ఇటిక్యాల దారిలో ఒక రైతును కదిలిస్తే గిట్టుబాటు ధర లేదని గోడు వెళ్లబోసు కుంటున్నాడు. ఒక మహిళను మాట్లాడిస్తే పావలా వడ్డీ పేరుతో రెండు రూపాయలు పిండుతున్నారని ఏకరువు పెడుతోంది. ఒక విద్యార్థిని అడిగితే..స్కాలర్‌షిప్పులు రావడం లేదని ఆవేదన వ్యక్తం చేస్తున్నాడు. ఒక అవ్వను పలకరిస్తే పింఛను చాలడం లేదని బాధపడుతోంది. కూలీ గిట్టుబాటు కావడం లేదని బీడీ కార్మికులు, ఉద్యోగాలు దొరకడం లేదని నిరుద్యోగులు, స్కూళ్లలో కనీసం మరుగుదొడ్లు కూడా లేవని చిన్నచిన్నపిల్లలు సైతం.. కష్టాలు కలబోసుకుంటున్నారు. ఒక లక్షా యాభైవేల కోట్ల రూపాయల బడ్జెట్ ఎటు పోతుంది? అదంతా అవినీతిపరుల ఖాతాలోకి చేరిపోతోంది. ఎంత తిన్నా ఈ కాంగ్రెస్ నేతలకు సంతృప్తనేదే ఉండటం లేదు. నిజానికి, అంత బడ్జెట్ డబ్బు పేదలకు చేరితే పేదరికం ఇంకెక్కడ?

అన్ని కష్టాలకు మూల కారణం అవినీతే. ఆ విషయం వాళ్లకు అర్థమయ్యేలా చెప్పే ప్రయ త్నం చేస్తున్నాను. నా యాత్రలో అవినీతిపై చర్చకే పెద్దపీట వేస్తున్నాను. అభివృద్ధికి అవినీతి గొడ్డలిపెట్టనే సంగతి అరటిపండు ఒలిచినట్టు వారికి చెప్పాలని ప్రయత్నిస్తున్నాను. అందుకే 'ఒక్క అవినీతిపరుడూ లేకపోతే ఒక్క పేదవాడూ' ఉండడు అనే నినాదాన్ని పదేపదే చెబు తున్నాను. నా ప్రయత్నం ఫలించి పేదల కష్టాలు తీరే రోజు దగ్గర్లోనే ఉందని నమ్ముతున్నాను.

"పాదయాత్రలో మీ కష్టాలు నేరుగా చూశాను. సమస్యలన్నీ తెలుసుకున్నా. కష్టాల్లో, నష్టాల్లో మీతో ఉండాలని, వాటిని మీతో పంచుకోవాలని మీ వద్దకు వచ్చాను. నేనెలా ఉండాలో.. నేనేం చేయాలో మీరే చెప్పండి. మల్లాపూర్ వరకు ప్రతి రోజు నేనే మాట్లాడుతూ వచ్చాను. ఇప్పుడు మీ నుంచి సమస్యలు, వాటి పరిష్కారాన్ని వినాలనుకుంటున్నా'' పాదయాత్రలో భాగంగా కరీంనగర్ జిల్లా మల్లాపూర్ మండలం రేగుంట గ్రామంలో స్థానిక ప్రజలతో టీడీపీ అధినేత చంద్రబాబు వ్యాఖ్యలివి. అనడమే కాదు.. ప్రజలకు మైకును అందించి వారి సమస్యలు విన్నారు.

ఈ సందర్భంగా ఒక రైతు మాట్లాడుతూ ఒక ఫ్యాక్టరీలో తయారయ్యే వస్తువుకు వారే ధర నిర్ణయిస్తారు. రైతు పండించే ధాన్యానికి మాత్రం ఆ అవకాశం లేదు. రైతు పండించిన పంటకు రైతే ధర నిర్ణయించాలి. ఈ ప్రభుత్వంలో వ్యవసాయ శాఖ ఉండి ఉపయోగం లేదు. పంటలకు సలహాలు ఇచ్చే వాళ్లు లేరు. కాబోయే ముఖ్యమంత్రి మీరే.. ఈ దళారీ వ్యవస్థను తొలగించి ఆదుకోవాలి అని కోరారు. పంటలకు గిట్టుబాటు ధర కల్పించాలని, తమ పిల్లలకు ఉద్యోగాలు ఇవ్వాలని మరో రైతు కోరారు. మాదిగ విద్యార్థి ఫెడరేషన్ కార్యకర్త మాట్లాడుతూ మాదిగ జాతికి మీ వల్లే లాభం జరిగిందని చెప్పారు.

చొప్పదండిలో లిడ్ క్యాప్‌కు కేటాయించిన స్థలాన్ని ఏపీఎస్పీ బెటాలియన్‌కు ఇచ్చారని దీనిపై మీరు పోరాడాలని కోరారు. "తెలంగాణ కోసం శ్రీకాంత్‌చారి ఆత్మ బలిదానం చేశారు. అలా వెయ్యి మంది వరకు చనిపోయారు. మాపై 30 నుంచి 40 వరకు కేసులున్నాయి. తెలంగాణకు మీరు అనుకూలంగా ఉండి, కేసులను ఎత్తివేయించాలి'' అని ఓ విద్యార్థి విజ్ఞప్తి చేశారు. కనీస వేతనాల కోసం తాము పోరాడితే మద్దతు ఇచ్చారని, కానీ అవి అమలు కాకుండా జీవోను అబయన్స్‌లో పెట్టిందని, దానిని సరిచేయాలని కోరారు.

పెన్షన్ 1500 రూపాయలు ఇప్పించాలని బీడీ కార్మికుల సంఘం ప్రతినిధి విజ్ఞప్తి చేశారు. "అవినీతి చాలా పెరిగింది. తెలంగాణ ప్రజలను అన్నింట్లో అణగ దొక్కుతున్నారు. ఉద్యోగాలు ఇస్తలేరు. మా బడిలో నీళ్లు లేవు. మరుగు దొడ్లు లేవు. అవినీతిని నిర్మూలించి మాకు మంచి చదువులు చదివించి ఉద్యోగాలు ఇప్పించాలి'' అని మరో విద్యార్థిని కోరింది. రాష్ట్రంలో అవినీతి పరుల ఆట కట్టించేందుకు మీరు రహస్యంగా విచారణలు జరిపించి వారిపై కేసులు పెట్టి ఆ డబ్బును రికవరీ చేయాలని సూచించింది. ఉద్యోగులకు సరిపడా వేతనాలు పెంచితే వాళ్లు లంచాలు తీసుకోరని సలహా ఇచ్చింది.

"మీరే అధికారంలోకి రావాలి. మీరు వస్తేనే మాకు న్యాయం జరుగుతుంది. తెలుగుదేశం పార్టీకే ఓట్లు వేస్తాం'' అని మరో రైతు స్పష్టం చేశారు. మార్గమధ్యలో రైతులు, గొర్రెల కాపరులు, మహిళలు, విద్యార్థులు, వివిధ కుల వృత్తుల వారిని పలకరించి వారి సమస్యలను తెలుసుకుని ఏమి చేస్తే బాగుంటుందని సలహాలు కోరారు. ప్రజలతోనే మాట్లాడించి వారి సమస్యలను విని, ఏం చేయాలో వారి నుంచే చంద్రబాబు సలహాలు తీసుకోవడం ఆయన పాదయాత్రలో కొత్త కోణం.

రాష్ట్ర ప్రజలను దారుణమైన 'షాక్'లకు గురిచేస్తున్న కరెంటు చార్జీలను అధికారంలోకి వచ్చిన వెంటనే తగ్గిస్తానని తెలుగుదేశం పార్టీ అధినేత చంద్రబాబు ప్రకటించారు. జడ్జీలను సైతం ప్రలోభపెట్టి అప్పటి సీఎం వైఎస్ రాజశేఖరరెడ్డి అనేకమందిని జైళ్లకు పంపించారని దుయ్యబట్టారు. బీఎడ్ అభ్యర్థులనూ ఎస్‌జీటీ (సెకండరీ గ్రేడ్ టీచర్స్)కి అర్హులను చేస్తానని, ప్రభుత్వంలోకి రాగానే వారికోసం డీఎస్సీ పరీక్ష నిర్వహిస్తానని హామీ ఇచ్చారు. అవినీతి కాంగ్రెస్ దొంగల్ని తరిమికొట్టాలని పిలుపునిచ్చారు.

కరీంనగర్ జిల్లా మల్లాపూర్ మండలం గొర్రెపల్లి వద్ద ఆదివారం ఆయన పాదయాత్ర ప్రారంభించారు. రేగుంట, ఇటిక్యాల గ్రామం వరకు 8.7 కిలోమీటర్లు నడిచారు. భార్య భువనేశ్వరితో మాట్లాడి, కార్యకర్తలను పలకరించి పాదయాత్ర కోసం బస్సు దిగేసరికి మధ్యాహ్నం మూడు గంటలయింది. మార్గమధ్యలో పసుపు, మామిడి రైతులు, గొర్రెల కాపరులు, మహిళలను పలకరించి వారి సమస్యలను అడిగి తెలుసుకున్నారు. కరెంటు కష్టాలు తీర్చుతానని రేగుంట సభలో హామీ ఇచ్చారు. "వ్యవసాయానికి 7 గంటల విద్యుత్తు సరఫరా లేక పంటలు ఎండి పోతున్నాయి.

టీడీపీ అధికారంలోకి రాగానే విద్యుత్తును మెరుగు పరిచి ఆ శాఖ పనితీరు మారుస్తాం. తొమ్మిది గంటల పాటు నాణ్యమైన విద్యుత్తు సరఫరా చేస్తాం. కరెంట్ చార్జీలు తగ్గిస్తా'మని హామీ ఇచ్చారు. తన అక్రమాలకు చివరకు జడ్జీలను సైతం వైఎస్ వదిలిపెట్టలేదని దుయ్యబట్టారు. "వైఎస్ హయాంలో పులివెందులలో ప్రజాస్వామ్యం లేదు. రౌడీయిజం, ముఠా కక్షలు తప్ప అక్కడ ఏ న్యాయమూ లేదు. ప్రత్యర్థులను జైళ్లలో పెట్టించి ఎవరూ రాజకీయాల్లో తనకు వ్యతిరేకంగా ఉండవద్దని చూశారు.

2004లో వైఎస్‌కి వ్యతిరేకంగా పోరాడిన వ్యక్తి సతీశ్ రెడ్డి. అప్పుడు కో ఆపరేటివ్ ఎన్నికల్లో నిలబడడానికి సతీశ్ రెడ్డి పులివెందుల వెళ్లారు. ప్రచారంలో ఉండగా, ఒక ఊరులో ఆయనపై దాడి జరిగింది. రక్షణ కోసం గన్‌మెన్ కాల్పులు జరపగా ఒకరికి గాయమైంది. రాజశేఖరరెడ్డి ఫోన్ చేసి మెజిస్ట్రేట్‌ను రప్పించాడు. సతీశ్ రెడ్డే నేరుగా తుపాకీ తీసుకుని కాల్చారని తప్పుడు వాంగ్మూలం రాయించారు. ఆయనను శాశ్వతంగా జైలుకు పంపించే కుట్ర పన్నారు. నాటి సీఎంతో జడ్జి లాలూచీ పడినట్టు తర్వాత కోర్టు తేల్చింది''అంటూ ఆదివారం 'ఆంధ్రజ్యోతి'లో వచ్చిన 'రాజుగారి సేవల చెరుపు' వార్తను ప్రజలకు చదివి వినిపించారు.

కాంగ్రెస్ దొంగలు అడవి పందుల్లా రాష్ట్రాన్ని మెక్కుతున్నారని అన్నారు. రాష్ట్రం నష్టం పోవడానికి వైఎస్ పాలన కారణమైతే, రోశయ్య పాలన చతికిల పడిందని, కిరణ్ పాలన కిరికిరిగా సాగుతున్నదని అన్నారు. కాగా, తెలంగాణపై కాంగ్రెస్ పార్టీ తమ అభిప్రాయాన్ని చెప్పదు గానీ అన్ని పార్టీలను చెప్పమనడం ఎక్కడి న్యాయమని చంద్రబాబు ప్రశ్నించారు. ఎఫ్‌డీఐల విషయంలో కాంగ్రెస్ ఎంపీలను బుజ్జగించడానికే అఖిలపక్ష సమావేశాన్ని ఏర్పాటు చేశారు తప్ప తెలంగాణ సమస్య పరిష్కారానికి కాదని విమర్శించారు. తెలంగాణ అమరవీరుల కుటుంబాలను ఆదుకునే బాధ్యతను టీడీపీ తీసుకుంటుందని హామీ ఇచ్చారు.
కోటి రూపాయలు చూశారా?
రేగుంట సభలో చంద్రబాబు వైఎస్ కుటుంబం అవినీతి భాగోతాన్ని పిట్టకథలా చెప్పుకొచ్చారు. మీరెప్పుడైనా కోటి రూపాయలు చూశారా?అన్ని ప్రశ్నించారు. లేదు అని ప్రజల నుంచి బదులొచ్చింది. దానికి చంద్రబాబు ఇలా వివరించారు. 100 రూపాయల నోట్లు 100 కట్టగా కడితే 10 వేలు. ఐదు వేలు, 10 వేల రూపాయల కట్టలను ఒక సంచిలో నింపితే 50 లక్షలు. అలాంటి సంచులు 200 అయితే లారీ నిండుతుంది. వాటి విలువ వెయ్యి కోట్లు. అలాంటి వెయ్యి లారీల డబ్బును లెక్కిస్తే లక్ష కోట్ల రూపాయలు. ఇదీ జగన్ దోచిన డబ్బు. అందులో ఒక లారీ మీ ఊరికి పంపినా మీ కష్టాలు తీరుతాయి.

వికలాంగుల పట్ల దేవుడు చిన్నచూపు చూశాడు. దానికి ప్రభుత్వ నిర్లక్ష్యమూ తోడై వారిని కుంగదీస్తోంది. వారిలో చాలామంది పుట్టుకతో వికలాంగులు కాదు. మనందరిలాగే వాళ్లకూ భగవంతుడు సకల అంగాలను ప్రసాదించాడు. తాగునీటి విషయంలో రాష్ట్ర ప్రభుత్వం వైఖరే వారికి ఉరి బిగించింది. సలక్షణంగా ఉన్నవారిని వికలాంగులుగా మార్చింది. అలాంటివారిలో కొందరిని ఓబులాపూర్‌లో కలుసుకున్నాను. వారిలో కొందరు మానసిక వికలాంగులు కాగా, మిగతా వారంతా శారీరక వైకల్యంతో బాధపడుతున్నవారు. అందరివీ పేద కుటుంబాలే.

తల్లిదండ్రుల రెక్కాడితేగానీ వీళ్ల డొక్క నిండదు. చెట్టంత కొడుకు చేతికిందకు రాలేదనే దిగులు ఒకవైపు, సేవలు చేస్తూనే పోషణకు ఆ పనీ ఈ పనీ చేయాల్సి రావడం మరోవైపు.. పాపం ఆ కుటుంబాలను కోలుకోలేకుండా చేస్తున్నాయి. ఈ పరిస్థితుల్లో వాళ్లకు ప్రభుత్వమే దిక్కు. ఆ ప్రభుత్వం మాత్రం సాయం మరిచి దిక్కులు చూస్తోంది. మిగిలిన విషయాలెలాఉన్నా వీళ్లపట్ల ఎవరికైనా కనీస మానవత్వం ఉండాలి. ఈ విధి వంచితులపై ఎక్కువ శ్రద్ధపెట్టి పనిచేయా లి. అప్పట్లో నేను చేసిందిదే. వీళ్లకు జీవితంపై ఆశ కల్పించడం కోసం ఇప్పుడు ప్రత్యేక పాలసీ తెచ్చాను. ఇంకా ఏం చేయాలనే దానిపై ఇతర వర్గాల నుంచీ సలహాలు తీసుకుంటున్నాను. ఏమైనా వీరి కష్టాలు తీరే రోజొకటి ఉందనే ఆశతోనే నడుస్తున్నాను.

పాత దామరాజుపల్లెకు వచ్చినప్పుడు నడ్డి విరుస్తున్న 'పావలా వడ్డీ' దారుణాలను డ్వాక్రా మహిళలు కళ్లకు కట్టారు. ఆ మహిళల్లో చాలామందికి చదువు లేదు. ఆదిలాబాద్ జిల్లా డ్వాక్రా సంఘాల అధ్యక్షురాలి పరిస్థితీ ఇంతే. చదువు లేకపోయినా సంఘాలను సమర్థంగా నడుపుతోంది. నిజానికి, ఇలాంటి మహిళామణులను మరింతగా ఉత్సాహపరచాలి. కానీ, వీళ్ల పరిస్థితి చూస్తుంటే ప్రాణం ఉసూరుమంటోంది. "ఏది అసలో, ఏది వడ్డీయో తెలియడం లేదు సార్. మేము తీసుకునే దానిపై ఎంత వడ్డీ వేస్తున్నదీ చెప్పరు. మూడు లక్షల రూపాయల లోనులో 50 వేలు ముందే కోతపెట్టి ఇస్తున్నారు'' అని ఆ మహిళలు వాపోయారు. ఆడపడుచులతో కన్నీరు పెట్టించిన ఏ ప్రభుత్వమూ బాగుపడదని వాళ్లకు ధైర్యం చెప్పి అక్కడ నుంచి కదిలాను.

వారం రోజుల్లోగా పత్తి కొనుగోలు చేసి రైతులకు న్యాయం చేయకపోతే సీఎం కిరణ్ అంతు తేలుస్తామని తెలుగుదేశం పార్టీ అధినేత చంద్రబాబు హెచ్చరించారు. అప్పటికీ స్పందించకుంటే పత్తి రైతు కోసం జమ్మికుంటలో ధర్నాచేసి సర్కారును నేలకు దించుతామని వెల్లడించారు. కరీంనగర్ జిల్లా మల్లాపూర్ మండలం ఓబులాపూర్ వద్ద శనివారం ఆయన పాదయాత్ర ప్రారంభించారు. జిల్లాలో అడుగుపెట్టిన తొలిరోజే ప్రభుత్వంపై నిప్పులు చెరుగుతూ ముందుకు మహాఉత్సాహంగా సాగిపోయారు. సంగెం శ్రీరాంపూర్, కొత్త దామరాజుపల్లి, పాతదామరాజుపల్లి, మల్లాపూర్, గొర్రెపల్లి మీదుగా 16 కిలోమీటర్లు నడిచారు.

ఓబులాపూర్ నుంచి బయలుదేరిన చంద్రబాబుకు మహిళలు మంగళహారతులతో స్వాగతం పలికారు. దారి పొడవునా వివిధ వర్గాల వారితో మాట్లాడుతూ వారి సమస్యలు తెలుసుకుంటూ పరిష్కారానికి హామీలిస్తూ ముందుకు సాగారు. సంగెం శ్రీరాంపూర్ దాటిన తర్వాత రోడ్డు పక్కన చెట్టు కింద కూర్చుని ఉన్న వికలాంగుల వద్దకు వెళ్లి బాగోగులు తెలుసుకున్నారు. 18 అంశాలతో వికలాంగుల పాలసీని సిద్ధం చేశామని, తెలుగుదేశం అధికారంలోకి రాగానే అమలు చేస్తామని హామీ ఇచ్చారు. అక్కడ నుంచి కొత్తదామరాజుపల్లి గ్రామానికి వచ్చి ఉమామహేశ్వరాలయంలో కుమారుడు లోకేశ్‌తో కలిసి చండీహవనంలో పాల్గొన్నారు.

అనంతరం ఓబులాపూర్, కొత్తదామరాజుపల్లి, పాత దాంరాజుపల్లి, మల్లాపూర్ గ్రామాల్లో డ్వాక్రా మహిళలను కలిశారు. పావలా వడ్డీ అని పేరుచెప్పి రెండు రూపాయలు పిండుతున్నారని కొందరు.. అసలు ఎంత వడ్డీ వేస్తున్నదీచెప్పడం లేదని మరికొందరు.. ఇచ్చే అరకొర రుణంలోనూ కోతలు పెడుతున్నారని ఇంకొందరు గోడు వెళ్లబోసుకున్నారు. " గీ మహిళ సంఘాలను నువ్వే పెట్టించినవు. గీళ్లేమో పావలా వడ్డీ అంటన్నరు.. ఐదు రూపాయలు తీసుకుంటన్నరు. మేం ఎట్ల కట్టేది, ఎట్ల బతికేది'' అని సామల కిష్ట్టమ్మ మొత్తుకోగా, "మా కోసం మీరు కేంద్రంలో కొట్లాడాలి. ఇప్పటి నుంచి మీకు మద్దతునిస్తాం. మాగురించి ఆలోచించండి'' అని కొత్తూరి నారాయణరెడ్డి అనే పసుపు రైతు వాపోయాడు.

పత్తి, పసుపు రైతులు ఆత్మహత్యలు చేసుకుంటున్నా సీఎం కిరణ్‌కు చీమ కుట్టినట్టయినా లేదని, నీరో చక్రవర్తిలా ఏసీ రూంలలో పడుకుంటున్నారని ్ఘిచంద్రబాబు విమర్శించారు. 'మార్కెట్లలో మద్దతు ధరకు పత్తిని కొనడం లేదు . వారి నుంచి వ్యాపారులు, దళారులు కొని అధిక లాభాలకు సీసీఐకి విక్రయిస్తున్నారు. వీళ్లతో కాంగ్రెస్ నేతలు కుమ్మక్కవుతున్నారు''అని దుయ్యబట్టారు. కరీంనగర్ జిల్లాలో ఆరున్నర లక్షల ఎకరాల్లో పత్తి సాగు జరిగిందని, వారం రోజుల్లోగా ఆ పత్తి నిల్వలను కొనుగోలు చేయకపోతే ఈ ప్రభుత్వం అంతు తేలుస్తామని హెచ్చరించారు. గత సంవత్సరం 15 వేల రూపాయల ధర పలికిన పసుపు మూడు వేలయినా పలికేవారు లేదని ఆవేదన వ్యక్తం చేశారు.

15 వేల రూపాయల చొప్పున కొని పసుపు రైతును ఆదుకోవాలని డిమాండ్ చేశారు. కాంగ్రెస్, వైసీపీ నాయకులు దోచుకున్న డబ్బును రికవరీ చేస్తే రైతు అప్పులను ఐదేసి సార్లు మాఫీ చేయొచ్చునని చెప్పుకొచ్చారు. టీడీపీ అధికారంలోకి వస్తే తొమ్మిది గంటల ఉచిత కరెంట్ ఇస్తుందని చెప్పారు. కాంగ్రెస్ అమలు చేస్తానంటున్న నగదు బదిలీ పథకం తమ పార్టీ కాపీ పథకమేనన్నారు. "కిలో బియ్యానికి బదులు ఐదు రూపాయలు బ్యాంకులో వేసి మీ పొట్టకొట్టాలని చూస్తున్నార''ని చంద్రబాబు చెప్పారు. కరీంనగర్ ఎంపీగా ఉండగా టీఆర్ఎస్ అధ్యక్షుడు కేసీఆర్ జిల్లాకు ఏం చేశారో చెప్పాలని సవాల్ చేశారు.

జిల్లాను ఎడారి చేసే బాబ్లీ ప్రాజెక్టుపై పోరాడి తాము జైలులో ఉంటే ఒక్క టీఎంసీ నీరు మహారాష్ట్రకు ఇస్తే ఏమిటని కేసీఆర్ ప్రశ్నించారని గుర్తు చేశారు. కేంద్ర కార్మిక శాఖ మంత్రిగా ఉండి బీడికట్టలపై పుర్రె గుర్తును పెట్టి బీడీకార్మికుల పొట్టగొట్టారని దుయ్యబట్టారు. "వైఎస్ బయ్యారం గనుల పేరిట లక్షా 56 వేల ఎకరాలను అల్లునికి (బ్రదర్ అనిల్) దానం చేస్తే తెలుగుదేశం గట్టిగా పోరాడింది. అప్పుడు టీఆర్ఎస్ ఎక్కడ ఉంది?'' అని ఘాటుగా ప్రశ్నించారు.

తెలుగుదేశం పార్టీ తెలంగాణకు వ్యతిరేకం కాదని, తానెప్పుడూ తెలంగాణకు వ్యతిరేకంగా మాట్లాడలేదని, భవిష్యత్‌లో కూడా మాట్లాడనని చంద్రబాబు మరోసారి స్పష్టం చేశారు. తెలంగాణ సమస్యపై అఖిలపక్షం ఏర్పాటు చేయాలని డిమాండ్‌చేసింది టీడీపీయేనని గుర్తుచేశారు. కాళ్లు బొబ్బలెక్కినా, మెడ నొప్పులు వస్తున్నా పాదయాత్ర చేస్తున్నానని చెప్పుకొచ్చారు.