హైదరాబాద్ : సడక్ బంద్‌కు మద్దతివ్వాలని తమను ఎవరైనా కోరితే అప్పుడు దాని గురించి ఆలోచించాలని టీడీపీ తెలంగాణ ప్రాంత ఎమ్మెల్యేలు నిర్ణయించారు. బుధవారం అసెంబ్లీ లాబీల్లో టీడీపీ జడ్చర్ల ఎమ్మెల్యే జైపాల్‌యాదవ్‌కు టీఆర్ఎస్ఎల్పీ నేత ఈటెల రాజేందర్ ఎదురుపడ్డారు. సడక్‌బంద్‌కు మద్దతు ఇవ్వచ్చు కదా అని ఈటెల జైపాల్‌ను అడిగారు. తమ పార్టీని టీఆర్ఎస్ గానీ, జేఏసీ గానీ ఇంతవరకు అడిగిన పాపాన పోలేదని, ఎవరూ అడగకుండా ఎలా ఇస్తామని జైపాల్ ప్రశ్నించారు. 'ఇప్పుడు నేను అడుగుతున్నాను కదా' అని ఈటెల అన్నారు.

మా వాళ్లతో మాట్లాడి చెబుతానని జైపాల్ ఆయనకు చెప్పారు. తర్వాత జరిగిన పార్టీ శాసనసభాపక్ష సమావేశంలో జైపాల్ ఈ సంభాషణను మిగిలిన ఎమ్మెల్యేలకు వివరించారు. 'ఎదురు పడినప్పుడు మాట వరసకు ఈటెల అడిగినంత మాత్రాన మనం ఎలా మద్దతిస్తాం? జేఏసీ నుంచో లేకపోతే బంద్ చేస్తున్న పార్టీల నుంచో ఒక లేఖ వచ్చినా స్పందించేవాళ్లం. ఎవరైనా అధికారికంగా కోరితే అప్పుడు ఆలోచిద్దాం' అని టీ టీడీపీ ఫోరం కన్వీనర్ ఎర్రబెల్లి దయాకరరావు బదులిచ్చారు. దానికి తెలంగాణ ప్రాంత టీడీపీ ఎమ్మెల్యేలంతా మద్దతిచ్చారు.

కాటన్ స్మరణతో రాజమండ్రిలో అడుగుపెట్టాను. ఠీవిగా నిలిచిన వీరేశలింగం పంతులు విగ్రహాన్ని దారిలో చూసి స్ఫూర్తి పొందాను. ఆయన ధీరత్వమే తెలుగు జాతికి వరం. ఆదికవి నన్నయ తిరిగిన ఈ నేలపై అడుగులు వేయడం ఒకరకమైన ఉత్సాహాన్ని నాలో కలిగించింది. ఎదురుగా వచ్చిన వస్త్ర వ్యాపారులను చూసినప్పుడు మరింత సంతోషం కలిగింది. ఈ గడ్డపై మరోసారి వారితో గొంతు కలపగలిగాను. వీరి పట్టుదలను ఎవరైనా అభినందించాల్సిందే. ప్రభుత్వం మాత్రం అరెస్టులు, ఆంక్షలంటూ వేధించుకుతింటోంది. వ్యాట్‌పై నిర్ణయం ఇక ప్రజలదే. వాళ్ల సహకారం లేకుండా ఈ ఉద్యమం ముందుకు పోదు. వ్యాట్‌ను అందరి సమస్యగా గుర్తించినప్పుడే అది సాధ్యం! ఇది రెండువైపులా జరగాల్సిన ప్రయత్నం. అప్పుడిక ఈ ప్రభుత్వానికి చేయడానికేం ఉండదు...తప్పుకోవడం తప్ప!

 కాకినాడ/ఏలూరు : అధికారం ఇస్తే ఆరు నెలల్లో రాష్ట్రాన్ని గాడిలో పెడతామని టీడీపీ అధినేత చంద్రబాబు అన్నారు. ఈ అవినీతి, అసమర్థ, దొంగల, రౌడీల పాలన నుంచి రాష్ట్రాన్ని గట్టెక్కించేందుకు టీడీపీని గెలిపించాలని కోరారు. పశ్చిమ గోదావరి నుంచి సాయంత్రం తూర్పుగోదావరి జిల్లాలో ఆయన అడుగుపెట్టారు. రాజమండ్రి బ్రిడ్జి వద్ద బ్రహ్మాండమైన స్వాగతం లభించింది. వేలాది కార్యకర్తలు, అభిమానుల కోలాహలంతో ఆ ప్రాంతమంతా 'జన గోదావరి'ని తలపించింది.

మోటార్ సైకిల్ ర్యాలీలు, ఊరేగింపులు, సాంస్కృతిక కార్యక్రమాలతో పండుగ వాతావరణం నెలకొంది. ఈ సమయంలోనే కాకుం డా దీనికిముందు కొవ్వూరులో కూడా కాంగ్రెస్, వైసీపీల తీరును చంద్రబాబు తూర్పారబట్టారు. రాజమండ్రిలోని కోటిపల్లి బస్టాండ్, ఎన్టీఆర్, వీరేశలింగం విగ్రహాల కూడలివద్ద మాట్లాడారు. "రాష్ట్రంలో గజదొంగలు పడ్డారు. వైఎస్ సీఎంగా ఉన్నపుడు కొడుకు తప్పుల్ని వెనకేసుకొచ్చారు. లక్షల కోట్లు దోచిపెట్టారు. ఆ సొమ్మును రికవరీ చేసి పేదలకు పంచాలి. త్వరలోనే పిల్ల కాంగ్రెస్, తల్లి కాంగ్రెస్ లో కలిసిపోతుంది'' అన్నారు.

కాటన్, వీరేశలింగం, అంబేద్కర్, అల్లూరి, గాంధీ, ఫూలే, ఎన్టీఆర్ వంటి మహనీయుల విగ్రహాలు చూసి వారి మంచిని చెప్పుకుంటాం. కానీ, లక్షల కోట్లు దోచిపెట్టిన వైఎస్ విగ్రహాలు చూపించి రేపు మీ పిల్లలకు ఏం చెప్తారు?'' అని ప్రజలను ప్రశ్నించారు. ఆటో డ్త్రెవర్లకు పదో తరగతిని విద్యార్హతగా నిర్దేశించడం దారుణమన్నారు. తాము అధికారంలోకి వస్తే ఈ ఆంక్షను తొలగించంతోపాటు వస్త్ర వ్యాపారులపై వ్యాట్ రద్దు, గీత కార్మికులు, ఆటోడ్త్రెవర్లకు వడ్డీలేని రుణాలు, పేదరిక నిర్మూలనకు అనేక పథకాలు తీసుకువస్తామన్నారు.

రాష్ట్ర ఉద్యోగుల జీతాలనూ కేంద్ర ఉద్యోగుల వేతన స్కేల్‌తో సమానం చేస్తామని హామీ ఇచ్చారు. వ్యాట్ ఎత్తివేయాలన్న వస్త్ర వ్యాపారులను కాంగ్రెస్ ప్రభుత్వం వేధిస్తోందని, ఆ పార్టీ నేతలకు ఇకముందు దుస్తులు విక్రయించవద్దని పిలుపునిచ్చారు.

ఏలూరు : అందరూ కలిసి ఆంధ్ర ప్రదేశ్ రాష్ట్రాన్ని భ్రష్టుపట్టించారని తెలుగుదేశం పార్టీ అధినేత నారా చంద్రబాబు నాయుడు మండిపడ్డారు. ఇప్పుడు కిరణ్ సర్కార్, అప్పుడు వై.ఎస్. ప్రభుత్వం రాష్ట్రాన్ని నాశనం చేశారని ఆయన విరుచుకుపడ్డారు.

చంద్రబాబు నాయుడు తమ పాదయాత్రలో భాగంగా మాట్లాడుతూ ఇన్ని లక్ష ల కోట్ల రూపాయలు ఎలా వచ్చాయని ప్రశ్నిస్తే జగన్ వర్గీయులు తమపై బురద చల్లుతున్నారని ఆందోళన వ్యక్తం చేశారు. ప్రజాస్వామ్యంలో ప్రశ్నించే హక్కు అందరికీ ఉందంటూ, సమాధానం చెప్పవలసిన బాధ్యత కూడా అందరికీ ఉంటుందని, కాని జగన్ పత్రిక మాత్రం తాము ఏదైనా అడిగితే తమను లక్ష్యం చేసుకుని అసత్యాలు ప్రచారం చేస్తున్నదని ఆయన అన్నారు.

ప.గో జిల్లా డిక్లరేషన్‌ను ప్రకటించిన చంద్రబాబు
వస్తున్నా...మీకోసం పాదయాత్రలో భాగంగా పశ్చిమగోదావరి జిల్లాలో పర్యటిస్తున్న టీడీపీ అధినేత చంద్రబాబునాయుడు బుధవారం జిల్లా డిక్లరేషన్‌ను ప్రకటించారు. గోదావరి కాలువ ఆధునికీకరణ పనులు చేపడతామని తెలిపారు. ఏలూరు, భీమిలిలలో పారిశ్రామికవాడలు ఏర్పాటు చేస్తామన్నారు. జాతీయ రహదారి 214ని నాలుగు లైన్లుగా మారుస్తామని ఆయన తెలిపారు.

కొల్లేరును ఐదు కాంటూరు నుంచి మూడు కాంటూరు వరకు తగ్గిస్తామని చంద్రబాబు ప్రకటించారు. టీడీపీ అధికారంలోకి వస్తే పోలవరం ప్రాజెక్టుకు జాతీయహోదా సాధిస్తామని హామీ ఇచ్చారు. పోలవరం నుంచి దవళేవశ్వరం వరకు గోదావరి వెంబడి మరో ప్రధాన కాలువ తవ్విస్తామని ఆయన వెల్లడించారు అసంఘటిత కార్మికుల కోసం ఆస్పత్రిని నిర్మిస్తామన్నారు. ధవళేశ్వరం ఆనకట్టుకు మరమ్మతులు చేపడతామని ఆయన తెలిపారు. జిల్లాలో చేపల పరిశోధన కేంద్రం ఏర్పాటు చేయనున్నట్లు చంద్రబాబునాయుడు ప్రకటించారు.

హైదరాబాద్ : బెనిటా సంస్థ ఉద్యోగి వీరభద్రారెడ్డి మృతిపై సీబీఐ విచారణ జరపాలంటూ ముఖ్యమంత్రి కిరణ్‌కుమార్‌రెడ్డికి టీడీపీ ఎమ్మెల్యేలు బుధవారం వినతి పత్రాన్ని అందజేశారు. అనంతరం టీడీపీ నేతలు దేవినేని ఉమా, శ్రీరాం తాతయ్య మీడియాతో మాట్లాడుతూ జిల్లా స్థాయిలో కేసు దర్యాప్తులో పురోగతి లేదన్నారు. వీరభద్రారెడ్డి మృతి వెనుక బ్రదర్ అనిల్ హస్తం ఉందని వారు ఆరోపించారు. అనిల్ ఆస్తులపైనా సీబీఐ విచారణ జరపాలని నేతలు డిమాండ్ చేశారు.

హైదరాబాద్ : బాబ్లీ ప్రాజెక్టు వ్యవహారంపై ముఖ్యమంత్రి కిరణ్‌కుమార్‌రెడ్డితో టీడీపీ నేత ఎర్రబెల్లి దయాకర్‌రావు బుధవారం భేటీ అయ్యారు. అనంతరం ఎర్రబెల్లి మీడియాతో మాట్లాడుతూ ఈనెల 26న బాబ్లీపై అఖిలపక్ష భేటీ ఏర్పాటు చేస్తామని సీఎం హామీ ఇచ్చినట్లు ఆయన తెలిపారు.

హైదరాబాద్: వస్త్రాలపై వ్యాట్‌ను ఎత్తివేయాలంటూ టీడీపీ ఎమ్మెల్యేలు బుధవారం ఉదయం గన్‌పార్క్ వద్ద ఆందోళన దిగారు. వస్త్రాలపై వ్యాట్‌ను రద్దు చేయాలని డిమాండ్ చేశారు. వస్త్ర వ్యాపారులకు టీడీపీ అండగా ఉంటుందని టీడీపీ నేత దేవినేని ఉమా తెలిపారు.