ఇక్కడి మిర్చి రైతులు తమను ఆదుకోమని అడుగుతున్నారంటే చేత కాని అసమర్థ ప్రభుత్వం రైతుల నడ్డి ఏ విధంగా విరిచిందో స్పష్టమౌతోందన్నారు. వెనకబడిన వర్గాలకు రూ. 10 వేల కోట్ల బడ్జెట్ కేటాయించి వారిని పైకి తీసుకొచ్చే బాధ్యత తీసుకొంటానని హామీ ఇచ్చారు. చేనేత కార్మికులను ఆదుకొనేందుకు రూ. వెయ్యి కోట్లు కేటాయిస్తానన్నారు. గతంలో ఎస్‌సీ వర్గీకరణ అమలు చేసి 24 వేల మందికి ఉద్యోగాలు కల్పించామని, కాంగ్రెస్ పార్టీ 44 ఏళ్లలో కేవలం 14 వేల ఉద్యోగాలే ఇచ్చిందన్నారు. మరలా ఎస్‌సీ వర్గీకరణ అమలు చేసి ఉద్యోగాలు కల్పిస్తామన్నారు.చంద్రబాబు తన ప్రసంగాల ద్వారా మహిళల నాడి పట్టుకొనే ప్రయత్నం చేశారు. తాను డ్వాక్రా సంఘాలు పెట్టి పొదుపు ఉద్యమం నేర్పించి న్యాయంగా డబ్బులు సంపాదించే మార్గం చూపించానని, కాంగ్రెస్ వాళ్లు మాత్రం డబ్బు పొగొట్టుకొనే దారి చూపించారని ఎద్దేవా చేశారు. ఆడపిల్లలపై వివక్ష పోగొట్టేందుకు నాడు అమ్మాయి పుడితే రూ. ఐదు వేలు బ్యాంకులో డిపాజిట్టు చేయించానని గుర్తు చేస్తూ నాడు ఇంటింటికి తలుపు తట్టి 35 లక్షల గ్యాస్ కనెక్షన్లు ఇప్పించానన్నారు. తన పాలనలో ఏరోజూ గ్యాస్ ధరను పెరగనీయలేదని, నేడు రూ. 475 అయిందని, అది కూడా సంవత్సరానికి ఆరు సిలిండర్లు మాత్రమే ఇస్తాంటున్నారని చెప్పారు. మున్ముందు ఆధార్‌తో లింకు పెట్టి గ్యాస్ వినియోగదారులను ఇబ్బందులు పాలు చేసే ప్రయత్నం చేస్తున్నారని ఆగ్రహం వ్యక్తం చేశారు. ప్రజలు మరలా కట్టెల పొయ్యిలు వెలిగించే పరిస్థితికి ఈ కాంగ్రెస్ ప్రభుత్వం తీసుకొచ్చిందన్నారు. కేంద్రం రూ. 400 పెన్షన్ ఇస్తే వీళ్లు రూ. 200 మాత్రమే ఇస్తూ మిగతాది కొట్టేస్తున్నారని ఆరోపించారు.

వ్యవసాయాధారిత

పరిశ్రమలు తీసుకొస్తా

గుంటూరు, విజయవాడ మధ్యన అవుటర్ రింగు రోడ్డు ఏర్పాటు చేసి వ్యవసాయాధారిత పరిశ్రమలు తీసుకొస్తానని చంద్రబాబు హామీ ఇచ్చారు. అలానే ఆటోమొబైల్ పరిశ్రమ నెలకొల్పుతామన్నారు. విజయవాడ-గుంటూరును కలిపేసి మహానగరంగా అభివృద్ధి చేసి ఇక్కడ చదువుకొన్న పిల్లకలు స్థానికంగానే ఉద్యోగాలు వచ్చేలా బాధ్యత తీసుకొంటానని చెప్పారు.

అన్ని ఇళ్లకు కృష్ణాజలాలు

కృష్ణానది చెంతనే ఉన్నా గుంటూరు జిల్లా తాగునీటి సమస్యను ఎదుర్కొంటోంది. టీడీపీ అధికారంలోకి రాగానే ప్రతీ ఇంట్లోకి కృష్ణా జలాలు తీసుకొచ్చి తాగునీటి సమస్య లేకుండా చేస్తానని చంద్రబాబు హామీఇచ్చారు.

చినకాకాని వద్ద ఫ్లైవోవర్

చినకాకాని గ్రామం వద్ద ఎన్‌హెచ్-5పై ఫ్లైవోవర్ లేక సబ్ వే నిర్మాణానికి చర్యలు తీసుకొంటానని చెప్పారు. దీని వలన ప్రజలు రోడ్డుకు అటువైపున ఉన్న పొలాల్లోకి వెళ్లి వ్యవసాయం చేసుకొనేందుకు సమస్య తొలగిపోతుందన్నారు. చంద్రబాబు వెంట పాదయాత్రలో టీడీపీ జిల్లా అధ్యక్షుడు ప్రత్తిపాటి పుల్లారావు, మాజీ మంత్రి డాక్టర్ కోడెల శివప్రసాదరావు, నరసరావుపేట ఎంపీ మోదుగుల వేణుగోపాల్‌రెడ్డి, ఎమ్మెల్సీ నన్నపనేని రాజకుమారి, ఎమ్మెల్యేలు ధూళిపాళ్ల నరేంద్రకుమార్, యరపతినేని శ్రీనివాసరావు, కొమ్మాలపాటి శ్రీధర్, జీ వీ ఆంజనేయులు, నక్కా ఆనందబాబు, మాజీ మంత్రులు ఆలపాటి రాజేంద్రప్రసాద్, జే ఆర్ పుష్పరాజ్, డాక్టర్ శనక్కాయల అరుణ, పార్టీ జిల్లా నాయకులు మన్నవ సుబ్బారావు, బోనబోయిన శ్రీనివాస్ యాదవ్, ముమ్మనేని వెంకట సుబ్బయ్య, షాలిని, వైవీ ఆంజనేయులు తదితరులు పాల్గొన్నారు.

కాజలో

టీడీపీ క్రిస్టియన్ సెల్ ఏర్పాటు

మంగళగిరి రూరల్: ఒక రాజకీయ పార్టీ అన్ని మతాలను గౌరవించాలని మాజీ ముఖ్యమంత్రి, టీడీపీ అధ్యక్షులు నారా చంద్రబాబునాయడు చెప్పారు. వస్తున్నా.. మీకోసం పాదయాత్రలో భాగంగా కాజ గ్రామంలో ఆయన ప్రసంగించారు. కాజలో టీడీపీ రాష్ట్ర క్రిస్టియన్ సెల్ ఏర్పాటైన సందర్భంగా జరిగిన సభలో ఆయన మాట్లాడారు. పేదరికం ఎక్కడ వుంటే అక్కడ న్యాయం జరగాలని అన్నారు. పేద వాడికి సహాయ పడాలనే విషయం బైబిల్‌లో స్పష్టంగా చెప్పారన్నారు. భారతదేశంలో వివిధ మతా లు, ప్రాంతాలు వున్నాయని, మనందర్ని దేవుడు పుట్టించాడని తెలిపారు. పలానా కులంలో పుట్టాలనేది ఎవరి చేతుల్లో లేదన్నారు. మతమనేది ఒక విశ్వాసం. ఒక రాజకీయ పార్టీగా అన్ని మతాలను గౌరవించాలి. భారతదేశం మత సామరశ్య దేశమని, వివిధ మతాలు, ప్రాంతాలు, కులాలు వున్నాయన్నారు. క్రిస్టియన్స్ యువతకు, మహిళలకు స్వయం ఉపాధి పథకాల ద్వారా ఆర్థిక పరిపుష్టి లభించే చర్యలు చేపట్టాలన్నారు. నూతన కమిటీ ప్రతి క్రిస్టియన్ హృదయాల్లోకి చొచ్చుకుపోవాలని సూచించారు. రాష్ట్ర క్రిస్టియన్ సెల్ ఏర్పాటై కాజ గ్రామం చరిత్రలో నిలిచిపోతుందన్నారు. క్రిస్టియన్స్‌కు నూతన అధ్యయనం ప్రారంభించేందుకు వీలుగా నిర్దిష్టమైన విధానాలను రూపొందించాలని తెలిపారు. ఈ కార్యక్రమంలో మాజీమంత్రులు జేఆర్.పుష్పరాజ్, పెద్దిరెడ్డి, టీడీపీ క్రిస్టియన్ సెల్ రాష్ట్ర అధ్యక్షుడు డేవిడ్ శాంతరాజు, జనరల్ సెక్రెటరీ జాన్ వెస్లీ, ఉపాధ్యక్షుడు పీఎండీ.వరప్రసాద్, సెక్రెటరీలు హేలెన్‌బాబు, రాజ్‌కుమార్ చిట్టి, పాస్టర్లు, బిషప్‌లు, పలువురు టీడీపీ నాయకులు పాల్గొన్నారు.

రెండో రోజు పాదయాత్రలో చంద్రబాబుకు జాతీయ రహదారిపై పనిచేస్తున్న కార్మికులతో, దారి వెంట ఉన్న వికలాంగులతో మాట్లాడారు. చినకాకాని సెంటర్‌కు చేరేసరికి గ్రామస్తులు డప్పు వాయిద్యాల నడుమ గజమాలతో చంద్రబాబును గ్రామంలో కి ఆహ్వానించారు. జాతీయ రహదారి నుంచి ఊరు పొడవునా పూల వర్షాలు కురిపించారు. స్కూలు చిన్నారుల కేరింతలతో చంద్రబాబుకు అభివాదం తెలిపారు. గ్రామంలోని కిరా ణా దుకాణదారులతో మాట్లాడుతూ ముందుకు సాగారు. చినకాకానిలో ఏర్పాటుచేసిన ఎన్టీ ఆర్ విగ్రహానికి చంద్రబాబు పూలమాల వేసి ప్రసంగించారు. అనంతరం గ్రామస్తులు, కొంతమంది కార్యకర్తలు కృష్ణుని విగ్రహాన్ని, గొర్రెపిల్ల, కోనంకి గణేష్ ఈము పక్షి గుడ్డును చంద్రబాబుకు బహూకరించారు. పాదయాత్రను కొనసాగిస్తూ మార్గమధ్యలో గౌరుబోయిన కృష్ణారావు కూల్‌డ్రింకు షాపులోకి వెళ్లి విశేషాలను అడిగి తెలుసుకున్నారు. మరో ఇంటికివెళ్లి మహిళను అడిగి సమస్యలు తెలుసుకున్నారు. ఎవ్వరూ లేకుండా ఒంటరిగా వుంటున్న 90 ఏళ్ల చింకా వెంకటరత్నం అనే వృద్ధురాలి వద్దకు వెళ్లి యోగక్షేమాలను తెలుసుకుని 4వేల ఆర్థికసాయం అందజేశారు. హాయ్‌లాండ్ ఎదురుగావున్న కొత్తూరులో మరో ఎన్టీఆర్ విగ్రహాన్ని ఆవిష్కరించారు. హైదరాబాద్ నుండి వచ్చిన మాజీ మంత్రి తలసాని శ్రీనివాస యాదవ్ చంద్రబాబును కలిశారు.

చినకాకాని నుంచి బయలుదేరి కొత్తూరుకు చేరేసరికి మహిళలు పెద్ద ఎత్తున మంగళహారతులు ఇచ్చి, తిలకం దిద్ధి ఘన స్వాగతం పలికారు. ముస్లిం మహిళలతో చంద్రబాబు మాట్లాడి వారి సమస్యలు తెలుసుకున్నారు. అ నంతరం అక్కడ ఏర్పాటుచేసిన ఎన్టీ ఆర్ విగ్రహాన్ని ఆవిష్కరించి ప్రసంగించారు. మధ్యాహ్నం 2.15 గంటలకు చినకాకా ని చివరలో జాతీయ రహదారి పక్కన భోజ న విరామం తీసుకున్నారు. సాయం త్రం 4.30కు పాదయాత్ర కొనసాగించారు. జాతీయ రహదారి వెంట విజయవాడకు బస్సులో వెళ్తున్న ప్రయాణికులు చంద్రబాబుకు విజయసంకేత అభివాదాన్ని తెలిపారు. దారి పొడవునా బాబును చూడటానికి వచ్చిన ప్రతి ఒక్కరికి అభివాదం చేస్తూ ముందుకు కదిలారు. కాజ దళితవాడకు రావాలని ఎమ్మార్పీ ఎస్ కార్యకర్తలు రోడ్డుపై బైఠాయించి, పట్టుబట్టి తమ కాలనీకి ఆహ్వానించారు. కాలనీలో బాబూ జగజ్జీవనరామ్ విగ్రహానికి పూలమాలలు వేశారు. కాజా గ్రామంలో జెండా ఆవిష్కరించి కాసేపు ప్రసంగించారు. గ్రామమంతా మైకులహోరులతో పండుగ వాతావరణం నెలకొంది. దారి పొడవునా పూల జల్లులతో చంద్రబాబు ముందుకు సాగారు. కాజ గ్రామ సెంటర్‌లో చుట్టూ భవనాలపై కిక్కిరిసిన మహిళల మధ్య చంద్రబాబు ఎన్టీ ఆర్ విగ్రహాన్ని ఆవిష్కరించి ప్రసంగించారు. ఎమ్మార్పీఎస్ రాష్ట్ర అధ్యక్షులు మందకృష్ణ మాదిగ బాబును కలిసి పాదయాత్రలో పాల్గొన్నారు. అనంతరం కాజ గ్రామ శివారులో టీడీపీ క్రిస్టియన్ సెల్ ఏర్పాటు చేసిన సమావేశంలో ఎమ్మెల్సీ నన్నపనేని రాజకుమారి క్రీస్తును కొనియాడుతూ ప్రార్ధన గీతం ఆలపించారు. సాయంత్రం 7 గంటల ప్రాంతంలోకాజ నుంచి నంబూరు వైపు పాదయాత్రను కొనసాగించారు.

చంద్రబాబు తన పాదయాత్రలో గురువారం మంగళగిరి మండలంలోని చినకాకాని, కాజ గ్రామాలను సందర్శించారు. ఈ సందర్భంగా పలువురు గ్రామస్తులను ఆయన పలకరించి సమస్యలను సావధానంగా విని తనదైన శైలిలో స్పందించారు. ఓ చోట దర్జీబాబుగా, మరోచోట దయగల బాబుగా, మరోచోట బొండాం తాగి పాదయాత్ర కొనసాగించారు. చినకాకానిలో పాదయాత్ర చేస్తుండగా ఓ చోట టైలరింగ్ చేస్తున్న మహిళను గమనించిన బాబు కొద్దిసేపు మిషన్ కుట్టి సమస్యలు అడిగి తెలుసుకున్నారు. అక్కడి నుంచి కొద్దిదూరం వెళ్లిన అనంతరం పాకలో ఒంటరిగా వుంటున్న 90 ఏళ్ల వృద్ధురాల్ని పలకరించి యోగక్షేమాలు విచారించి రూ.4 వేల ఆర్థికసాయాన్ని అందించి దయగల బాబుగా మన్ననలు పొందారు. అనంతరం కాజ గ్రామం వెళుతూ మార్గ మధ్యంలో కొబ్బరిబొండాం తాగుతూ పాదయాత్ర కొనసాగించారు.

చినకాకాని గ్రామానికి 127 ఇళ్లు మంజూరు చేశారని, వాటిల్లో సగం కాంగ్రెస్ దొంగలు కొట్టేశారని ఆరోపించారు. న్యాయబద్ధంగా ఇళ్లు నిర్మించుకొన్న వారికి బిల్లులు చెల్లించకుండా ఇబ్బంది పెడుతున్నారన్నారు. చివరికి పంచాయితీ ఆదాయం కూడా తినేసే పరిస్థితికి వచ్చారని చెప్పారు. నాడు ఎన్‌హెచ్-5ను తానే నిర్మించానని, దాంతో భూముల ధరలు పెరిగాయన్నారు. అంతేకాకుండా గ్రామస్థుల పిల్లలు ఉన్నత చదువులు అభ్యసించి విదేశాలకు, బెంగుళూరు, హైదరాబాద్ వెళ్లి ఉద్యోగాలు చేస్తున్నారని చెప్పారు. అయితే నేడు ఉద్యోగాలు లేకుండా చేసి, వ్యవసాయాన్ని ఈ కాంగ్రెస్ ప్రభుత్వం భారంగా మార్చేసిందన్నారు. రైతులను అన్ని విధాలుగా కాంగ్రెస్ నాశనం చేసిన నేపథ్యంలో వారు బ్యాంకుల్లో చేసిన అప్పులన్నింటిని మాఫీ చేసేందుకు తాను రుణమాఫీ హామీ ఇచ్చానన్నారు. అధికారంలోకి రాగానే తొలి సంతకం రుణమాఫీ పైనే ఉంటుందని స్పష్టం చేశారు.