తెనాలి నియోజకవర్గంలోని కొలకలూరులో వేదికపై ప్రసంగించి దిగుతుండగా మెట్లు కుప్పకూలిపోవడంతో ఆయన ముప్పును తప్పించుకోగలిగారు కాని కొత్తగా కుడికాలికి మడమ నొప్పి బాధ తలెత్తడంతో భరించలేక పాదయాత్రకు స్వల్ప విరామం తీసుకొన్నారు. అయినా పాదయాత్రను కొనసాగించి తీరుతానని ఆయన స్పష్టం చేశారు.

కొలకలూరు నుంచి గురువారం ఉదయం జిల్లాలో ఎనిమిదో రోజు పాదయాత్ర ప్రారంభించిన చంద్రబాబు ఎంతో ఉత్సాహంగా ముందుకు సాగారు. కొలకలూరు గ్రామంలో మహిళల హారతులు, దీవెనలు అందుకొంటూ వారి సమస్యలు తెలుసుకొంటూ వాటిపై స్పందిస్తూ నడిచారు. పార్టీ సీనియర్ నాయకుడు మత్తే రామయ్య ఇంటికి వెళ్లి ఆయన్ని పరామర్శించారు. అధైర్య పడవద్దని, పార్టీ అన్ని విధాలా ఆదుకొంటుందని భరోసా ఇచ్చి రూ. 25 వేల ఆర్థికసాయం చేశారు. అనంతరం రథం సెంటర్ వద్ద కొత్తగా ఏర్పాటు చేసిన ఎన్‌టీఆర్ విగ్రహాన్ని ఆవిష్కరించి ప్రజలనుద్దేశించి ప్రసంగించారు.

అక్కడి నుంచి 100 మీటర్ల దూరంలోనే ఉన్న మెయిన్ రోడ్డు కూడలికి చేరుకొన్నారు. అంతకు 10 నిమిషాల ముందే చంద్రబాబు సుదీర్ఘ ప్రసంగం చేయడం, మహిళలతో సమస్యలపై సంభాషించడంతో మెయిన్ రోడ్డు సెంటర్ వద్ద ప్రజలు, టీడీపీ కార్యకర్తలకు అభివాదం చేసి వెళ్లిపోతారని అంతా భావించారు. అయితే పార్టీ సీనియర్ నాయకుడు కొలకలూరి నాగేశ్వరరావు, ఆయన సతీమణి వసంత సభా వేదిక ఏర్పాటు చేశారు. అంబేద్కర్, జగజ్జీవన్‌రామ్, ఎన్‌టీఆర్ విగ్రహాలు ఉన్న కూడలి కావడం, నాగేశ్వరరావు పార్టీ సీనియర్ నాయకుడు కావడంతో ఆయన విజ్ఞాపనను కాదనలేకపోయారు. గుంటూరు జిల్లాలోకి ప్రవేశించినప్పటి నుంచి ్రపైవేటు వేదికలపై చంద్రబాబు ఎక్కకుండా జాగ్రత్త తీసుకొన్నారు. కొలకలూరులో మాత్రం పార్టీ నాయకులు, కార్యకర్తలు విజ్ఞాపనను తిరస్కరించలేక వేదికపైకి చేరుకొని మహనీయుల విగ్రహాలకు పూలమాలలు వేసి నివాళులర్పించారు. అంబేద్కర్, జగజ్జీవన్‌రామ్, ఎన్‌టీఆర్ చేసిన త్యాగాలను వివరించారు. సాగునీరు, స్థానిక సమస్యలపై స్పందించారు. అవినీతికి వ్యతిరేకంగా చైతన్యం రావాలంటూ ప్రజలకు సూచించారు.

చంద్రబాబు ప్రసంగం పూర్తి కావడంతో అప్పటివరకు వేదిక మెట్లపై కూర్చున్న పార్టీ జిల్లా నాయకులు ప్రత్తిపాటి పుల్లారావు, డాక్టర్ కోడెల శివప్రసాదరావు, నక్కా ఆనందబాబు, జేఆర్ పుష్పరాజ్ తదితరులు కిందికి దిగారు. చంద్రబాబు మెట్ల పైకి చేరుకోగానే ఒక్కసారిగా సెంట్రింగ్ చెక్కలతో నిర్మించిన స్టేజ్ మెట్లు కుప్పకూలిపోయాయి. ఏమి జరుగుతుందో గ్రహించేలోపే చంద్రబాబు అదుపు తప్పడంతో పక్కనే ఉన్న సెక్యూరిటీ సిబ్బంది ఆయన్ని పట్టుకొన్నారు. సంఘటనలో చంద్రబాబు పక్కనే ఉన్న మాజీ మంత్రి ఆలపాటి రాజేంద్రప్రసాద్ పక్కటెముకలు ఒరుసుకుపోయాయి. దాంతో ఆయన తీవ్ర నొప్పికి గురయ్యారు. ఇదే సంఘటనలో నాగేశ్వరరావు, ఆయన సతీమణి వసంత కూడా స్టేజ్ మీద నుంచి కింద పడిపోవడంతో వారికి గాయాలయ్యాయి.

చంద్రబాబు కుడికాలి మడమపై శరీరం బరువంతా పడటంతో ఆయన బాధకు గురయ్యారు. ఫిజియోథెరపిస్టు సూచన మేరకు ఆయన అక్కడి నుంచి అర కిలోమీటర్ దూరం నడిచాక నొప్పి పెరగడంతో చంద్రబాబు రోడ్డు పక్కనే కుర్చీలో కూర్చుండిపోయారు. ఆ సమయంలో చంద్రబాబు ముఖంలో నొప్పి బాధిస్తుండటం స్పష్టంగా కనిపించింది. ఆయన కళ్లు మూసుకొని నొప్పిని భరిస్తూ తనకేమి కాలేదని, పాదయాత్ర సాయంత్రం కొనసాగిస్తానని చెప్పారు. ఆ తర్వాత గుంటూరు, తెనాలి నుంచి వచ్చిన వైద్యుల బృందం పరిశీలించిన అనంతరం గురువారం వరకు పూర్తి విశ్రాంతి అవసరమని చంద్రబాబుకు చెప్పారు. అందుకు చంద్రబాబు అంగీకరించి కష్టం మీద మరో ఫర్లాంగు దూరం నడిచి విశ్రాంతి రథంలోకి వెళ్లిపోయారు.

ఉత్కంఠ..

జిల్లా నేతల పరామర్శ

చంద్రబాబు కుడికాలి మడమ నొప్పితో విశ్రాంతి తీసుకొంటున్నారన్న సమాచారంతో జిల్లా వ్యాప్తంగా ఉత్కంఠ నెలకొన్నది. పాదయాత్రకు రెండు, నుంచి నాలుగు రోజుల పాటు విరామం ఉండవచ్చని కాసేపు, ఎన్నికల కోడ్ ముగిసేవరకు నిలిపేయవచ్చని మరికాసేపు నాయకులు, కార్యకర్తలు చర్చించుకొన్నారు. మధ్యాహ్నం మూడు గంటల సమయం దాటిన తర్వాత పాదయాత్ర సమన్వయకర్త గరికపాటి మోహన్‌రావు, టీడీపీ జిల్లా నాయకులు చంద్రబాబుతో సమావేశమయ్యారు. అనంతరం బయటకు వచ్చి చంద్రబాబు ఆరోగ్య పరిస్థితిని గరికపాటి ప్రకటించారు. ఎవరూ ఆందోళన చెందాల్సిన అవసరం లేదని, వైద్యుల సూచన మేరకు గురువారం విరామం ప్రకటిస్తున్నట్లు తెలిపారు. ఉన్నతస్థాయి వైద్య బృందం పరిశీలించిన తర్వాత శుక్రవారం ఉదయం పాదయాత్ర కొనసాగింపు ప్రకటన చేస్తామన్నారు. చంద్రబాబు మాత్రం తాను పాదయాత్ర కొనసాగిస్తానని చెప్పారని వెల్లడించారు. కాసేపటికి విశ్రాంతి రథం నుంచి చంద్రబాబు బయటకు రావడంతో నాయకులు, కార్యకర్తలు ఆనందోత్సాహాలు వ్యక్తం చేశారు.

కృష్ణా పశ్చిమ డెల్టాకు ఈ ఏడాది అక్టోబర్ నెలాఖరు వరకు ప్రభుత్వం సక్రమంగా సాగునీటిని విడుదల చేయలేదు. వర్షాలతో ప్రకాశం బ్యారేజ్ వద్దకు వచ్చిన వరద నీటినే విడుదల చేసింది. దాని వలన పంటకు నీరు అవసరమైన సమయంలో నీళ్లు లేక, అవసరం లేనప్పుడు నీళ్లు వచ్చి సమస్యలు తలెత్తాయి.

దాంతో ఖరీఫ్‌లో ఇంచుమించు 30 శాతం పైగా రైతులు వరి పంట వేయలేకపోయారు. ఈ నేపథ్యంలో రబీలోనైనా నష్టాన్ని పూడ్చుకొనేందుకు మొక్కజొన్న, పెసలు వంటి ఆరుతడి పంటలు వేశారు. అయితే జనవరి నుంచి నీటిని నిలిపేయడంతో పంటలు ఎండిపోయే పరిస్థితి ఏర్పడింది.

మరోవైపు సాగర్ ఆయకట్టుకు ప్రభుత్వం ఈ ఏడాది ఖరీఫ్‌కు నీళ్లు ఇవ్వలేదు. రబీలో ఆరుతడి పంటలకు నీరు ఇస్తామని హామీ ఇచ్చింది. అయితే రైతులకు సరిపడా ఆరుతడి పంటలకు నీళ్లు ఇవ్వకపోవడంతో చాలా వరకు దెబ్బతిన్నాయి. ప్రస్తుతం కొన్ని మండలాల్లో మిర్చికి నీరు అవసరం. అయితే జిల్లా యంత్రాంగం సాగునీరు ఇచ్చేది లేదని ఇప్పటికే ప్రకటన చేసింది.

ఈ నేపథ్యంలో రైతులు చంద్రబాబుకు పాదయాత్రలో నివేదించడంతో ఆయన టీడీపీ జిల్లా నేతలతో సమావేశమై చర్చించారు. ప్రభుత్వానికి మూడు రోజుల గడువు విధించారు. అప్పటిలోపు సీఎం స్పందించి నీళ్లు విడుదల చేయకపోతే సోమవారం ఉదయం తాను పాదయాత్రలో ఎక్కడ ఉంటే అక్కడ మహాధర్నా చేపట్టాలన్న నిర్ణయాన్ని చంద్రబాబు ప్రకటించారు.

వస్తున్నా మీ కోసం పాదయాత్రలో భాగంగా గురువారం కొలకలూరు గ్రామంలో పర్యటించిన చంద్రబాబుకు మహిళలు అడుగడుగునా నీరాజనం పలికారు. బాబుకు ఎదురేగి హారతులిచ్చి, నుదుట కుంకుమ దిద్ది స్వాగతించారు. తెలుగు మహిళల అభిమానం, ఆప్యాయతలతో ఆయన నూతనోత్సాహంతో ముందుకు సాగారు. మా బంగారు చెల్లెమ్మలు, మా బంగారు అక్కయ్యలు అని సంబోధిస్తూ యాత్రను కొనసాగించారు. చిన్నారులను ఆప్యాయంగా ఎత్తుకుని ముద్దాడారు. వృద్ధులను ఆలింగనం చేసుకుంటూ యోగక్షేమాలు అడిగి తెలుసుకున్నారు.

కాంగ్రెస్ తల్లిపాము..వైఎస్సార్ కాంగ్రెస్ పిల్లపాము

కాంగ్రెస్ తల్లిపామైతే.. వైఎస్సార్ కాంగ్రెస్ పిల్లపాము వంటిదని .. పిల్లపాముకు ఎక్కువ విషం ఉంటుందని కాటేస్తే కోలుకోలేరని అన్నారు. ఈ రెండు పార్టీలు ప్రజలను ఏమార్చాలని చూస్తున్నారని,ఈ సారి జా గ్రత్త వహించక పోతే శాశ్వతంగా ఇబ్బందులు పడతారాన్నరు. కొందరు నేతలు నేరుగా చెంచల్‌గూడా జైలుకు వెళ్లి అక్కడ కొబ్బరికాయలు కొట్టి మరీ వైఎస్సార్ సీపీలో చేరుతున్నారని, ప్రజలు ఏమనుకుంటారో అన్ని సిగ్గు కూడా వీరికి లేదన్నారు. పేదరికం ఎక్కడుంటే తెలుగుదేశం అక్కడే ఉంటుందని, ఎన్నికల రోజున నన్ను గుర్తుంచుకోండి.. ఐదు సంవత్సరాలు మీకు సేవకుడిలా ఉంటానని హామీ ఇచ్చారు.

కుంభకోణాలకు మారుపేరు కాంగ్రెస్

పూర్వం భోఫోర్స్ కుంభకోణంతో దేశంలో అవినీతి విలయతాండవం చేస్తే కాంగ్రెస్ పాలనలో కుంభకోణాలకు మారుపేరుగా నిలిచిందని చం ద్రబాబు తీవ్రంగా విరుచుకుపడ్డారు. దేశరక్షణకు ముఖ్యనేతల ప్రయాణానికి వినియోగించే హెలికాప్టర్ల కొనుగోలులో కోట్లాది రూపాయలు దోచుకోవడం సిగ్గుచేటన్నారు. కుంభకోణాలతో దేశ సంవదను దోచుకుంటున్న కాంగ్రెస్ దొంగలను ఏం చేయాలన్నారు. విలాసవంతమైన జీవితానికి అలవాటు పడిన కాంగ్రెస్ నాయకులు డబ్బు సంపాదన కోసం విలువలకు తిలోదకాలిస్తున్నారని ఆరోపించారు.

రామయ్యకు పరామర్శ

కొలకలూరు గ్రామానికి చెందిన తెలుగుదేశం పార్టీ సీనియర్ నాయకుడు ముత్తే రామయ్యను చం ద్రబాబు పరామర్శించారు. గతకొద్ది రోజులుగా అనారోగ్యంతో బాధ పడుతున్న రామయ్యను ఆయన నివాసంలో కలిసి ఆరోగ్య పరిస్థితిని అడిగి తెలుసుకున్నారు. జాగ్రత్తగా మందులు వాడాలని, దిగులు పడవద్దని సూచించారు. పార్టీ తరపున రూ.25వేలు ఆర్థిక సాయం ప్రకటించారు. పాదయాత్రలో చం ద్రబాబుతో పాటు జిల్లా పార్టీ అధ్యక్షుడు ప్రత్తిపాటి పుల్లారావు, నర్సరావుపేట ఎంపీ మోదుగుల వేణుగోపాలరెడ్డి, మాజీ మంత్రులు కోడెల శివ ప్రసాద్, ఆలపాటి రాజేంద్ర ప్రసాద్, జెఆర్ పుష్పరాజ్, ఎమ్మెల్యే నక్కా ఆనందబాబు, ఎమ్మెల్సీ నన్నపనేని రాజకుమారి, తెనాలి మున్సిపల్ మాజీ చైర్మన్ యడ్ల గంగాధరరావు, తెనాలి పట్టణ అధ్యక్షుడు మహ్మద్ ఖుద్దూస్, తెలుగుయువత పట్టణ అధ్యక్షుడు నాగభైరవ రత్నబాబు, పలువురు పార్టీ నాయకులు, కార్యకర్తలు పాల్గొన్నారు.

కిరణ్ కిరికిరి ముఖ్యమంత్రి

రాష్ట్రంలో ఇంతటి పనికిమాలిన ముఖ్యమంత్రిని ఎన్నడూ చూడలేదని, కిరణ్‌ను కిరికిరి ముఖ్యమంత్రిగా అభివర్ణిస్తూ ఆయన ఏ పని చేయలేడని దుయ్యబట్టారు. రైతుల ఇబ్బందులు పట్టించుకోని ఆయన ముఖ్యమంత్రి పదవికి అర్హుడు కాడని ఎద్దేవా చేశారు. అక్రమంగా సంపాదించిన కోట్లాది రూపాయలు దాచుకునేందుకే కాం గ్రెస్ పార్టీ తల్లి, పిల్ల కాంగ్రెస్‌గా విడిపోయిందని విమర్శించారు. తప్పుడు పనులు చేసి జైలుకు వెళ్లారు తప్ప త్యాగాలు చేయలేదన్న సంగతి ని ప్రజలు గుర్తించాలని కోరారు. ప్రజాధనం దోచుకుంటే శిక్షలు పడాలా..లేదా ప్రజలే ఆలోచించాలన్నారు. లేదని కనికరం చూపిస్తే భావితరాలకు భవిష్యత్ ఉండదని సూచించారు.

ఈ వయసులో ఈ కష్టం మీ కోసమే

కాళ్లు నెప్పులు పుడుతున్నాయి..మొరాయిస్తున్నాయి..63 ఏళ్ల వయస్సులో పడుతున్న ఈ కష్టం ప్రజల కోసమేనంటూ చంద్రబాబు పేర్కొన్నారు. రాష్ట్రాన్ని తొమ్మిదేళ్లు పాలించానని, ప్రతిపక్ష నేతగా ఉన్నానని ప్రజల కష్టాలు చూడలేక పాద యాత్ర చేపట్టానని చెప్పారు. భగవంతుడు శక్తి ఇచ్చినంత కాలం పాదయా త్ర కొనసాగుతుందని, ఇప్పటి వరకు 2000 కి.మీ సాగిన పాదయాత్ర మరెవరూ చేయలేకపోయారన్నారు. రాత్రింబవళ్లు పనిచేస్తూ .. ప్రజల జీవితాల్లో వెలుగు నింపుతా .. నేను చెప్పిన మాటలు ఒక్కసారి ఆలోచించండి..అందరితో చర్చించండి..ఇప్పటికైనా నన్ను నమ్మకపోతే బాధపడను.. నచ్చితే నిండు మనసుతో ఆశీర్వదించండి అంటూ చంద్రబాబు ఉద్వేగంగా ప్రసంగించారు.

ఫోన్‌కు రాని నీళ్లు

ఎస్ఎంఎస్‌కు మాత్రం మద్యం

రా ష్ట్రంలో పరిస్థితులను దృష్టిలో పెట్టుకుని ఫోన్ చేసినా మంచినీరు దొరకదని, ఎస్ఎంఎస్ చేస్తే మాత్రం ఫుల్‌గా మద్యం అందుతుందని వ్యంగ్యాస్త్రాలు సంధించారు. మద్యం ఫుల్..నీళ్లు నిల్ అన్న పరిస్థితులు రా ష్ట్రంలో నెలకొన్నాయని, తెలుగుదేశం పార్టీ అధికారంలోకి వస్తే బెల్టుషాపులు తొలగించి ప్రజల ఆరోగ్యాన్ని పరిరక్షిస్తానని హామీ ఇచ్చారు.

ఏడాది ఓపిక పట్టండి

రాష్ట్రంలో రైతులు, రైతు కూలీలు, పేదలు, మహిళలు ఎన్నో ఇబ్బందులు పడుతున్నారని, ఏడాది ఓపిక పడితే ఈ కష్టాలన్నీ గట్టెక్కిస్తానని చం ద్రబాబు భరోసా ఇచ్చారు. బాలికా సంరక్షణకు ప్రత్యేక పథకాన్ని ప్రవేశపెడతామన్నారు.

రెండోపంటకు నీరివ్వాల్సిందే

అతివృష్టి, అనావృష్టి పరిస్థితులతో కునారిల్లుతున్న రైతనన్నను ఆదుకునేందుకు రెండో పంటకు నీరివ్వాల్సిందేనని చంద్రబాబు డిమాండ్ చేశారు. డెల్టాలో మొక్కజొన్నకు నీరందక ఎండిపోతున్న వైనాన్ని తెలుసుకున్న ఆయన రైతులకు నీరు ఇప్పించే వరకు పోరాడతామన్నారు. వెంటనే గవర్నర్‌కు లేఖ పంపుతామని, అవసరమైతే రాస్తారోకోలు చేసి ఉద్యమిస్తామని హెచ్చరించారు. కృష్ణా డెల్టాకు రెండో పంటకి నీళ్లిచ్చింది తెలుగుదేశం పార్టీయేనని ఆ దిశగా కాం గ్రెస్ పార్టీ ఎప్పుడూ ఆలోచించలేదన్నారు. ఆధునికీకరణలో అవినీతి విచ్చలవిడిగా పెరిగిపోయిందని విమర్శించారు.

గత ఎన్నికల్లో ప్రజలు చేసిన తప్పుకు ఈ దుస్థితి ఏర్పడిందని తెలిపారు. మరోమారు తాము అధికారంలోకి వస్తామని తప్పక ప్రజల కష్టాలు తీరుతాయని తెలిపారు. ఆయా గ్రామాల సమస్యలను పరిష్కరిస్తామని, అధికారంలోకి వచ్చాక మొదటి ప్రాధాన్యం వాటికే ఇస్తామని చంద్రబాబు తెలిపారు. పలు చోట్ల మహిళలు హారతులు పట్టారు. చంద్రబాబు పాదయాత్రలో ఆద్యంతం మహిళలు ముందుండి నడిపించారు. అనేక చోట్ల మహిళలు చంద్రబాబుతో ముచ్చటించి తమ సమస్యలు విన్నవించారు. మహిళల సంక్షేమానికి టీడీపీ పెద్ద పీట వేస్తుందని తెలిపారు. కార్యక్రమంలో పొన్నూరు ఎమ్మెల్యే ధూళిపాళ్ల నరేంద్రకుమార్, జిల్లా టిడిపి ప్రధాన కార్యదర్శి వెలినేని శ్రీనివాసరావు (బాబు), మాజీ సర్పంచ్‌లు పెద్ది అప్పాజి, భూషబాబు, దేశం నాయకులు పెద్ది సాంబశివరావు, చెన్నుపాటి సాంబశివరావు పాల్గొన్నారు.