వైఎస్సార్ కాంగ్రెస్ పార్టీపై తెలుగుదేశం పార్టీ అధ్యక్షుడు చంద్రబాబు నాయుడు తీవ్రస్థాయిలో ధ్వజమెత్తారు. జైల్లోనే అన్ని జరిగిపోతున్నాయని ఆయన ఆరోపించారు. తూర్పు గోదావరి జిల్లాకు చెందిన కాంగ్రెసు నేత విశ్వం  బుధవారం చంద్రబాబు ఆధ్వర్యంలో టీడీపీలో చేరారు. ఈ సందర్భంగా ఆయన మీడియాతో మాట్లాడుతూ జగన్‌కు బెయిల్ రాకపోవడంతో ఆందోళనలు చేపట్టడం విడ్డూరంగా ఉందని అన్నారు.  జగన్ పార్టీ నిరసనలు చేపట్టడం సిగ్గు చేటు అన్నారు. దొంగలందరు సంఘంగా ఏర్పడి ఇలాగే ధర్నాలు చేస్తే పరిస్థితి ఏమిటన్నారు. హంతకులు, అత్యాచారాలు చేసిన వారు కూడా ఇలాగే ధర్నాలు చేస్తారేమోనని అనుమానాలు వ్యక్తం చేశారు.

వైయస్సార్ కాంగ్రెసు పార్టీ ఎవరికి వ్యతిరేకంగా ఆందోళన చేసిందో చెప్పాలని చంద్రబాబు డిమాండ్ చేశారు. బెయిల్ ఇవ్వని కోర్టులకు వ్యతిరేకంగా ధర్నా చేశారా అన్నారు.  తెలుగుదేశం పార్టీకి పత్రికలు, టీవి ఛానళ్లు లేవని, కార్యకర్తలే పార్టీ సిద్ధాంతాలను ప్రజల్లోకి తీసుకు వెళ్లాలని  ఆయన సూచించారు. ముఖ్యమంత్రి కిరణ్ కుమార్ రెడ్డి పరిపాలన తెలియని వ్యక్తి అన్నారు. దీపం ఉన్నప్పుడే ఇల్లు చక్కబెట్టుకోవాలని చూస్తున్నారన్నారు. ముఖ్యమంత్రి వసూళ్లకు పాల్పడుతున్నారన్నారు. ముఖ్యమంత్రి తమ్ముళ్లు రాజ్యాంగేతర శక్తిగా ఎదిగారని, వాళ్లు ఫైళ్లు తీసుకు వస్తే కిరణ్ సంతకాలు చేస్తున్నారని చంద్రబాబు ఆరోపించారు. అవినీతిపై ప్రజలు పోరాటం చేయాలని కోరారు.  వైయస్ హయాంలో వ్యవస్థలు నాశనమయ్యాయన్నారు.

స్థానిక సంస్థలకు పార్టీ గుర్తుపై వెంటనే ఎన్నికలు నిర్వహించాలని తెలుగుదేశం పార్టీ అధినేత నారా చంద్రబాబు నాయుడు ప్రభుత్వాన్ని డిమాండ్‌ చేశారు. స్థానిక సంస్థల ఎన్నికల్లో పార్టీ జయకేతనం ఎగురవేయాలన్నారు. సైకిల్‌ జోరు పెరగాలని కార్యకర్తలకు హితబోధ చేశారు. మన వద్ద డబ్బులు లేకపోయినా, బలమైన కార్యకర్తల బలగం ఉందన్నారు. జెండాలు మోసి, మోసి ఆలసిపోయారని, అయినా రానున్న ఎన్నికల్లో నేతలు, శ్రేణులు సమన్వయంతో కలిసి పనిచేసి పార్టీ అభ్యర్థులను గెలిపించాలన్నారు. మన ముందు కూర్చున్నవారిలో ఎంతో మంది రేపు జరగబోయే స్థానిక సంస్థల ఎన్నికల్లో సర్పంచ్‌లు, జడ్పీటీసీలు, ఎంపీపీలు కానున్నారన్నారని పేర్కొన్నారు.

కాంగ్రెస్‌ పార్టీ ఎప్పుడు అధికారంలోకి వచ్చినా స్థానిక సంస్థలకు ఎన్నికలు నిర్వహించకుండా నిర్వీర్యం చేస్తోందంటూ చంద్రబాబు మండిపడ్డారు. రేపు జరగబోయే స్థానిక సంస్థల ఎన్నికలు రాబోయే సాధారణ ఎన్నికల విజయానికి నాంది కావాలన్నారు. మంగళవారం మహానాడు రెండవ రోజు ‘స్థానిక సంస్థలపై నిర్లక్ష్యమన్న’ తీర్మానాన్ని ఆ పార్టీ సీనియర్‌ నేత కోడెల శివప్రసాదరావు ప్రవేశపెట్టగా, మాజీ ఎమ్మెల్సీ వైవీబీ రాజేంద్ర ప్రసాద్‌, నెల్లూరు జిల్లా అధ్యక్షుడు బీద రవిచంద్రయాదవ్‌ బలపరిచారు. ఈ సందర్భంగా చంద్రబాబు మాట్లాడుతూ గతంలో కాంగ్రెస్‌ పార్టీ అధికారంలో ఉన్నప్పుడు 10-15 ఏళ్లు హైదరాబాద్‌ నగర పాలక సంస్థకు ఎన్నికలు నిర్వహించలేదని గుర్తు చేశారు. టీడీపీ అధికారంలోకి రాగానే హైదరాబాద్‌ నగర పాలక సంస్థకు ఎన్నికలు నిర్వహించామన్నారు. 73,74వ రాజ్యాంగ సవరణ ద్వారా స్థానిక సంస్థలను బలోపేతం చేసేందుకు కృషి చేశామని గొప్పలు పోతున్న కాంగ్రెస్‌ నేతలు, రాష్ట్రంలో స్థానిక సంస్థలకు ఎన్నికలు నిర్వహించకుండా నిర్వీర్యం చేస్తున్నారన్నారు.

సర్పంచ్‌లు, ఎంపీటీసీ, జడ్పీటీసీ స్థానాలకు ఎన్నికలు నిర్వహించకపోవడంతో ప్రత్యేకాధికారుల పాలనలో స్థానిక సంస్థలు కునరిల్లుతున్నాయన్నారు. ఒక్కొక్క అధికారికి మూడు, నాలుగు మున్సిపాలిటీలు, మండలాలు అప్పగించడంతో వారు ఎక్కడ పర్యవేక్షించలేని దుస్థితి నెలకొందన్నారు. గ్రామాల్లో కనీస మౌలిక వసతుల కల్పనకు చర్యలు తీసుకోలేని దుస్థితిలో ప్రత్యేకాధికారులున్నారన్నారు. మంచినీటి కోసం బోర్లు బాగు చేయించమంటే చందాలు వేసుకుని బాగు చేయించుకోండంటూ అధికారులు సమాధానమనిస్తున్నారని ఆయన ఆవేదన వ్యక్తం చేశారు. దేశాభివృద్ధికి కేంద్ర, రాష్ట్ర ప్రభుత్వాలతో పాటు, స్థానిక సంస్థల పాలకవర్గాలు కూడా ముఖ్యమేనన్నారు. స్థానిక సంస్థలకు ఎన్నికలు నిర్వహించకపోవడంతో కేంద్ర నిధుల విడుదలను ఆపివేసిందన్నారు. అయినా కాంగ్రెస్‌ పార్టీ ఓడిపోతామనే భయంతో స్థానిక సంస్థలకు ఎన్నికలు నిర్వహించడం లేదని విరుచుపడ్డారు.

టీడీపీ హయాంలో పద్ధతి ప్రకారం స్థానిక సంస్థలకు ఎన్నికలు నిర్వహించి, నిధులు, విధులు అప్పగించామన్నారు. తాము అధికారంలో ఉన్నప్పుడు స్థానిక సంస్థలకే ఇసుకరీచ్‌లను అప్పగించామని గుర్తు చేశారు. గ్రామపంచాయితీ, మండల, జిల్లాకు దామాషా ప్రకారం నిధులు కేటాయించడం జరిగేదన్నారు. కానీ నేడు పరిస్థితి పూర్తిగా మారిపోయిందన్నారు. ఇసుకరీచ్‌లను కూడా తమ అనునయులకు కట్టబెట్టే దుష్ట సంప్రదాయానికి కాంగ్రెస్‌ తెరలేపిందన్నారు. టీడీపీ పాలనలో అన్ని గ్రామపంచాయితీల కార్యాలయాలకు సచివాలయమన్న పేరు పెట్టి సొంత భవనాలు నిర్మించి ఇచ్చామన్నారు. రాష్ట్రానికి సచివాలయం ఎంత ముఖ్యమో, గ్రామ సచివాలయాలు అంతే ముఖ్యమని వ్యాఖ్యానిం చారు. జన్మభూమి కార్యక్రమం ద్వారా గ్రామీణ ప్రాంతాల్లో ఎన్నో అభివృద్ధి పనులు స్థానిక సర్పంచ్‌ల నేతృత్వంలో చేపట్టడం జరిగిందన్నారు. టీడీపీ అధికారంలో ఉన్నప్పుడు అధికార వికేంద్రీకరణకు ప్రాధాన్యతనిస్తే, ఇప్పుడున్న కాంగ్రెస్‌ ప్రభుత్వం మాత్రం స్థానిక సంస్థలను పూర్తిగా నిర్వీర్యం చేసిందన్నారు.

స్థానిక సంస్థల్లో బడుగు, బలహీన వర్గాలకు 50 శాతం రిజర్వేషన్లు కల్పించాలని చంద్రబాబు ప్రభుత్వాన్ని డిమాండ్‌ చేశారు. ప్రభుత్వం ముందుకు వచ్చి బీసీలకు 50 శాతం రిజర్వేషన్లు కల్పించకపోతే, తాము అధికారంలోకి వచ్చిన వెంటనే స్థానిక సంస్థల్లో బీసీలకు 50 శాతం రిజర్వేషన్లు కల్పిస్తామన్నారు. స్థానిక సంస్థల ద్వారానే బీసీ నాయకత్వం అభివృద్ధి చెందుతుందన్నారు. స్థానిక సంస్థల బలోపేతానికి టీడీపీ అంకితభావంతో ఉందని, అధికారంలోకి రాగానే నిధులు, అవసరమైన విధులు, బాధ్యతలు అప్పగించేందుకు కృషి చేస్తామన్నారు. రాష్ట్రంలో నెలకొన్న అనిశ్చితిని తొలగించేందుకు వెంటనే స్థానిక సంస్థలకు ఎన్నికలు నిర్వహించాలని బాబు డిమాండ్‌ చేశారు.ఇటీవల జరిగిన సహకార ఎన్నికల్లో తెలుగుదేశం పార్టీ సత్తాచాటుకుందని, రేపు జరగబోయే స్థానిక సంస్థల ఎన్నికల్లో అదే పరిస్థితి పునారావృతం చేయాలని బాబు కార్యకర్తలకు పిలుపునిచ్చారు.

అధికార కాంగ్రెస్‌ పార్టీ ఎన్ని అక్రమాలకు పాల్పడినా సింగిల్‌విండో ఎన్నికల్లో విజయం సాధించగలిగామన్నారు. టీడీపీ గెలిచే స్థానాలకు ఎన్నికలు నిర్వహించకుండా కోర్టు ద్వారా స్టే తెచ్చుకుని అడ్డుకున్నారని, అలాగే డబ్బులు వెదజల్లి అనేక స్థానాల్లో గెలుపొందారన్నారు. అయినా టీడీపీ ఆశించినదానికంటే ఎక్కువ స్థానాల్లో విజయం సాధించిందన్నారు. నాయకులు ఇంకా సమర్ధవంతంగా పనిచేసి ఉంటే మరిన్ని స్థానాలు గెలిచేవారమన్నారు.

తెలుగు దేశం పార్టీ అధ్యక్షుడిగా నారా చంద్రబాబు నాయుడు వరుసగా తొమ్మిదోసారి ఏకగ్రీవంగా ఎన్నికయ్యారు. తెలుగు దేశం పగ్గాలు చేపట్టి ఈ సారి ఎన్నికల్లో విజయం తమదేనని ధీమా వ్యక్తం చేసారు. హైదరాబాద్ నగర శివారులో నిర్వహిస్తున్న మహానాడు క్రయక్రమం రెండో రోజు జోరుగా సాగింది.

మంగళవారం స్థానిక సంస్థలపై మహానాడులో ప్రతిపాదించిన తీర్మానంపై ఆయన ప్రసంగించారు. స్థానిక సంస్థల ఎన్నికల్లో తెలుగుదేశం పార్టీ జెండా ఎగరాలని ఆయన వ్యాఖ్యానించారు. తమది నిజాయితీ గల పార్టీ అని, ప్రజలు తమ వెంటే ఉన్నారని ఆయన అన్నారు. దోపిడీ దొంగల పక్కన ఎన్టీఆర్ ఫొటో పెట్టడం బాధగా ఉందని ఆయన వైయస్సార్ కాంగ్రెసు పార్టీ నాయకుల తీరుపై అసహనం వ్యక్తం చేసారు.

అయితే వస్తున్నా.. మీకోసం పాదయాత్రలో మిగిలి పోయిన జిల్లాలను బస్సు యాత్ర ద్వారా పూర్తి చేసేందుకు సిద్ధం అయ్యారు. ఈ మేరకు రెండో రోజైన మంగళవారం మహానాడులో ఆయన ప్రకటించారు. టీడీపీ నేతలు, కార్యకర్తలు ఈసారి బస్సు యాత్ర చేయాలని కోరుతున్నారని ఆయన తెలిపారు. మరోవైపు జూన్‌లో పార్టీ కార్యకర్తలకు హైదరాబాదులో శిక్షణా తరగతులు నిర్వహించనున్నట్లు చంద్రబాబు వెల్లడించారు

అమెరికాలోని డల్లాస్‌లో మంగళవారం టిడిపి ఆధ్వర్యంలో ఎన్టీ ఆర్ జయంతి వేడుకలను నిర్వహించారు. ఈ సందర్భంగా సినీ నటుడు మురళీ మోహన్ కేక్ కట్ చేశారు. టిడిపి రాష్ట్ర
కార్యదర్శి మన్నవ సుబ్బారావు అధ్యక్షతన సమావేశాన్ని నిర్వహించారు. ఎన్టీఆర్ టిడిపిని స్థాపించిన తర్వాత రాష్ట్ర రాజకీయ ముఖ చిత్రం మారిందని మురళీమోహన్ తెలిపారు.
ఈ సందర్భంగా ఎన్టీ ఆర్
నటించిన పలు సినిమాలకు చెందిన పోస్టర్లను మురళీమోహన్ ఆవిష్కరించారు. నరసరావుపేట ఎంపి మోదుగుల వేణుగోపాలరెడ్డి ఎన్టీఆర్ చిత్రపటానికి పూలమాలలు వేసి ని
వాళులు అర్పించారు. ఈ
సందర్భంగా ఎన్నారైలు స్వీట్లు పంపిణీ చేశారు. కార్యక్రమంలో ఎన్నారైలు సతీష్ వేమన, ఉప్పుటూరి రామ్ చౌదరి, చెన్నుపాటి రామ్ కిశోర్, నవత కృష్ణ, చెరుకూరి బుల్లయ్య, విశాఖకు చెందిన ఎన్‌టి చౌదరి,
న్యాయవాది మోదుగుల పాపిరెడ్డి తదితరులు పాల్గొన్నారు.

'ఆలోచనలు పోయేవాడా
అనునిత్యం అన్వేషించేవాడా
చెట్టూ, చెరువూ, గట్టూ, పుట్టా,
ఆకసంలో, సముద్రంలో
అన్వేషించేవాడా
అశాంతుడా, పరాజయం ఎరుగనివాడా
ఊర్ధ్వదృష్టీ, మహామహుడా
మహాప్రయాణికుడా
మానవుడా మానవుడా'
- శ్రీశ్రీ- గోటేటి రామచంద్రరావు
నాటి ముఖ్యమంత్రి శ్రీ ఎన్.టి.రామారావు గారి ప్రత్యేక పౌర సంబంధాల అధికారి- గోటేటి రామచంద్రరావు

ఏవినీలాకాశ గర్భమునుండి, ఏ యుగారంభ సంరభమున భారతీయ ప్రేమామృతం ఆవనికి దిగివచ్చేనో... ఎవరు చెప్పగలరు? ఇయ్యది కాలమువలెనే అనంతము. ఆకాశమువలె సర్వవ్యాప్తము అని ఒక సందర్భంలో శ్రీ ముట్నూరి కృష్ణారావు వ్రాసిన వాక్యం శ్రీ రామారావు గారికి ఎంతగానో వర్తిస్తుంది.

విశ్వవిఖ్యాత తెలుగు తేజోరాశి, తెలుగువారికి, పరమపవిత్ర ప్రాత:స్మరణీయుడైన ధీరోదాత్తుడు ఆయన.
మానవ చరిత్రలో శాశ్వతస్థానం ఆర్జించుకున్న మహానుభావుడు, శ్రీ నందమూరి తారకరామారావు ఈ భూమిపై ఉద్భవించిన పవిత్రమైన రోజు ఇది.
మానవ అవగాహనకు నిర్వచనాలకు, వర్ణనకు, విశ్లేషణకు అందని రీతిలో చరిత్ర మహావేగంతో వీస్తూ ఎన్నోమలుపులూ, మెలుపులతో... అత్యంత వేగంగా సాగిపోతూ-- ఒక జాతి జీవన సంధ్యలో, సంఘర్షణలతో సతమతమవుతున్నప్పుడు మహానాయకులకి జన్మనిస్తుంది. ఆ మహానాయకుడే తిరిగి చరిత్రను సృష్టిస్తాడు. ఆ దిశలోనే మహత్తర చరిత్ర సృష్టించిన మహామనిషి శ్రీ ఎన్టీఆర్ జన్మించారు.

చలన చిత్ర రంగంలో హిమవన్నగ శిఖర సదృశుడుగా విరాజిల్లుతున్న ఆయనకి... సమకాలీనంగా.. మన దేశాన్నీ, మన రాష్ట్రాన్నీ అతలాకుతలం చేస్తూ, దినదినం కాదు.. క్షణ క్షణం దిగజారుతున్న రాష్ట్ర ఉనికికే కాక సామాన్య ప్రజాజీవనాన్నీ చిద్రుపలు చేస్తున్న చారిత్రక దురవస్థలో, అప్పటి ప్రజానాయకులు మనరాష్ట్ర వర్తమానాన్ని, భవిష్యత్తుని హస్తినలోని నిరంకుశుల పాదాల వద్ద పరచి ప్రజాస్వామ్య బానిసత్వానికి పునాదులు వేస్తున్న గర్హనీయ దురదృష్ట సమయం అది.

ఆ అప్రజాస్వామిక, ప్రజాద్రోహం, ఆత్మవంచన, అర్థరహిత పరావలంబన, ఆత్మగౌరవ నిర్వీర్యత చూసి, భరించలేక తన అంతరాలలో రగులుతున్న విప్లవాగ్నిని బహిరంగపరచి తెలుగుజాతి ఆత్మగౌరవ పున:స్థాపనకు, తెలుగు వ్యక్తిత్వ నిజస్వభావానికి నిద్రాణమై, నిర్వీర్యమైయున్న తెలుగు ప్రజల వైభవ, ప్రాభవాలు మేల్కొల్పడానికి, ప్రజలను ఉత్తేజితులను చేయడానికి, తెలుగుచరిత్ర, నాగరికత, సంస్కృతుల ప్రత్యేకతలు యావత్ ప్రపంచానికి తిరిగి చాటి చెప్పడానికి -- అనుకున్న మరుక్షణమే నడుంబిగించి.. దీక్షబూనిన కార్యదక్షుడాయన.

ఢిల్లీ పాదుషాల ఆభిజాత్యాన్ని, నిరంకుశత్వాన్ని పటాపంచలు చేయడానికి కార్యక్షేత్రంలోకి ఉద్యమించిన కర్తవ్యవీరుడు, క్రియాశీలి, అకళంక దేశభక్తుడైన శ్రీ రామారావు ఉవ్వెత్తున ఒక్కసారిగా ఉప్పెనలా ఎగిసిపడుతూ తెలుగుదేశం అని తన పార్టీకి నామకరణం చేయడంతోనే తన రాజకీయ జీవితానికి శ్రీకారం చుట్టారు. ఆయన విప్లవ భావాలకు మన విస్తృత ప్రజాస్వామ్య ఫెడరల్ వ్యవస్థలోనే 'తెలుగుదేశం' అనే పార్టీకి పేరు పెట్టడం. ఒక వీరోచిత స్వాభావిక నిర్ణయం. ఏ ప్రాంతీయ సంకుచితత్వానికి తావులేని, దేశభక్తి పూరక నిర్ణయం అది.

1982 మార్చి 29కి సుమారు 10-15 రోజులకు ముందుగానే పార్టీ నామకరణ నిర్ణయం మీద శ్రీ ఎన్టీఆర్ తనకు తానుగా, వ్యక్తులకుగానీ, సన్నిహితులకుగానీ, పత్రికా ప్రపంచానికిగానీ చెప్పకుండా... తెలియనీయకుండా, నిర్ణయం తీసుకోవడంలో... తీవ్రంగా శ్రమించారు. ఆ పేరు నిర్ణయించడంలో నన్ను.. స్వర్గీయ నా సోదరుడు, ఆయనకి అత్యంత ప్రీతిపాత్రుడు స్వర్గీయ గోటేటి రాధాకృష్ణమూర్తినీ, ఆయనకి అత్యంత ఆత్మీయుడు, మిత్రుడు, సహృదయుడు అయిన స్వర్గీయ శ్రీ డి.వి.ఎస్. రాజుగారినీ, ఆయన మిత్రుడు శ్రీ దువ్వదత్తుడు గారినీ, ఆయన్ని ఎంతో అభిమానించే స్వర్గీయ కొసరాజు రాఘవయ్య గారినీ, మహాకవి పండితుడు 'ఆంధ్ర పురాణకర్త' శ్రీ మధునా పంతుల సత్యనారాయణ శాస్త్రి గారినీ, ఆయనకి మిత్రుడైన శ్రీ దేవానాధన్ గార్లతో తీవ్ర చర్చలు పరమగోప్యంగా జరిపారు. ప్రముఖ తెలుగుదేశం పార్టీ నాయకులు శ్రీ గోరంట్ల బుచ్చయ్య చౌదరి (వీరే శ్రీ మధునా పంతుల వారిని 2 సార్లు దగ్గరుండి రాజమండ్రి నుంచి పంపించిన సన్నిత్రులు)కి మాత్రమే తెలుసు. అప్పుడప్పుడు రామారావుగారి సోదరులు శ్రీ ఎన్. త్రివిక్రమరావు వచ్చేవారు.

ఆంధ్రుల చరిత్రని పురాణంగా రాసిన కవిపండితులు శ్రీ మధునాపంతుల సత్యనారాయణ శాస్త్రి గారు రామారావుగారికి ప్రాజ్ఞనన్నయ యుగం దగ్గరనుంచి తెలుగు కవిత్వ పరిణామ ప్రక్రియని వివరిస్తూ ఒక మహత్తర విషయాన్ని చెప్పారు.

అది.. ఎప్పుడో 7, 8 శతాబ్దాలలో శంకర భగవత్పాదులు పరమ పవిత్ర శ్రీ చక్ర రూపకల్పనలో 'తెలుగు సంఖ్యలను' ఉపయోగించారనీ, అంతకు మించి తెలుగుకి పవిత్రత ఎవరూ ఇవ్వలేరనీ, ఇవ్వలేదనీ చెప్పి శ్రీ ఎన్టీఆర్‌ని మంత్ర ముగ్ధులని చేశారు. తెలుగు, తెనుంగు, తెలంగాణ అన్నవన్నీ పర్యాయపదాలే అన్నారు. వారు చెప్పిన ఆ విషయం రామారావు గారి మదిలో గాఢంగా నాటుకుని తీవ్రంగా ఆలోచింపజేసింది. రామారావుగారు ఆయనకి పాదనమస్కారంచేసి గౌరవించారు.

అప్పుడే నాకు స్ఫురణకువచ్చి... గొప్పకవి, ఉపాధ్యాయుడు, ఆంధ్రసాహిత్య చరిత్ర రచయిత అయిన స్వర్గీయ పింగళి లక్ష్మీకాంతంగారి 'గౌతమవ్యాసముల'లోని 'ఆంధ్రవాఙ్మయ స్థూలరూపము' ప్రథమవ్యాస భాగాన్ని చదివి వినిపించాను అందులోని అంశాలు :-
'దేశభాషలందు తెలుగులెస్స అని శ్రీనాథుడు మొదలైన పూర్వీకులచేతను... ఇటాలియన్ ఆఫ్ ద ఈస్ట్ అని పాశ్చాత్య శబ్దవేత్తల చేతను ముక్త కంఠమున ప్రశంసింపబడిన తెలుగుకు మూడు పర్యాయపదములు కలవు. ఆంధ్రమనియు, తెలుగనియు, తెనుగనియు, కానీ, ఈ మూడు పదములలో 'తెనుగు-తెలుగు' అన్నవి రూపాంతరము లేననియు, ఆ పక్షమున మన భాషకు రెండే పర్యాయ పదములు ఉండెననియు నా ఊహ. ఈ రెండింటిలో ఆంధ్రమనునది మొదట రాజపరముగ, పిమ్మట దేశపరముగ, ఆపై దేశభాషా పరముగ ప్రయోగింపబడగా తెనుగనునది మొదట దేశ పరముగ పిమ్మట ప్రజాపరముగా, ఆపై వారి భాషా పరముగ మారింది'. ఈ విశ్లేషణను శ్రీ రామారావుగారు శ్రద్ధగా విన్నారు. మరొక సుప్రసిద్ధ తెలుగు సాహిత్య చరిత్రకారుడు వేరొక ప్రసిద్ధ పండితుడు శ్రీ నిడదవోలు వెంకట్రావుగారు మొట్టమొదట రాజ భాషగా ప్రకటించినది తంజావూరు నాయకరాజులే అని నిర్ధారించారు.

భారత రాజ్యాంగంపట్ల గౌరవంతో, పూర్తి గణతంత్ర స్ఫూర్తితో, భారత సార్వభౌమత్వానికి విశ్వాసంగా ఉండే రాష్ట్రీయమైన పేరుకోసం ఆలోచిస్తున్నప్పుడు ఆయన మదిలో మెదిలే పేర్లు నాలుగు ఉండేవి. -తెలుగునాడు, -తెలుగునేల, -తెలుగు భూమి, -తెలుగు కేతనం మొదలైనవి. వీటిపై ఇదమిద్దంగా నిర్ధారణకి రాలేక లోలోనే ఆలోచనలు చేస్తున్న సమయం అది. మధునా పంతులవారి మాటల్లో ప్రమాణాలు, నేను వినిపించిన పింగళివారి వ్యాసంలో తెలుగు పదార్థ విశ్లేషణా సరళి, చారిత్రికత - కొసరాజుగారు గుర్తుచేసిన వేములపల్లి శ్రీకృష్ణగీతం 'చెయ్యెత్తి జైకొట్టు తెలుగోడా' మరికొన్ని భావస్ఫోరకమైన గీతాలతో సమావేశం నడిచేది. శ్రీ డి.వి.ఎస్ రాజు గారు చర్చలు సాగుతున్నంత సేపూ ఆతిథ్య బాధ్యతలు నిర్వహించేవారు. రామారావుగారు మాత్రం నిశ్శబ్దంగా అందర్నీ చూస్తుండేవారు. తీక్షణంగా... వింటూ.. సునిశితంగా... ఆలోచిస్తూవుండేవారు.

ఆ నేపథ్యంలో ఎన్టీఆర్ పార్టీపేరు నిర్ణయించడంలో వేగంగా ఒక స్థిరమైన నిర్ణయం రావడానికి, నా పరిధిలో, మరో ప్రయత్నంగా 20వ శతాబ్దంలో 'తెలుగుదేశాన్ని' జాగృతం చేసిన మహనీయుడు స్వర్గీయ మట్నూరి కృష్ణారావుగారి 'తల్లిపిలుపు' అనే వ్యాసాన్ని చదివి వినిపించాను. శ్రీ కృష్ణారావుగారు భారత స్వాతంత్య్ర సంగ్రామ సమయంలో 1937 ఫిబ్రవరి 6వ తేదీ సంచికలో వ్రాసిన భావగాంభీర్య, అర్థగాంభీర్య, ప్రబోధాత్మక వ్యాసం అది. 'ఆ వ్యాస సారాంశం':

'భారతమాత పసుపుపెట్టెరూపు దాల్చినది' తన బిడ్డలు తెచ్చియిచ్చు ఉపాహారములందు కొనుటకు విశ్వరూపిణియైన తల్లి పుత్రసౌలభ్యం కొరకు దాల్చిన మంగళరూపమే పసుపుపెట్టె - పసుపు పెట్టె పేరిట శోభనాకారముతో తల్లి సాక్షాత్కరించి, సేవననుగ్రహించుచున్నది. మన దేశంలోని ఇతర ప్రాంతాలతోపాటు పొరుగున ఉన్న మనలను ద్వేషించే తమిళులు మనకంటె మిన్నగా తల్లిదీవెనలందుకున్నారు. తల్లికెక్కుడు గూర్తుమని సంబరపడుతున్న తెలుగు బిడ్డలు ఈ అల్పసేవా సమయమున సాటి వారికి తీసిపొదురనుటకల్ల - దక్షిణాపథమంతయూ ఏకచ్ఛత్రము క్రింద తెచ్చిన ఆంధ్రప్రజ నేడు సాటివారు గర్భాలయములోకి చనుచుండ, తాము మాతృదేవాలయ ప్రాంగణమున నిలచియుందురనుట కాని మాట. ఇంతకింతలుమాని అన్యబేధములను మరచి, తెలుగులందరూ ఒక్కదారిన నడచి, నాయనుంగు బిడ్డలగుట సమర్థించుకొనుడని మాతృదేవత పిలుచుచున్నది రండు రండు.

ఆ పసుపు పెట్టెలలో మాతృమూర్తిని దర్శించి పూజాపుష్పములు సమర్పించివత్తుము రండు' ఇది విన్న మరుక్షణం శ్రీ ఎన్.టి.ఆర్. గభాలున కుర్చీలోంచి లేచి... 'ఇప్పుడు నా అభిప్రాయానికి ఆలోచనకి అవసరమైన సమాధానం దొరికింది 'ఆహా' ముట్నూరి వారికి జోహార్లు.. అని... మన పార్టీపేరు 'తెలుగుదేశం' తెలుగుతల్లి పిలుస్తోందిరా అని గట్టిగా ఉచ్చరిస్తూ, నేను ప్రజాముఖంగా ప్రకటించే వరకూ ఈ నిర్ణయం మన నలుగురి మధ్యనే ఉండాలి సుమా. ఎవరు ఎవరికి చెప్పకూడదు' అని ఆజ్ఞాపించారు తనదైన శైలిలో.

అలా శ్రీ ముట్నూరి కృష్ణారావు గారి వ్యాసంతో ప్రేరణపొంది, ప్రభావంతులై తెలుగుదేశం పార్టీ అని నామకరణంతోబాటు తెలుగుదేశం పిలుస్తోందిరా, కదలిరా అనే నినాదం, పసుపుపెట్టెలా పచ్చని పతాకలతో ఆ మహనీయుడు పార్టీని రూపొందించడం జరిగింది. ఆ కృతజ్ఞతా భావంతోనే ట్యాంక్ బండ్‌పై తెలుగు తేజోమూర్తుల వరసలో శ్రీ ముట్నూరి వారి విగ్రహం ఏర్పరచడానికి శ్రీ రామారావు నిర్ణయం తీసుకున్నారు.

విశ్వవిఖ్యాత నటసార్వభౌమునిగా, సాటిలేని మేటి ప్రజానాయకునిగా, అత్యంత సమర్థుడైన రాజ్యాధినేతగా భాసిల్లి, ఎనలేని ధైర్యంతో ఆయన స్థాపించిన రాజకీయ పార్టీకి తెలుగుదేశం అని పేరుపెట్టి అధికారం చేపట్టిన తర్వాత ఆయన ప్రారంభించిన అనేకానేక ప్రజాసంక్షేమ, విద్యావైజ్ఞానిక, సంస్కృతి, కళాత్మక కార్యక్రమాల నామ నిర్ధారణ 'తెలుగు' అనే పదంతోనే ప్రారంభించిన వైనం ఎవరూ ఎప్పటికీ మరిచిపోలేనిది, శాశ్వతమైనది.
నాటికీ, నేటికీ, ఎప్పటికీ యావత్ తెలుగుజాతి జాజ్వల్యమానమైన గౌరవానికీ, ఐక్యతకు, ఏకత్వానికీ, ఆత్మగౌరవానికీ, నాగరికతకు, తెలుగుభాషా సాహిత్యాలకు, తెలుగు సంస్కృతికి... ఆయనే శాశ్వత చిహ్నంగా చరిత్ర పుటల్లో నిలచి ఉంటారు.

ఎవరికీ తెలియని ఈ చారిత్రక రహస్యాలన్నీ నేనే వ్రాయాలని గౌరవనీయులు ప్రముఖ నిర్మాత, నందమూరి సోదరులకు ఆత్మీయ మిత్రుడు, శ్రీ డి.వి.ఎస్. రాజుగారు అనేక పర్యాయాలు నాతో అనేవారు. తీవ్ర అనారోగ్యంతో కేర్ హాస్పిటల్‌లో ఉన్నప్పుడు నేను, మిత్రుడు నాటకప్రయోక్త దీక్షిత్‌తో సహా వెళ్లినప్పుడు అప్పటి ఫిల్మ్‌నగర్ కో-ఆపరేటివ్ సొసైటీ కార్యదర్శిగా ఉన్న శ్రీ సూర్యనారాయణరావుగారు, రచయిత యడవల్లిగారు, డి.వి.ఎస్. రాజు గారి కుమారుడు ఉండగా నాతో తెలుగుదేశం పార్టీ చరిత్ర గురించి, రామారావుగారి గురించి సమర్ధవంతంగా, స్పష్టంగా, స్వచ్ఛంగా, వ్రాయగల సమర్థులు మీరే. మీరే వ్రాయాలి లేకపోతే వాస్తవాలు కాలగర్భంలో కలిసిపోతాయి. అని నన్ను ఆదేశించారు. ఈ సందర్భంలో తెలుగుదేశం పార్టీ నామావిర్భావ సమయంలో మాతో ఉన్న డి.వి.ఎస్. రాజుగారిని స్మరించడం నా విధ్యుక్త ధర్మం, కర్తవ్యం. మా అందరికీ అంకితభావం, సామాజిక స్పృహ, దీక్ష, దక్షతలు కలిగించడానికి నిత్యస్ఫూర్తిదాయకుడైన మహానాయకుడు శ్రీ నందమూరి తారకరామారావు. ఆయనకెంతో ప్రీతిపాత్రమై, తన గంభీరగళంతో, శ్రావ్యమైన ప్రసిద్ధ పద్యాన్ని చదవగల్గిన ఆ మహా అధినేతను స్మరిస్తూ:

'తెలుగదేలయన్న దేశంబు తెలుగేను
ఏను తెలుగు వల్లభుండ తెలుగోకండ
ఎల్లనృపులు గొలువ ఎరుగవే బాసాడి
దేశ భాషలందు తెలుగు లెస్స'
..........

తెలుగు జాతి ఆత్మగౌరవాన్ని ప్రపంచానికి ఎలుగెత్తి చూపిన ఎన్టీఆర్‌కు పార్లమెంటులో అవమానం జరిగింది. మంగళవారం ఉదయం ఎన్టీఆర్ జయంతిని పార్లమెంట్ పట్టించుకోలేదు.
పార్లమెంటులో విగ్రహ ఏర్పాటు చేసిన తర్వాత జయంతి, వర్ధంతి నిర్వహించడం అనావాయితీ, కాగా ఎన్టీఆర్ విషయంతో స్పీకర్ ఆనవాయితీకి తూట్లు పొడిచారు. విగ్రహానికి స్పీకర్ మీరాకుమార్ పూలమాలు
వేయడం విస్మరించారు. టీడీపీ కార్యాలయ కార్యదర్శి ఎన్ సత్యనారాయణ ఆధ్వర్యంలో అభిమానులు ఎన్టీఆర్ విగ్రహానికి పూలమాలులు వే
సి అంజలి ఘటించారు.

బస్సు యాత్ర చేపట్టేందుకు తెలుగుదేశం పార్టీ అధ్యక్షుడు చంద్రబాబు నాయుడు సిద్ధమయ్యారు. ఈ మేరకు రెండో రోజైన మంగళవారం మహానాడులో ఆయన ప్రకటించారు. గత
ఏడాది అక్టోబర్ 2న చేపట్టిన 'వస్తున్నా..మీకోసం' పాదయాత్ర తరహాలోనే బస్సు యాత్రం ఉంటుందని అన్నారు. ఈ సందర్భంగా ఆయన మాట్లాడుతూ పాదయాత్ర 16 జిల్లాల్లోనే చేశారని, మిగిలిన జిల్లాల్లో
జులై నుంచి బస్సు యాత్ర చేయనున్నట్లు ఆయన తెలిపారు. టీడీపీ నేతలు, కార్యకర్తలు ఈసారి బస్సు యాత్ర చేయాలని కోరుతున్నారని ఆయన అన్నారు.
కాగా, జూన్‌లో పార్టీ కార్యకర్తలకు హైదరాబాదులో శిక్షణా తరగతులు నిర్వహించనున్నట్లు చంద్రబాబు తెలిపారు. శాసనసభా నియోజకవర్గానికి 40 మంది చొప్పున ఎంపిక చేసుకుని శిక్షణ ఇస్తామని
చెప్పారు. విద్యుత్తు సమస్యపై 1.5 కోట్ల మందితో సంతకాలు సేకరించామని, ఆ సంతకాలను అసెంబ్లీలో ప్రదర్శిస్తామని, ఆ తర్వాత గవర్నర్‌కు సమర్పిస్తామని ఆయన చెప్పారు. ప్రజలతో మమేకం
కావడానికి బస్సు యాత్ర చేయనున్నట్లు ఆయన చెప్పారు. స్థానిక సంస్థల ఎన్నికలను పార్టీ గుర్
తుతో నిర్వహించాలని చంద్రబాబు నాయుడు డిమాండ్ చేశారు.
స్థానిక సంస్థలపై మహానాడులో ప్రతిపాదించిన తీర్మానంపై ఆయన మంగళవారం ప్రసంగించారు. స్థానిక సంస్థల ఎన్నికల్లో తెలుగుదేశం పార్టీ జెండా ఎగరాలని ఆయన అన్నారు. తమది నిజాయితీ గల పార్టీ
అని, ప్రజలు తమ వెంటే ఉన్నారని ఆయన అన్నారు. దోపిడీ దొంగల పక్కన ఎన్టీఆర్ ఫొటో పెట్టడం బాధగా ఉందని ఆయన వైయస్సార్ కాంగ్రెసు పార్టీ నాయకుల తీరుపై వ్యాఖ్యానించారు. తెలుగుదేశం పార్టీ
అధ్యక్షుడిగా నారా చంద్రబాబు నాయుడు మరో సారి ఎన్నిక కానున్నారు. ఈ విషయాన్ని మంగళవారం సాయంత్రం ప్రకటిస్తారు.