పల్లెల్లో అయితే చంద్రబాబు కంటే ముందే ధరల మధ్య వ్యత్యాసాన్ని మహిళలు చెబుతున్నారు. సన్నబియ్యం ధర రూ. 15 నుంచి నేడు రూ. 45కు పెరిగింది. వంట నూనె రూ. 40 నుంచి రూ.80 దాటింది. ఉల్లిపాయులు కేజీ రూ.4 నుంచి రూ.40కి చేరుకొన్నది. కందిపప్పు రూ. 25 నుంచి రూ. 80కి చేరింది. మా సంపాదన మాత్రం రోజుకు రూ. 100 అలానే ఉందని చెబుతూ తామెలా బతకాలని గోడు వెళ్ళబోసుకొంటున్నారు.

విద్యుత్ ఛార్జీల పైనా మహిళలు స్పందిస్తున్నారు. ప్రతి నెలా ఇంట్లో విద్యుత్ సిబ్బంది నుంచి బిల్లులు తీసుకొనే మహిళలు ఇటీవలకాలంలో సర్‌చార్జ్ మూలంగా పెరిగిన మొత్తాన్ని చూసి ఆవేదన చెందుతున్నారు. ముఖ్యంగా వ్యవసాయానికి రాత్రి వేళ కరెంటు సరఫరా చేస్తుండటాన్ని తీవ్రంగా ఆక్షేపిస్తున్నారు. ఇచ్చే మూడు గంటల విద్యుత్ అర్ధరాత్రి 2 గంటలకు ఇస్తుంటే గబ్బచీకటిలో పొలానికి వెళ్ళాల్సి వస్తుండటంపై ఆందోళన వ్యక్తం చేస్తున్నారు. పంటకు పెడుతోన్న నీరు సక్రమంగా చేరుతుందో, లేదో తెలియని పరిస్థితి అని, అలానే ఏ విషసర్పాలు, కీటకాలు భారిన పడాల్సి వస్తుందోనని బిక్కుబిక్కుమంటూ జీవించాల్సి వస్తోందని చెబుతున్నారు.

తన రెండు వేల కిలోమీటర్ల పాదయాత్ర అధిగమించిన గుర్తుగా మాజీ మంత్రి ఆలపాటి రాజేంద్రప్రసాద్ నేతృత్వంలో దాతల సహకారంతో నిర్మాణం తలపెట్టిన ఎన్‌టీఆర్ కిసాన్ భవన్‌కు చంద్రబాబు శంకుస్థాపన చేశారు. రెండు వేల కిలోమీటర్ల పాదయాత్ర, కిసాన్‌భవన్‌ల శిలాఫలకాలను ఆవిష్కరించారు. అనంతరం స్థానిక రైతులతో సమావేశమై వారి సమస్యలు అడిగి తెలుసుకొన్నారు. సాగునీరు లేక కృష్ణా డెల్టా సర్వనాశనం అయిందన్న ఈదర పూర్ణచంద్రరావు అనే రైతు చేసిన వ్యాఖ్యపై చంద్రబాబు స్పందిస్తూ కాలువల్లో రైతుల కన్నీళ్లు పారుతున్నాయన్నారు.

డెల్టాలో మొక్కజొన్న, పసుపు రెండో పంటగా పండిస్తేనే రైతులు నిలదొక్కుకోగలుగుతారని, అయితే ప్రభుత్వం సాగునీరు ఇవ్వకుండా వేధిస్తోందన్నారు. ఈ నేపథ్యంలో తాను సోమవారం పాదయాత్ర ఎక్కడికి చేరుకొంటే అక్కడే మహాధర్నాకు దిగనున్నట్లు ఇప్పటికే ప్రకటించానని చెప్పారు. ఇప్పటికే తమ ఎమ్మెల్యేలు జిల్లా కలెక్టర్‌ను కలిసి సమస్యను నివేదించారని, అలానే హైదరాబాద్‌లో మరో ఎమ్మెల్యేల బృందం గవర్నర్‌ను కలిసి డెల్టా, సాగర్ కాల్వలకు నీరు విడుదల చేసి పంటలను ఆదుకోవాల్సిందిగా విజ్ఞప్తి చేస్తుందన్నారు.

నాగార్జునసాగర్‌లో 490 అడుగులు నీటిమట్టం ఉంటనే మేము సమర్థవంతగా సాగు నీరు ఇచ్చాం. కలెక్టర్, ఎస్‌పీలను కాలువల మీద పెట్టి చివరి భూముల వరకు సాగునీరు వెళ్లేలా చేశాం. ఈ రోజున సాగర్‌లో 515 అడుగులున్నా నీళ్లు ఇవ్వడం లేదని ఆగ్రహం వ్యక్తం చేశారు. ఆదివారం సాయంత్రం వరకు చూసి సోమవారం ఉదయం జిల్లా రైతులతో మహాధర్నాకు దిగుతానని స్పష్టం చేశారు. అంగలకుదురు నుంచి పాదయాత్రగా తెనాలికి వెళుతుండగా అనుకోని అతిథి రూపంలో వర్షం ఎదురైంది. దాంతో చంద్రబాబు రోడ్డు పక్కన ఉన్న ఒక పూరిగుడిసెలోకి వెళ్లారు.

వర్షం వెలిసిన తర్వాత తిరిగి నడక ప్రారంభించి మార్గమధ్యలోని జేఎంజే కళాశాల విద్యార్థినులు, అధ్యాపకులతో చంద్రబాబు సంభాషించారు. వాళ్లు ఎదుర్కొంటున్న సమస్యలు అడిగి తెలుసుకొన్నారు. మగవాళ్లకు తీసిపోకుండా ఆడపిల్లలను ఉన్నత శిఖరాలకు తీసుకెళ్లే బాధ్యతను తాను తీసుకొంటానని హామీ ఇచ్చారు. విద్యార్థినులు టెక్నాలజీని ఉపయోగించుకొని తమ సామర్థ్యాన్ని పెంచుకోవాలని, విద్యే కాకుండా విలువలూ అవసరమని స్పష్టం చేశారు.

స్కాలర్‌షిప్పులు, ఫీజు రీయింబర్స్‌మెంట్ అమలు చేసి పేద విద్యార్థులు ఉన్నత చదువులు చదివేలా చేస్తానన్నారు. టీడీపీ హయాంలో విద్యార్థినులను ఎవరైనా ఈవ్‌టీజింగ్ చేయాలంటే భయపడేవారు. రౌడీలు రాష్ట్రం విడిచిపోయేలా చేశాం. ఎవరైనా తప్పు చేస్తే వాళ్లకు చెయ్యాల్సింది చేసేవాళ్లం. నేడు అత్యాచారాలు, హత్యలు జరుగుతున్నాయి. తమ పాలనకు, కాంగ్రెస్ పాలనకు మధ్య వ్యత్యాసాన్ని గమనించాలని చంద్రబాబు సూచించారు.

జేఎంజే కళాశాల విద్యార్థినులతో సంభాషణ అనంతరం మధ్యాహ్నం విశ్రాంతి తీసుకొన్న చంద్రబాబు తిరిగి పాదయాత్రను ప్రారంభించగా వర్షం మరోసారి ఎదురైంది. ఉదయం 10 నిమిషాల పాటు కురిసిన వాన సాయంత్రం జోరున గంటకు పైగా కురిసింది. అయినాసరే చంద్రబాబు పాదయాత్రను నిలిపేయకుండా గొడుగు సాయంతో ముందుకు కదిలారు. భారీ వర్షం కారణంగా రోడ్లపైకి అడుగు లోతులో వరదనీరు చేరినా చంద్రబాబు లెక్క చేయకుండా చెంచుపేట, రెండు రైల్వేగేట్ల రోడ్డు మీదుగా తెనాలి మునిసిపల్ కార్యాలయ సెంటర్‌కు చేరుకొని అక్కడ ఏర్పాటు చేసిన బహిరంగ సభలో ప్రసంగించారు. చంద్రబాబుకు దారి పొడవునా మహిళలు నీరాజనాలు పలికారు.

చంద్రబాబు వెంట టీడీపీ జిల్లా అధ్యక్షుడు ప్రత్తిపాటి పుల్లారావు, మాజీ మంత్రులు డాక్టర్ కోడెల శివప్రసాదరావు, ఆలపాటి రాజేంద్రప్రసాద్, ఎమ్మెల్సీ నన్నపనేని రాజకుమారి, వేమూరు ఎమ్మెల్యే నక్కా ఆనందబాబు, పార్టీ అసెంబ్లీ నియోజకవర్గాల ఇన్‌చార్జ్‌లు అనగాని సత్యప్రసాద్, తెనాలి శ్రావణ్‌కుమార్, కందుకూరి వీరయ్య, నిమ్మకాయల రాజనారాయణ, చీరాల గోవర్థన్‌రెడ్డి, పార్టీ నాయకులు ముమ్మనేని వెంకట సుబ్బయ్య, పెదకూరపాడు బుజ్జీ, ముమ్మనేని వెంకట సుబ్బయ్య తదితరులు నడిచారు.

  రాష్ట్రంలో కాంగ్రెస్ ప్రభుత్వం రైతుల పాలిట శాపంగా మారిందని తెలుగుదేశం పార్టీ అధ్యక్షుడు, మాజీ ముఖ్యమంత్రి నారా చంద్రబాబు నాయుడు విమర్శించారు. ముఖ్యమంత్రి కిరణ్‌కుమార్ రెడ్డికి వ్యవసాయం అంటే ఏమిటో కూడా తెలియదని..ఆయనకు ఏ రిజర్వాయర్ ఎక్కడ ఉందో కనీసం అవగాహన లేదన్నారు. వస్తున్నా మీ కోసం పాదయా త్రలో భాగంగా శనివారం అంగలకుదురు నుండి బయలుదేరినఆయన పట్టణంలోని పలు ప్రాంతాలలో పర్యటించారు. అనంతరం రా త్రి మార్కెట్ సెంటర్‌లో జరిగిన బహిరంగ సభలో చం ద్రబాబు మాట్లాడుతూ ఇన్ని రోజులు వ్యవసాయానికి నీరు లేక రైతులు ఇబ్బందులు పడుతున్నా ప్రభుత్వం పట్టించుకోలేదన్నారు.

స్థానిక శాసన సభ్యుడు స్పీకర్ హోదాలో ఉండి కూడా ఉపయోగం లేదని ఆయన రైతులను ఆదుకోలేక పోయారని విమర్శించారు. రైతులు కష్టాలలో ఉంటే ఆదుకోలేని వ్యక్తులు స్పీకర్లు, ముఖ్యమం త్రులుగా ఉండటం ప్రజల దురదృష్టమని చెప్పారు.

చూడముచ్చటగా ఉంటే ఆం ధ్రాప్యారిస్ తెనాలిలోని కాల్వలను కాం గ్రెస్ నాయకులు మురికి కూపాలుగా తయారు చేశారని, ప్రజలను చైతన్యపరుస్తూ వారి కష్టాలు తెలుసుకునేందుకు కఠినతరమైనప్పటికీ పాదయా త్ర నిర్ణయం తీసుకున్నట్లు చెప్పారు. రా ష్ట్రంలో రాజకీయ దొంగలు ఎక్కువయ్యారని, దోచుకున్నది దాచుకోవటానికి దొంగలందరూ ఏకమౌతున్నారని విమర్శించారు.

రైతు రుణమాఫీపై తెలుగుదేశం తీసుకున్న నిర్ణయంతో ముఖ్యమం త్రి ఉలిక్కి పడ్డాడని, ఢిల్లీ నాయకుల గుండెల్లో రైళ్లు పరుగెడుతున్నాయని అన్నారు. రుణ మాఫీ సాధ్యం కాదని పిల్ల కాం గ్రెస్ చెబుతుందని, ఎన్ని ఇబ్బందులు ఎదురైనా రైతులను ఏ విధంగా ఆదుకుంటానో చేసి చూపిస్తానని సవాల్ విసిరారు. రానున్న ఎన్నికలలో ఓటమి భయంతోనే తాజాగా తాము కూడా రైతుల రుణా లు మాఫీ చేస్తామంటూ కాం గ్రెస్ నాయకులు ప్రకటిస్తున్నారని, వారి మాటలు నమ్మే పరిస్థితిలో ప్రజలు లేరన్నారు. అగస్త హెలికాప్టర్లకు సంబంధించి దేశ రక్షణ శాఖలో రూ.360 కోట్ల అవినీతి జరిగిందని, ఈ కాం గ్రెస్ దొంగలను ఏమనాల్లో అర్థం కావటం లేదన్నారు.

దేశంలో ఆడపిల్లలు రక్షణ లేకుండా పోతోందన్నారు. అదే తెలుగుదేశం పార్టీ అధికారంలో ఉంటే ఇటువంటి దారుణాలకు పాల్పడిన వారిని ప్రత్యేక ఫాస్ట్ ట్రాక్ కోర్టులు ఏర్పాటు చేసి ఉరి తీసేవారమని అన్నారు. కొన్ని సందర్భాలలో కఠిన నిర్ణయాలు తీసుకోవాల్సిన అవసరం ఉంటుందన్నారు. భవిష్యత్‌లో మెరుగైన ఆరోగ్య బీమా పథకం ప్రవేశ పెట్టి ప్రజలను ఆదుకుంటామని తెలిపారు. తెలుగుదేశం పార్టీ అధికారంలోకి వచ్చిన తొలిరోజే వ స్త్రాలపై వ్యాట్ టాక్స్ పూర్తిగా రద్దు చేస్తామని హామీ ఇచ్చారు.

సుమారు రెండు గంటల పాటు జరిగిన బహిరంగ సభలో అధిక సంఖ్యలో ప్రజలు హాజరై చం ద్రబాబు ప్రసంగాన్ని ఆద్యంతం ఆసక్తిగా ఆలకించారు. మాజీమంత్రి ఆలపాటి రాజేం ద్ర ప్రసాద్, వేమూరు ఎమ్మెల్యే నక్కా ఆనందబాబు, ఎమ్మెల్సీ నన్నపనేని రాజకుమారి, పట్టణ అధ్యక్షుడు మహ్మద్ ఖుద్దూస్, అన్నాబత్తుని శ్రావణ్‌కుమార్ తదితరులు ఉన్నారు.

ఎన్నికల కో డ్‌ను కారణంగా చూపిస్తూ తెలుగుదేశం పార్టీ అధినేత చంద్రబాబునాయుడును జిల్లా విడిచి వెళ్ళాలని ఆ దేశాలు ఇవ్వడం సమంజసం కాదని ఆ పార్టీ జిల్లా అధ్యక్షుడు ప్రత్తిపాటి పుల్లారావు స్పష్టం చేశారు. శనివారం ఆయన విలేకరులతో మాట్లాడుతూ చంద్రబాబు గత ఏడాది అక్టోబర్ రెండో తేదీన పాదయాత్ర ప్రారంభించి ఇప్పటికి 2040 కిలోమీటర్ల దూరం నడిచారని చెప్పారు. పాదయాత్ర ప్రారంభించిన తర్వాత ఎన్నికల నోటిఫికేషన్ వెలువడింది. ఎన్నికల నిబంధనలకు లోబడి పాదయాత్రను నిర్వహిస్తున్నాం. అలానే ఈ నెల 19వ తేదీ సాయంత్రం నాలుగు గంటల నుంచి 21వ తేదీ సాయంత్రం నాలుగు వరకు పాదయాత్ర నిలిపేయాలని ఎన్నికల సంఘం జారీ చేసిన ఆదేశాలను కూడా పాటిస్తామని చెప్పామన్నారు.

ఇప్పటివరకు పాదయాత్రలో ఎక్కడా ఎమ్మెల్సీ అభ్యర్థికి ఓటు వేయమని చంద్రబాబు అభ్యర్థించలేదని, అలానే ఓటర్లను ప్రభావితం చేయలేదని చెప్పారు. అయినప్పటికీ జిల్లాను విడిచి వెళ్ళాలనడం సబబు కాదన్నారు. ఇంకా శ్రీకాకుళం జిల్లా వరకు సుమారు వెయ్యి కిలోమీటర్ల పాదయాత్రను చంద్రబాబు చేయాల్సిఉందని చెప్పారు. ప్రజల కష్టాలను తెలుసుకొని వారిని చైతన్యపరచడమే తప్పా ఎన్నికల ప్రచార నిమిత్తం కాదని, ఈ నేపథ్యంలో జిల్లాను విడిచి వెళ్ళాలన్న ఆదేశాల నుంచి వెసులుబాటు కల్పించాలని కోరారు.