందుకు వచ్చి తాను పెట్టుకున్న నల్లఅద్దాల కళ్ళజోడు తీస్తుండగా.. ఆగు..ఆగు ఎందుకు తీస్తావు ఉంచుకో అని తీసిన జోడును పెట్టించి మరీ ఫొటో దిగారు. కొసరాజు బాపయ్యచౌదరి, జిల్లా ఉపాధ్యక్షుడు జంగం మోహనరావు, జిల్లా పాల ఉత్పత్తిదారుల సంఘ డైరెక్టర్ వి.బి.కె.బి సుబ్బారావు, సొసైటీ అధ్యక్షుడు పి.రవికుమార్, బొప్పన శివప్రసాద్, పిన్నమనేని రాఘవేంద్రరావు, చంద్రాల చిట్టిబాబు తదితరులు పాల్గొన్నారు.