ముసలిపాడులో ప్రసంగించిన అనంతరం క్రాప అడ్డరోడ్డు వద్ద స్థానిక ప్రజలతో చంద్రబాబు ముఖాముఖి మాట్లాడారు. కొల్లూరు శివారుకు చేరుకునే సరికి వేమూరు ఎమ్మెల్యే నక్కా ఆనందబాబు ఆధ్వర్యంలో మాజీ ఎంపీపీ మైనేని మురళీకృష్ణ వేలాది మంది కార్యకర్తలతో చంద్రబాబుకు స్వాగతం పలికారు. కనకతప్పెట్లు, విచిత్ర వేషధారణలు, బాణాసంచ పేలుళ్ల మధ్య కొల్లూరులో చంద్రబాబు పాదయాత్ర కొనసాగింది. రోడ్డుకిరువైపులా కాన్వాయ్ వెంట వేలాది మంది ప్రజలు కదంతొక్కారు. మేడల మీద నుంచి చంద్రబాబుకు అభివాదం చేస్తూ పరవశించిపోయారు. చంద్రబాబు రాక నేపథ్యంలో కొల్లూరు అంతటా భారీ ఫ్లెక్సీలు, తోరణాలతో పసుపు పరవళ్లు తొక్కించారు. కొల్లూరులో జరిగిన బహిరంగసభలో చంద్రబాబు ప్రసంగిస్తూ మీరు చూపించిన అభిమానం జీవితంలో మరిచిపోలేనిదని అన్నారు.

హైదరాబాద్ సంఘటన నేపథ్యంలో ప్రసంగించాలా వద్దా అని సంశయించారు. ఆ తర్వాత సమస్యలపై చర్చించుకుందామని ప్రసంగాన్ని కొనసాగించారు. అయితే గంటల తరబడి వేచి వున్న ప్రజలను చూసి కొద్దిసేపు ఉపన్యసించారు. 1994లో రాష్ట్ర ఆదాయం 8 వేల కోట్లు ఉంటే తాను చేసిన సంస్కరణల కారణంగా రూ.లక్షా 50 వేల కోట్లకు చేరుకుందని, ఆ డబ్బులు కాంగ్రెస్ దొంగలు దోచుకోటానికే సరిపోతుందని ధ్వజమెత్తారు. పేదల అభివృద్ధి, సంక్షేమం చూడాల్సిన వారు జలయజ్ఞం పేరుతో 30 వేల కోట్లు దోచారని ఆరోపించారు. పల్లెల్లో ఏ పనులు జరిగినా కాంగ్రెస్ దొంగలే బిల్లులు చేసుకుంటున్నారని తీవ్ర స్థాయిలో మండిపడ్డారు. అవినీతిని సమాజంలో సర్వ సాధారణం చేయటానికి ప్రయత్నిస్తున్నారని ఆక్షేపించారు.

కరువు, ప్రకృతి విపత్తులు వచ్చిన సందర్భాల్లో రైతులకు పంట పెట్టుబడులపై భరోసా ఇవ్వమని స్వామినాథన్ కమిషన్ సిఫార్సు చేసిందని, అయితే దీనిని కాంగ్రెస్ ప్రభుత్వం తుంగలోకి తొక్కింది. మేము అధికారంలోకి వస్తే వ్యవసాయం లాభసాటి చేసే వరకు రైతులకు అండగా ఉంటానని చంద్రబాబు వాగ్ధానం చేశారు. గ్రామాలకు 24 గంటలు, వ్యవసాయానికి 9 గంటలు కరెంటు ఇచ్చితీరుతానన్నారు. 'రైతులు ఎదుర్కొంటున్న కష్టలు చూస్తుంటే ఆవేదన, ఆగ్రహం, ఆవేశం వస్తుందని, అదే సమయంలో సభ్యత అడ్డువస్తుందన్నారు.

ఏప్రిల్ ఒకటి నుంచి కరెంటు బాంబు వైఎస్ చనిపోకముందు చేసిన అప్పుల కారణంగా ఏప్రిల్ ఒకటి నుంచి ప్రజలపై మరో కరెంటు బాంబు పడబోతుందని చంద్రబాబు పేర్కొన్నారు. రాష్ట్ర వ్యాప్తంగా విద్యుత్ సర్‌చార్జ్‌పై విచారణ చేస్తున్నారని, ఏప్రిల్ ఒకటి నుంచి రూ.13 వేల కోట్ల భారాన్ని ప్రజలపై మోపబోతున్నారని చెప్పారు. ఇదే విధంగా మరో మూడు వేల కోట్లు బాధితులపై కోర్టుల్లో విచారణ జరుగుతుందన్నారు. ఈ విధంగా మొత్తం రూ.32 వేల కోట్ల భారాన్ని ఒక్క విద్యుత్ చార్జీల రూపంలోనే ఈ కాంగ్రెస్ ప్రభుత్వం ప్రజలపై మోపిందని ఆగ్రహం వ్యక్తం చేశారు. ఇలా పలుచోట్ల ప్రసంగించిన అనంతరం చంద్రబాబు దోనెపూడికి చేరుకుని రాత్రికి బస చేశారు.

చంద్రబాబు వెంట టీడీపీ జిల్లా అధ్యక్షుడు ప్రత్తిపాటి పుల్లారావు, ఎమ్మెల్యేలు ధూళిపాళ్ల నరేంద్రకుమార్, కొమ్మాలపాటి శ్రీధర్, జీవీ ఆంజనేయులు, నక్కా ఆనందబాబు, ఎమ్మెల్సీ నన్నపనేని రాజకుమారి, మాజీ మంత్రి జేఆర్ పుష్పరాజ్, టీడీపీ జిల్లా నాయకులు మన్నవ సుబ్బారావు, వేములపల్లి శ్రీరాంప్రసాద్, కోవెలమూడి రవీంద్ర, ముత్తినేని రాజేష్, రమాశాంతాదేవి, మానుకొండ శివప్రసాద్, మాజీ ఎమ్మెల్యేలు చీరాల గోవర్ధనరెడ్డి, ముమ్మనేని వెంకట సుబ్బయ్య, చిట్

మొసలిపాడు, క్రాప, అనంతవరం తదితర ప్రాంతాల్లో చంద్రబాబు నాయుడు ఉద్వేగ భరిత ప్రసంగం ఇచ్చారు. రాష్ట్రంలో ప్రజలకు భద్రత లేకుండా పోయిందని హైదరాబాద్‌లో జరిగిన బాంబు పేలుడు మరోసారి రుజువుచేసిందని ఆయన ధ్రిగ్భాంతి వ్యక్తం చేశారు. శాంతి భద్రతలను గాలికొదిలిన ప్రభుత్వం నిర్లక్ష్యంగా వ్యవహరించడం వల్లే ఇటువంటి పరిస్థితులు పునరావృతమవుతున్నాయని ఆందోళన వ్యక్తం చేశారు.

యువతలో ఉత్సాహం నింపుతూ... చంద్రబాబు నాయుడు చేపట్టిన వస్తున్నా మీకోసం పాదయాత్ర ఆద్యంతం యువతలో ఉత్సాహం నింపేవిధంగా సాగింది. ముఖ్యమంత్రి కిరణ్‌కుమార్ రెడ్డిని కిరికిరి కిరణ్‌కుమార్ రెడ్డి అంటూ ఎద్దేవా చేస్తూ ప్రసంగించారు. ఆయన ముఖ్యమంత్రిగా ఉన్నంతకాలం యువతకు ఉద్యోగాలు వచ్చే పరిస్థితి లేదని పాఠశాలల్లో ఉపాధ్యాయుల పోస్టులు భర్తీ కావని విమర్శించారు. మహిళలు, వృద్దులు, వికలాంగులు ఎవరికీ కూడా ఈ ప్రభుత్వంలో సుఖశాంతులు లేవని ఆవేదన చెందారు. వ్యవసాయం కుంటుపడటం, దేశానికి మంచిది కాదన్నారు. రైతుల పేరుతో అప్పులు తీసుకొని వారిని నట్టేట ముం చుతున్నారని ఎద్దేవా చేశారు. కాంగ్రెస్ పార్టీలోని అం దరూ కలిసి దేశాన్ని దోచుకుంటున్నారని, దీనికి అంతూ పొంతూ లేకుండా పోయిందని ఆవేదన వ్యక్తం చేశారు.

ప్రస్తుతం సన్నబియ్యం రూ.50కు చేరిందని, తెదేపా అధికారంలో ఉన్నప్పుడు రూ.15లకే సన్నబియ్యం అందించామని గుర్తుచేశారు. ఇలా అన్ని వర్గాలను దోచుకుంటూ కాంగ్రెస్ దొంగలు ర్రాష్టాన్ని దివాలా తీస్తున్నారని చంద్రబాబు ఆవేదన వ్యక్తం చేశారు.పిట్టకథలతో ఆకట్టుకున్న బాబు... తెదేపా అధినేత చంద్రబాబునాయుడు అనంతవరం, ముసలిపాడు, క్రాప క్రాస్‌రోడ్ తదితర ప్రాంతాల్లో పిట్టకథలు చెప్తూ ప్రజలను ఉత్తేజపరిచారు. ఒక పేదవాడు రాజు వద్దకు వెళ్లి నాకు భూమి కావాలని అడిగాడు. ఉత్సాహంతోఉన్న ఆ రాజు పేదవానితో నీవు సూర్యోదయం నుంచి సూర్యాస్తమయం వరకు ఎంతదూరం పరిగెత్తితే అంతదూరం నీకే చెందుతుందని చెప్పాడు.

అత్యాశతో ఉన్న ఆ పేదవాడు కొద్ది దూరం మామూలుగానే పరిగెత్తి అనంతరం వేగం పెంచాడు. కనీసం నీరు, ఆహారం తీసుకోకుండా సూర్యాస్తమయం వరకు పరిగెత్తి, పరిగెత్తి గుండెపోటుతో మరిణించాడు. ఇలా అత్యాశకు పోయిన ఆ వ్యక్తి దుస్థితే కాంగ్రెస్ నేతలకు పట్టిందని, వేల కోట్లు దోచుకొని చంచల గూడ జైలులో ఊసలు లెక్కపెడుతున్నాడని బాబు తనదైన శైలిలో పిట్టకథలు చెప్తూ కాంగ్రెస్ అవినీతి, అక్రమాలను ఎండగట్టాడు.

ఈ నేపథ్యంలో గురువారం సాయంత్రం ఏకంగా 9 కిలోమీటర్లు నడిచి దోనెపూడిలో రాత్రికి బస చేయన్నుట్లు పార్టీ వర్గాలు తెలిపాయి. వేమూరు రైల్వేగేటు దాటిన తర్వాత రెండు కిలోమీటర్ల దూరంలో విశ్రాంతి తీసుకొంటున్న ఆయన నేడు మొసలిపాడు, క్రాప అడ్డరోడ్డు, కొల్లూరు మీదుగా దోనెపూడి వరకు నడక సాగిస్తారు. ఈ నేపథ్యంలో వేమూరు ఎమ్మెల్యే నక్కా ఆనందబాబు నేతృత్వంలో ఆయా గ్రామాల పార్టీ నాయకులు, కార్యకర్తలు చంద్రబాబుకు స్వాగతం పలికేందుకు భారీ ఏర్పాట్లు చేశారు.

నాయకులకూ... విశ్రాంతి

చంద్రబాబు పాదయాత్ర తాత్కాలికంగా నిలిచిపోయిన నేపథ్యంలో తెలుగుదేశం పార్టీ నాయకులు కూడా బుధవారం పూర్తిగా విశ్రాంతి తీసుకొన్నారు. 15 రోజుల నుంచి ఆయన వెంటే నడక సాగిస్తోన్న టీడీపీ జిల్లా అధ్యక్షుడు ప్రత్తిపాటి పుల్లారావు, మాజీ మంత్రి డాక్టర్ కోడెల శివప్రసాద్, ఎమ్మెల్యేలు ధూళిపాళ్ల నరేంద్రకుమార్, యరపతినేని శ్రీనివాసరావు, కొమ్మాలపాటి శ్రీధర్, జీ వీ ఆంజనేయులుతో పాటు ఇతర నాయకులు తమ నియోజకవర్గాల్లోనే విశ్రాంతి తీసుకొన్నారు. స్థానికంగా పార్టీ నాయకులు, కార్యకర్తలను కలుసుకొని పాదయాత్రకు లభిస్తోన్న స్పందనపై చర్చించారు. మాజీ మంత్రి ఆలపాటి రాజేంద్రప్రసాద్, పార్టీ రాష్ట్ర కార్యదర్శి మన్నవ సుబ్బారావుతో పాటు మరి కొంతమంది నాయకులు మంగళవారం డీసీసీబీ, డీసీఎంఎస్ ఎన్నికల్లో విజయం సాధించేందుకు వ్యూహాలు రూపొందించే పనిలో నిమగ్నమయ్యారు.

పాదయాత్ర కొనసాగే ప్రాంతాలు..

గురువారం రాత్రికి చంద్రబాబు దోనెపూడికి చేరుకొని అక్కడ బస చేసిన అనంతరం 22వ తేదీన ఉదయం అక్కడి నుంచే పాదయాత్ర ప్రారంభిస్తారు. కోటిపల్లి, వెల్లటూరు, భట్టిప్రోలు, వేమవరం, సూరేపల్లి, కోనేటిపురం మీదుగా పల్లెకోన చేరుకొన్న అనంతరం వేమూరు నియోజకవర్గ పర్యటన పూర్తి అవుతుంది. ఆ తర్వాత రేపల్లె నియోజకవర్గంలోకి పాదయాత్ర ప్రవేశిస్తుంది. కారుమూరు, లంక అడ్డరోడ్డు, వరికూటివారిపాలెం క్రాస్, పేటేరు, బేతపూడి, ఇసుకపల్లి సెంటర్, పాతపట్టణం - అరవపల్లి రోడ్డు, అవరపల్లి, ఊళ్లపాలెం, నల్లూరుపాలెం, సింగుపాలెం అడ్డరోడ్డు, సింగుపాలెం, విశ్వేశ్వరం, బొబ్బర్లంక, మైనేనివారిపాలెం, చాట్రగడ్డ స్కూల్, చాట్రగడ్డ, రుద్రవరం, పెనుమూడి, పెనుమూడి వారధి మీదుగా కృష్ణాజిల్లాలోకి షెడ్యూల్‌ను రూపొందించారు. తొలుత ఈ నెల 27వ తేదీ వరకు పాదయాత్రను కొనసాగించాలని నాయకులు భావించారు. ఎన్నికల కోడ్ గురువారంతో ముగుస్తున్న నేపథ్యంలో రోజుకు 12 నుంచి 13 కిలోమీటర్లకు పాదయాత్ర షెడ్యూల్‌ను సవరించి 26వ తేదీ రాత్రికి పెనుమూడి వారధి దాటేలా రూట్‌మ్యాప్ సిద్ధం చేస్తున్నారు. దీనిపై పుల్లారావు ఆదేశాల మేరకు మన్నవ సుబ్బారావు తదితరులు బుధవారం మధ్యాహ్నం రేపల్లె నియోజకవర్గ ఇన్‌చార్జ్ అనగాని సత్యప్రసాద్‌తో ఫోన్‌లో చర్చించారు.