ఎన్నికల కమిషన్ ఆదేశాలను పార్టీ జిల్లా అధ్యక్షుడు ప్రత్తిపాటి పుల్లారావును అడిగి తెలుసుకొన్న చంద్రబాబు వాటిని తూచ తప్పకుండా పాటించారు. సాయంత్రం ఐదు గంటల వరకు పాదయాత్ర చేసే అవకాశం ఉన్నా నాలుగు గంటలకే ముగించి ఈసీ సూచించిన విధంగా పార్టీ నాయకులకు వీడ్కోలు చెప్పి బస్సులోకి వెళ్లిపోయారు.ఆయన వెంట ఉండే వ్యక్తిగత సహాయకులు కూడా ఈసీ ఆదేశాలను పా టించారు. చంద్రబాబు బస చేసిన శిబి రం వద్ద పార్టీ జిల్లా నాయకులు ఉం డగా వారిని కూడా అక్కడి నుంచి వెళ్లిపోవాల్సిందిగా కోరారు. సాయంత్రం 4.30 గంటలకు పార్టీ నాయకులంతా చంద్రబాబు బస చేసిన శిబిరం వదిలి వెళ్లిపోయేలా చేశారు. అనంతరం ఆ ప్రాంగణాన్ని పోలీసులు పూర్తిగా తమ ఆధీనంలోకి తీసుకొన్నారు.

చంద్రబాబు కుటుంబ సభ్యులను మినహా మరెవ్వరిని లోపలికి అనుమతించ వద్దన్న ఆదేశాలను పోలీసులు అమలు చేస్తున్నారు. చంద్రబాబుకు 60 మంది పోలీసుల భద్రత: డీఎస్‌పీ ప్రసాద్

జడ్ ప్లస్ స్పెషల్ కేటిగిరీలో ఉన్న చంద్రబాబుకు పటిష్ఠమైన భద్రత ఏర్పాటు చేసినట్లు డీఎస్‌పీ వైటీఆర్ ప్రసాద్ తెలిపారు. ఈసీ ఆదేశాల మేరకు వేమూరు నుంచి రెండు కిలోమీటర్ల దూరంలో ఆయన విశ్రాంతి తీసుకొంటున్నారని, ఆయనకు నిబంధనల ప్రకారం బందోబస్తు కల్పిస్తున్నామని చెప్పారు. తన పర్యవేక్షణలో ఇరువురు సీఐలు, 60 మంది కానిస్టేబుళ్లు 24 గంటలు పహారా కాస్తున్నట్లు తెలిపారు. ఈ నెల 21వ తేదీ సాయంత్రం ఐదు గంటల వరకు చంద్రబాబును కలుసుకొనేందుకు ఆయన కుటుంబ సభ్యులకు మాత్రమే అనుమతి ఉందని, మరే ఇతరులు కలవడానికి వీల్లేదని స్పష్టం చేశారు.

ఒక మాదిగ పేటకు వెళ్లి చూసినప్పుడు గానీ పారిశుద్ధ్య సమస్య పచ్చటి ప్రాంతాలను ఎలా కబళిస్తున్నదీ తెలియలేదు. రెండున్నరేళ్లలో 60 మందిదాకా ఈ పేటలో చనిపోయారని తెలిసి విస్మయం చెందాను. ఈ చావుల పాపం ఎవరిది? సకాలంలో స్థానిక సంస్థల ఎన్నికలు జరపని ప్రభుత్వానిది కాదా? అదే పంచాయతీ పాలకమండళ్లు ఉండి ఉంటే ఈ ఘోరాలు జరిగి ఉండేవా? పాలన లేదు..ఆరోగ్య సేవలూ అందవు.. మరి ఈ జనం ఎలా బతకాలి!

ఇచ్చేది తక్కువ.. కోతలు ఎక్కువ.. చెప్పుకొనేది మరింత ఎక్కువ.. ఇది కదా మన సర్కారు సంక్షేమం అసలు ముసుగు. జంపని గుండా పోతున్నప్పుడు కలిసిన ఆ రైతులు చెప్పిన విషయాలు.. ఆ ముసుగును బదాబదలు చేసేశాయి. ఎరువుల భారం, కరెంట్ షాకు కుంగదీస్తున్నాయట. వీళ్ల క్షేమం గానీ సంక్షేమం గానీ పట్టింది ఎవరికి? సబ్సిడీలను ఘనంగా అందిస్తున్నామని ఢిల్లీలో ఉన్నవాళ్లు చెబుతుంటే, ఈ రాష్ట్రంలో రైతుకు మాత్రం బతుకే గగనంగా మారింది.

నా హయాంలో ఆశని రగిలించిన యువతరం.. ఉపాధి, ఉద్యోగం లేక ఈనాడు రోడ్డున పడింది. "అయ్యా.. మనవరాలి కోసం ఉన్న భూమిని తాకట్టుపెట్టాను. ఆమెను ఇంజనీరింగ్ చదివించేందుకు ఉన్నదంతా అమ్మేశాను. ఇంత చేసినా ఏమి మిగిలింది? బిడ్డ బాగానే చదివింది గానీ, ఉద్యోగమే లేదు. ఐదేళ్లుగా ప్రయత్నిస్తున్నా పలికిన నాథుడే లేడు'' అని ఆ ముసలవ్వ అన్న మాటలు ఎవరినైనా కదిలిస్తాయి..రాయి లాంటి ఈ సర్కారుని తప్ప..

ప్రజ ల వద్దకు కాంగ్రెస్ నాయకులు నేరుగా వెళితే 'చె య్యి' విరగ్గొట్టి పంపడం ఖాయమని తెలుగుదేశం పార్టీ అధినేత చంద్రబాబు వ్యాఖ్యానించారు. ఆ భయంతోనే సహకార సంఘాల ఎన్నికల్లో 'పరోక్ష' పద్ధతుల్లో గట్టెక్కిందని ధ్వజమెత్తారు. సీఎం కిరణ్‌కు ఒళ్లంతా అహమేనని, వైఎస్ దోపిడీని పాలనలో తు.చ.తప్పక కొనసాగిస్తున్నారని దుయ్యబట్టారు. గుంటూరు జిల్లా వేమూరు నియోజకవర్గం జం పని వద్ద ఆయన మంగళవారం పాదయాత్ర ప్రా రంభించారు.

చంపాడ సెంటర్, బూతుమల్లి మీదగా 6.8 కిలోమీటర్లు నడిచి, వేమూరు చేరుకున్నారు. అక్కడ ఉన్న స్టేషన్‌లోకి వెళ్లారు. డీఎస్ పీ, సీఐలు, ఎస్ఐలు, కానిస్టేబుళ్లను సమస్యలు అడిగి తెలుసుకొన్నారు. జీతాలెలా వస్తున్నాయి. .పీఆర్‌సీ అ మలు జరుగుతుందా? డ్యూటీలు ఎలా వేస్తున్నారు?.. అంటూ ఆరా తీశారు. మిలిటరీ క్యాంటీన్ వలే తమకూ ఉంటే బావుంటుందని వారు కోరగా, తాను అధికారంలోకి వచ్చిన వెంటనే దీనికి సంబంధించి చర్యలు తీసుకొంటానని హామీ ఇచ్చారు. అక్కడి నుంచి బయటకు వచ్చాక ప్రజలనుద్దేశించి మాట్లాడారు. ఈ సందర్భంగా కాంగ్రెస్ పార్టీపై, ముఖ్యమంత్రి కిరణ్‌పై విరుచుకుపడ్డారు.

"కిరణ్‌కు ఒళ్లంతా అహమే. ప్రజాసంక్షేమం గురించి ఆలోచించిన పాపాన పోడు. అంతా తెలుసన్నట్లుగా ఫోజులు కొడతారు. దేనికీ నేరుగా సమాధానం చెప్పకుండా డొంకతిరుగుడుగా మాట్లాడతారు. వైఎస్ ప్రారంభించిన దోపిడీని ప్రతి ఫైలులోనూ కొనసాగిస్తున్నారు'' అని మండిపడ్డారు. పార్టీ నుంచి వలస పోతున్న నేతలంతా ఆయారామ్... గయారామ్‌లని పేర్కొన్నారు. "వారంతా తొలుత తెలుగుదేశం పార్టీ తరపున గెలిచారు. ఇప్పుడు వాళ్లకు అమ్ముడుపోతున్నారు. ఇది చూస్తే చాలా బాధేస్తోంది. పార్టీ గుర్తుతో గెలిచి ఫిరాయిస్తే సభ్యత్వం రద్దు అవుతుంది. కాంగ్రెస్ పార్టీ ఆ అవకాశం లేకుండా చేస్తూ బరితెగించి పరోక్ష ఎన్నికలకు శ్రీకారం చుడుతోంది.

రేపటి రోజున స్థానిక సంస్థల ఎన్నికలు కూ డా అదే పద్ధతిన నిర్వహించాలని యోచిస్తోంది. మొండి'చెయ్యి'తో నేరుగా ప్రజల వద్దకు వెళితే విరగ్గొడతారని తెలిసి దొంగ ముసుగేసుకొని వస్తోంద''ని ధ్వజమెత్తారు. సహకార ఎన్నికల్లో జగన్ పార్టీ, టీఆర్ఎస్ గల్లంతు అయ్యాయని, టీడీపీ గెలిచే స్థానాల్లో స్టేలతో కాంగ్రెస్ అరాచకాలకు పాల్పడిందన్నారు. అందరూ కలిసి 'హస్తాన్ని' చితక్కొట్టి నామరూపాలు లేకుండా చేయాలని పిలుపునిచ్చారు. స్థానిక సంస్థల ఎన్నికలపై సుప్రీం కోర్టు తీర్పును తాను స్వాగతిస్తున్నానని, మైనార్టీలకు కూడా జనాభా దామాషా ప్రకారం రిజర్వేషన్లు పెట్టాలని కోరారు. 2009లో చిరంజీవి పార్టీ పెట్టి ఎన్నికలకు పోయి ఉండకపోతే టీడీపీదే గెలుపు అని చంద్రబాబు వ్యాఖ్యానించారు. వైసీపీపై దయ తలిస్తే జైలుకు వెళ్లడం ఖాయమని ఆయన హెచ్చరించారు. ఎన్‌టీఆర్ తర్వాత జనం గుండెలో కొంత స్థానం తనకు ఇవ్వాలని కోరారు.