కాకినాడ రూరల్ టీడీపీ అధినేత చంద్రబాబు మీ కోసం వస్తున్నా పాదయాత్రకు కాకినాడ రూరల్ నియోజకవర్గంలో జనం అడుగడుగునా నీరాజనం పట్టారు. కొవ్వాడ నుంచి ప్రారంభమైన ఈ యాత్రలో తెలుగు తమ్ముళ్లు ఉత్సాహంతో ఉరకలేశారు. పాదయాత్రకు ముందుగా కొవ్వాడలో నియోజకవర్గ ఇన్‌చార్జ్ పిల్లి సత్తిబాబు, అనంతలక్ష్మి దంపతలతోపాటు, వీవై దాసు చంద్రబాబుకు ఘన స్వాగతం పలికారు. కొవ్వాడలో నాలుగు గంటలకు ప్రారంభమైన పాదయాత్రలో ముందుగా నాయకులు ఏర్పాటు చేసిన ఎన్టీఆర్ విగ్రహాన్ని ఆవిష్కరించి పూలమాలలు వేసి నివాళులర్పించారు. ఈ సందర్భంగా హాజరైన మహిళలతో స్థానిక సమస్యలపై ఆరా తీశారు. మండలంలో తాగునీరు లేక తీవ్ర ఇబ్బందులు గురవుతున్నామని మహిళలు ఏకరువు పెట్టారు.

అనంతరం చంద్రబాబు మాట్లాడుతూ దొంగలు ఉన్న ప్రభుత్వంతో ప్రజలు తీవ్ర ఇబ్బందులు పడుతున్నారన్నారు. ప్రజాధనాన్ని దోచుకోవడమే తప్ప ప్రజాసమస్యలు తీర్చేవారు లేరన్నారు. కరెంటు ఉండదు కానీ కరెంటు బిల్లులు మాత్రం వేలకు వేలు చెల్లించే పరిస్థితి దాపురించిందని దుయ్యపట్టారు. అనంతరం చీడిగలోని నాగం సీతామహాలక్ష్మి కల్యాణమండపంలో రూరల్ మండల పాస్టర్ల అసోసియేషన్ ఆధ్వర్యంలో బాబుకు ప్రత్యేక ప్రార్థనలు నిర్వహించారు. ఈ సందర్భంగా బాబు మాట్లాడుతూ దళిత క్రిస్టియన్లను ఎస్సీలుగా గుర్తించేందుకు చర్యలు తీసుకుంటామన్నారు. క్రైస్తవ ఆస్తులను పరిరక్షించేందుకు ప్రత్యేక రక్షణ చర్యలు చేపడతామని పేర్కొన్నారు.

చీడిగ వంతెన వద్ద మాజీ సర్పంచ్ పితాని అప్పన్న ఏర్పాటు చేసిన ఎన్టీఆర్ విగ్రహాన్ని ఆవిష్కరించి పూలమాలలు వేశారు. అక్కడ కూడా స్థానిక సమస్యలపై ప్రజలను అడిగి తెలుసుకున్నారు. కాకినాడకు సమీపంలో ఉన్న ఈ ప్రాంతాల్లో తాగునీటి సౌకర్యం లేక, సొంత ఇళ్లు లేక పేదలు ఇంటి అద్ది చెల్లించలేక అనేక ఇబ్బందులు పడుతున్నారని అప్పన్న బాబు దృష్టికి తీసుకెళ్లారు. తెలుగుదేశం అధికారంలోకి వస్తే పేద వారికి సొంతింటి కల సాకారం చేసేందుకు, తాగునీరు అందించేందుకు చర్యలు తీసుకుంటామన్నారు. అనంతరం ఇంద్రపాలెంలో ఎన్టీఆర్ విగ్రహాన్ని ఆయన ఆవిష్కరించి పూలమాలలు వేశారు. అగ్రహారానికి చెందిన బ్రహ్మణులు ఆయనకు ఘన స్వాగతం పలికారు.

ఆదివారం యువత సమావేశం జరపాలని నిర్ణయించామని, విద్యుత్ సమస్య ఎక్కువగా ఉండడంతో బాబు ఇచ్చిన పిలుపులో భాగంగా విద్యుత్ ధర్నా చేయాలని కోరారని లోకేష్‌కు కొండ బాబు వివరించారు. అందుకే యువత సభ రద్దు చేశామని చెప్పగా 'విద్యుత్ సంక్షోభంపై నాన్నగారు దీక్ష చేపట్టడం' రాష్ట్రవ్యాప్తంగా పార్టీకి మేలు చేకూరుతుంది కదా అని కొండబాబుకు బదులిచ్చారు. అనంతరం అక్కడికి చేరుకున్న పలువురికి అభివాదం చేసి బస్సులోకి వెళ్లారు. మధ్యాహ్నం 2.45 గంటలకు బస్సు నుంచి బయటకు వచ్చారు. ఇంతలో యువ నేత ముత్తా శశిధర్, టీడీపీ జిల్లా ఉపాధ్యక్షుడు వాసిరెడ్డి ఏసుదాసు తదితరులు లోకేష్ రాక కోసం కొద్దిసేపు ఎదురు చూశారు. బస్సులోంచి బయటకొచ్చిన లోకేష్‌కు శశిధర్ పుష్పగుచ్ఛం అందజేశారు. వాసిరెడ్డి ఏసుదాసు టీడీపీ కండువా కప్పారు.

ఇద్దరూ ఆత్మీయంగా పలకరించుకుని అక్కడ ఉన్న సన్నిహితులు, పార్టీ నాయకులు, కార్యకర్తలను పలకరించారు. అనంతరం లోకేష్‌ను విలేఖరులు మాట్లాడమని కోరగా.. ఇప్పుడు మాట్లాడడం సరికాదు... నాన్నగారి పాదయాత్ర ముగిశాక మాట్లాడతాను అంటూ కారు ఎక్కి అభివాదం చేశారు. బాలకృష్ణ మిత్రుడు జిలానీ బ్రాహ్మణిని ఆత్మీయంగా పలకరించిన అనంతరం వారు విశాఖపట్నం వెళ్లారు.

పాదయాత్ర ప్రారంభం దగ్గర నుంచి ముగింపు వరకు అలుపెరగని బాటసారిలా నడుస్తూ పార్టీ శ్రేణుల్ని ఉత్సాహపరుస్తూ ముందుకు సాగుతున్నారు. శనివారం అర్ధరాత్రి ఒంటి గంటకు కాకినాడ ఆనందభారతి గ్రౌండ్‌లో ఏర్పాటు చేసిన బస్సులో ఆయన బస చేశారు. ఆదివారం విరామం కావడంతో బస్సులో చంద్రబాబు ఏం చేస్తారు అనే దానిపై ఆయన్ను చూసేందుకు వచ్చిన జనం ఆసక్తిగా చర్చించుకున్నారు. బాబు చేసిన బస వద్ద సిబ్బంది ఇచ్చిన సమాచారం మేరకు బస్సులో బాబు దినచర్య ఇలా సాగింది.

బాబు సాధారణ రోజుల్లో ఆరు గంటలకు లేస్తారు. ఆదివారం మాత్రం ఉదయం 7.30 గంటలకు నిద్రలేస్తారు. కాలకృత్యాలు తీర్చుకుంటారు. వ్యాయామం, యోగా చేస్తారు. 9 గంటలకు పాదయాత్రకు సంబంధించిన వార్తల విషయాలతోపాటు రాష్ట్రంలో జరుగుతున్న రాజకీయాలను, దేశ రాజకీయాలను పత్రికల ద్వారా నిశితంగా పరిశీలిస్తారు. 10.30 గంటలకు టీవీ చూస్తారు. వాటి ద్వారా వచ్చే విషయాలను పరిశీలించి జాతీయ స్థాయిలో జరుగుతున్న పరిణామాలను తెలుసుకుంటారు. ఈ మేరకు జాతీయస్థాయి నాయకులతో మాట్లాడతారు.

అనంతరం రాష్ట్రంలో జరుగుతున్న పరిణామాలపై నిశితంగా పరిశీలించి పార్టీ విధానాలను పార్టీ శ్రేణులకు టెలీకాన్ఫెరెన్స్ ద్వారా నేతలకు వివరిస్తారు. రెండుగంటలపాటు ఈ అంశాలు సాగుతాయి. 12.30 గంటల నుంచి 2 గంటల వరకు కుటుంబ సభ్యులతో గడుపుతారు. రెండు గంటలకు భోజనం చేస్తారు. గంట విరామం అనంతరం మళ్లీ కుటుంబ సభ్యులతో గడుపుతారు. అనంతరం పాదయాత్రలో కార్యక్రమాల నిర్వహణకు సంబంధించి నాయకులకు సూచనలు, ఏర్పాట్లపై సమీక్ష చేస్తారు.

కేంద్ర, రాష్ట్రంలో జరుగుతున్న పరిణామాలపై మరొకసారి టీవీ చానళ్ల ద్వారా తెలుసుకుంటారు. దినచర్య ఇలా ఉంటే ఇటీవల జాతీయస్థాయిలో రాజకీయ పరిణామాలు వేగంగా మారుతున్నాయి. పెదపూడిలో టీడీపీ 32 ఆవిర్భావ దినోత్సవంలో మాజీ ఎంపీ, గుంటూరుకు చెందిన సీనియర్ నేత లాల్‌జాన్ భాష తన ప్రసంగంలో మళ్లీ చంద్రబాబు జాతీయ రాజకీయాల్లో చక్రం తిప్పుతారని ప్రకటించడంతో పార్టీ శ్రేణుల్లో హర్షాతిరేకాలు వ్యక్తం అయ్యాయి. 33వ ఆవిర్భావ దినోత్సవం ఢిల్లీ రామ్‌లీలా మైదానంలో జరుపుకోవాలని ఆకాంక్షించారు. ఈ నేపథ్యంలో బాబు జాతీయ రాజకీయాలపై దృష్టిసారించారని విశ్లేషకులు భావిస్తున్నారు.

ఇందులో భాగంగా జాతీయస్థాయి నేతలతో టచ్‌లో ఉంటున్నారని తెలుస్తోంది. టీడీపీ ఆవిర్భావ దినోత్సవం పెదపూడిలో నిర్వహించడం ఒక చరిత్రగా మిగిలిపోతుందని పార్టీ శ్రేణలు చెబుతుంటే కాకినాడలో సోమవారం నిర్వహిస్తున్న విద్యుత్ దీక్ష ద్వారా ఈ ప్రాంతం టీడీపీ ఉద్యమాల్లో కీలకమైనదిగా గుర్తుండిపోతుందని నేతలు పేర్కొంటున్నారు.

గతంలో చిరంజీవిలాంటి నేతలు వచ్చినపుడు చూసి వెళ్లిపోయే జనం ఇపుడు చంద్రబాబు పాదయాత్ర వెంట కొంతదూరం నడవడం, రాత్రి 11 గంటల తర్వాత కూడా అధిక సంఖ్యలో పాదయాత్రలో పాల్గొనడం వంటి పరిణామాలపైనా ప్రత్యర్థి పార్టీ నేతలు చర్చించుకుంటున్నారు.

బాబు యాత్రకు మహిళల్లో అనూహ్య స్పందన విద్యుత్ కోతలు ప్రత్యక్షంగా అనుభవించేది మహిళలే. పిల్లలు, మగవారు ఇళ్లలో వుండేది తక్కువ సమయం. వీరితో పోలిస్తే గృహిణులే విద్యుత్ కోతలతో ఎక్కువ ఇబ్బందులు ఎదుర్కొంటున్నారు. చంద్రబాబు పాదయాత్ర సభల్లోనూ ఎక్కువగా విద్యుత్ సమస్యపైనే మాట్లాడుతున్నారు. డ్వాక్రా సంఘాలను కాంగ్రెస్ నిర్వీర్యం చేసిందని, గ్యాస్‌కు పరిమితి విధించడం వంటివాటిపైనా బాబు తన ప్రసంగాలలో ప్రస్తావిస్తున్నారు. ఈ నేపథ్యంలో ఎక్కడికక్కడ మహిళలు చంద్రబాబు యాత్రకు బ్రహ్మరథం పడుతూ వీధుల్లోకి వస్తున్నారు.

పెదపూడి 'దేశం'లో పెరుగుతున్న ఐక్యత పెదపూడి మండల టీడీపీ నేతలు ఏకమవుతున్నారు. ఇతర పార్టీల్లో వున్న నేతల్ని సైతం తమ పార్టీలోకి ఆహ్వానించి బలం పెంచుకునే ప్రయత్నాలు చేస్తున్నారు. ముప్పయ్యేళ్లపాటు పదవులు అనుభవించి పార్టీకి దూరమైన బొడ్డు భాస్కరరామారావుకు వ్యతిరేకంగా అక్కడ ఆయన సామాజిక వర్గంలో కీలక నేతలు ఇప్పటికే సమావేశమై ఐక్యంగా వుండాలని నిర్ణయించుకున్నారు. ఇతర సామాజిక వర్గాల వారిని కూడా కలుపుకుని టీడీపీ బలం మరింత పెంచుకునే ప్రయత్నాలకు ఇప్పటి నుంచీ శ్రీకారం చుడుతున్నామని అక్కడి నేతలు చంద్రబాబును కలిసి వివరించారు. చంద్రబాబు కూడా ఆయా నేతలతో ప్రత్యేకంగా మాట్లాడారు. పెదపూడి సభలో స్థానికంగా పార్టీ బలోపేతానికి కృషిచేస్తున్న అనేకమంది నేతల పేర్లు చెప్పి మరీ అభినందించారు.