ఆ గ్రామాల గుండా వస్తున్నప్పుడు పొలాల్లో పనిచేసుకునే మహిళా కూలీలంతా గుంపుగా కదలివచ్చారు. నా చుట్టూ గుమిగూడి తమ కష్టాలు ఏకరవు పెట్టారు. కూలి చేసుకుంటుంటే వచ్చిన డబ్బులతో నెల గడిచే పరిస్థితి లేదని ఆవేదన చెందారు. అదీ ఇదీ అని లేకుండా నిత్యావసరాల నుంచి కూరగాయల వరకు మండిపోతున్నాయని పెద్దశంకరంపేటలో ఎదురొచ్చిన జనం వాపోయారు. వాళ్ల ఆవేదనలో నిజం ఉందనిపించింది. ఆదుకోవాల్సిన స్థానంలో ఉన్నవాళ్లే అగ్నిగుండంలోకి తోస్తున్నారనిపించింది.

ప్రభుత్వం ఎప్పుడూ ప్రజల ఆదాయాన్ని, ఖర్చును సమన్వయం చేస్తూ పాలసీలు తయారుచేయాలి. కానీ ఆ ముందుచూపు లోపించింది. ఆ దెబ్బ సామాన్యుడిపై పడుతోంది. మండే ఎండలకు పక్షులు, జీవాలు రాలిపోయినట్టే మండే ధరలకు సగటు ప్రజలు కూలిపోతున్నారు.

విద్య కోసమో, వైద్యం కోసమో అప్పు చేశారంటే అనుకోవచ్చు. కారపు మెతుకులు తినేందుకు కూడా తల తాకట్టు పెట్టాల్సిన పరిస్థితికి పేదలు నెట్టేయబడుతున్నారు. చరిత్రలో ఇలాంటి పరిస్థితి ఎప్పుడూ లేదు. ఉప్పూ పప్పులు నిప్పుల్లా కాలుస్తున్నాయి. పెట్రోల్, డీజిల్ ధరలతో వాత పెడుతున్నారు. గ్యాస్ ధరలు వంటిళ్లను మండిస్తున్నాయి. ప్రభుత్వానికి ఒక ప్రణాళిక, ముందు ఆలోచన ఉంటే ఈ పరిస్థితి రాకపోయేది. వీళ్లకు ఇన్ని కష్టాలూ లేకపోయేవి.

రాష్ట్రంలోగానీ, దేశంలో గానీ ఏటా ఏ సరుకు ఎంత ఉత్పత్తి అవుతోంది, ఎంత వినియోగం అవుతున్నదనే అంచనా ఉండాలి. ఎగుమతులూ దిగుమతులపై కూడా కచ్చితమైన ప్రణాళికతో పనిచేయాలి. టీడీపీ హయాంలో అయితే మార్కెట్ ఇంటర్వెన్షన్ ఫండ్ పెట్టి ఎప్పటికప్పుడు ధరల నియంత్రణను పరిశీలించేవాడిని. దాంతో ధరలెప్పుడూ గీత దాటేవి కాదు. కానీ, ఇప్పుడు పాలించేవాళ్లలాగే ధరలూ కట్టుతప్పాయి. వాటిని కట్టడి చేయకుండా ప్రగతిబాటలో కాలు ముందుకేయడం కష్టమనిపిస్తోంది.

హైదరాబాద్, నవంబర్ 27 : పాదయాత్రలో ఉండగా మంగళవారం ఉదయం టీడీపీ అధినేతకు షుగర్ లెవల్స్ పెరిగాయి. హైదరాబాద్‌కు చెందిన గ్యాస్ట్రో ఎంటరాలజిస్ట్ నాగేశ్వర్‌రెడ్డి ఆధ్వర్యంలోని డాక్టర్ల బృందం చంద్రబాబును పరీక్షించింది. మధుమేహాన్ని అదుపులో ఉంచుకునేందుకు మందులు వాడడం తప్పనిసరి అని నాగేశ్వర్‌రెడ్డి సూచించారు.

యోగా, ఇతర దారుఢ్య సాధనాల వల్ల చంద్రబాబు ఇప్పటి వరకు మాత్రలు వాడకుండానే షుగర్‌ను అదుపులో ఉంచుకున్నారు. అయితే ఒత్తిడి వల్ల షుగర్ స్థాయి పెరిగిందని నాగేశ్వర్‌రెడ్డి చెప్పారు. మందులు వాడడం అత్యవసరం కానప్పటికీ వయసు దృష్ట్యా వాడాలని డాక్టర్ నాగేశ్వర్‌రెడ్డి సూచించారు.

సంగారెడ్డి, నవంబర్ 27 : రాష్ట్రమంతటా ఓట్లు వస్తేనే టీడీపీ అధికారంలోకి వస్తుందని ఆ పార్టీ అధినేత చంద్రబాబు అన్నారు. అలా కాకుండా ఒక ప్రాంతంలో పార్టీ దెబ్బతింటే భూస్వాములు, పెత్తందార్లు అధికారంలోకి వస్తారంటూ.. తెలంగాణలో టీడీపీని అఖండ మెజారిటీతో గెలిపించాలని పరోక్షంగా పిలుపునిచ్చారు. టీఆర్ఎస్ అధినేత కేసీఆర్‌కు నాడు మంత్రి పదవి ఇచ్చి ఉంటే ఇప్పుడు తనవెంటే వ్యాన్‌లో ఉండేవారని విమర్శించారు.

మెదక్‌జిల్లాలో పదోరోజైన మంగళవారం పెద్దశంకరంపేట, కల్హేర్ మండలాల్లో చంద్రబాబు పాదయాత్ర సాగించారు. ప్రజలను కలుసుకుంటూ, వివిధ సభల్లో మాట్లాడుతూ 15.2 కి.మీ.ల దూరం నడిచారు. టీడీపీ లాంటి పేదలపార్టీని దెబ్బతీసేందుకు ఒక ప్రాంతంలో అవినీతిపరులు, ఉద్యమం పేరిట మరో ప్రాంతంలో కుట్రలు పన్నుతున్నారని విమర్శించారు. ఈ పరిస్థితుల్లో పార్టీని కాపాడుకోవాల్సిన బాధ్యత అందరిపై ఉన్నదన్నారు.

"నా పరిస్థితిని అర్థం చేసుకుని మీరంతా సహకరించాలి. పాదయాత్రకు సంఘీభావంగా మీరు కూడా నాతో పాటు ఒకటో రెండో కిలోమీటర్లు నడవండి. అలా మీరు సహకరిస్తే కాంగ్రెస్ గుండెల్లో రైళ్లు పరుగెత్తిస్తాను'' అని విజ్ఞప్తి చేశారు. సీఎం సీటు కోసమే చంద్రబాబు నడుస్తున్నారనే విమర్శలను తిప్పికొట్టారు "తొమ్మిదేళ్లు ముఖ్యమంత్రిగా పని చేశాను. నేను చూడని అధికారం లేదు. ఢిల్లీలో చక్రం తిప్పాను. అప్పట్లో ప్రధానమంత్రిని సైతం నేనే నిర్ణయించాను. దానివల్ల రాష్ట్రానికి కావాల్సిన అభివృద్ధి ప్రాజెక్టులను కేంద్రం నుంచి సాధించగలిగాను.

పల్లెటూరుగా ఉండే హైదరాబాద్‌ను ప్రపంచ పటంలో నిలబెట్టాను. సైబరాబాద్‌కు, హైటెక్ సిటీకి రూపకల్పన చేశాను'' అని చెప్పుకొచ్చారు. వాన్‌పిక్ వ్యవహారంలో సీఎం కిరణ్ దొంగలకు కాపలా కాస్తున్నారని ధ్వజమెత్తారు. సీబీఐ చార్జిషీట్‌లో ఐదో ముద్దాయిగా ఉన్న మంత్రి ధర్మాన ప్రసాదరావు జైలుకెళ్లకుండా కాపాడుతున్నారన్నారు. పైగా ధర్మాన తప్పేమీ లేదని కిరణ్ నిస్సిగ్గుగా చెబుతున్నారని మండిపడ్డారు. దొంగ కంపెనీలతో విదేశాలలో సైతం ఆస్తులు కూడబెట్టినందున జగన్ కేసు దర్యాప్తునకు మరో మూడు నెలలు కావాలని కోర్టును సీబీఐ కోరిందంటే జగన్ అవినీతి తతంగం ఎలా ఉన్నదో తెలుస్తున్నదని వ్యాఖ్యానించారు.

తన రాజకీయ జీవితంలో తెలంగాణలోనే ఎక్కువ అభివృద్ధి చేశానని, కాదని ఎవరైనా అంటే నిరూపించేందుకు సిద్ధమని సవాల్ చేశారు. తెలంగాణ ప్రాంత నిరుద్యోగులకు ఉద్యోగాలు ఇచ్చామని, సాగునీటి ప్రాజెక్టులు నిర్మించామని, ట్రాన్స్‌ఫార్మర్లు, సబ్‌స్టేషన్లు, పాఠశాల, కళాశాల భవనాలు, రోడ్లు, మురుగుకాల్వల నిర్మాణాలు తదితర మౌలిక సదుపాయాలు కల్పించామని గుర్తుచేశారు. "ఉద్యమంలో ఇప్పటికే పదేళ్లు పోయింది.

ఇంకా పదేళ్లలో ఉద్యోగాలు రాకపోతే మీరు ముసలి వాళ్లవుతారు. జీవితంపై నిరాశ కలుగుతుంది'' అని యువతను ఉద్దేశించి ఆవేదనతో అన్నారు. అయితే, తెలంగాణ అంశాన్ని తేల్చడం తన చేతుల్లో లేదని చెప్పారు. దానిపై నిర్ణయం తీసుకోవాల్సిన కేంద్ర, రాష్ట్రాలలో ఉన్న కాంగ్రెస్ ప్రభుత్వాలు నాటకాలాడుతున్నాయని దుయ్యబట్టారు. మరోవైపు కేంద్రాన్ని నిలదీయాల్సిన కేసీఆర్ తమ పార్టీపై విమర్శలు చేస్తున్నారని మండిపడ్డారు. కేసీఆర్‌ది ఇదే జిల్లా అని చెప్పారు.

టీడీపీలోనే పని చేసినప్పుడు అందరికన్నా ఎక్కువగా పార్టీని గురించి బాగా మాట్లాడేవారని చెప్పారు. వైఎస్ అవినీతి గురించి ఆయన, టీఆర్ఎస్ ఏనాడూ మాట్లాడలేదని విమర్శించారు. హైదరాబాద్ చుట్టుపక్కల 8 వేల ఎకరాలను అమ్మితే పట్టించుకోలేదని, కూతురికి వరకట్నంగా బయ్యారం ఖనిజ సంపదను లీజుకు ఇచ్చినా, జలయజ్ఞం పేరిట ధనయజ్ఞానికి పాల్పడినా టీఆర్ఎస్ స్పందించలేదని విమర్శించారు.

కాగా, తాము అధికారంలోకి వస్తే పేదవృద్ధుల కోసం వృద్ధాశ్రమం ఏర్పాటు చేస్తామని హామీ ఇచ్చారు. ఎస్సీ వర్గీకరణ చేసి, మాదిగలకు న్యాయం చేస్తామన్నారు. మైనారిటీలలో ఎక్కువగా పేదలున్నారని వారిని ఆర్థికంగా అభివృద్ధి పరిచేందుకు అన్ని చర్యలు తీసుకుంటామని తెలిపారు. స్థానిక సంస్థలు, చట్టసభల్లో ఎనిమిది శాతం రిజర్వేషన్లు కల్పించేందుకు ప్రయత్నిస్తామన్నారు. వచ్చే ఎన్నికలలో మైనారిటీలకు పార్టీ నుంచి 15 స్థానాలలో అభ్యర్థులను నిలబెడతామని చెప్పారు.

ఇప్పుడు నేత దుస్తులకు ఆదరణ ఎక్కడుంది!? అలా వెళ్లడం.. ఇలా రెడీమేడ్ దుస్తులు కొనుక్కు రావడం! దీంతో, నేతన్నలూ నష్టపోతున్నారు. దర్జీలకూ ఉపాధి కరువైంది!

పేదవాడి ఫ్రిజ్జు అయిన కుండకు ఆదరణ ఏదీ!? దీపావళికి ప్రతి ఇంటా మట్టి దీపాలు కళకళలాడేవి. అనారోగ్యకారకమని తెలిసినా.. ఇప్పుడన్నీ ప్లాస్టిక్ బిందెలు. రెడీమేడ్ దీపాలే! ఇళ్ల నిర్మాణంలో.. ఇంట్లో విడిచిన దుస్తులను భద్రపరచడం సహా పలు పనులకు బుట్టలు, గంపలు వాడేవారు. ఇప్పుడు ప్లాస్టిక్ గంపలు, టబ్‌లు వచ్చేశాయి!

ప్రపంచీకరణ ఫలితంగా చేతి వృత్తులు, కుల వృత్తులు పూర్తిగా దెబ్బతిన్నాయి. ఇటువంటి ప్రమాదాన్ని ముందుగా ఊహించే టీడీపీ హయాంలో చేతి వృత్తుల వారికి ఆధునిక పనిముట్లు ఇచ్చి కొంతవరకు ఆదుకున్నాం. కానీ, ఈ ప్రభుత్వానికి ముందు చూపు ఏదీ!? సోమవారంనాటి పాదయాత్రలో బుట్టలు అల్లేవారు, నేతన్నలు, కుమ్మర్లు, చేతివృత్తిదారులు వచ్చి కలిశారు. తమ ఉత్పత్తులకు గిరాకీ లేకుండాపోయిందని, ఉపాధి దెబ్బతిందని ఆవేదన వ్యక్తం చేశారు.

ప్రభుత్వం బాధ్యత కలిగినది అయితే వారికి పునరావాసం కల్పించడమో.. మార్పులకు అనుగుణంగా శిక్షణ ఇచ్చి చేయూత ఇవ్వడమో చేయాలి! కానీ, తన విధానాలతో వారిని మరింత ఇబ్బందులకు గురి చేస్తోంది. దీంతో, చేతివృత్తిదారుల సమస్యల పరిష్కారానికి ప్రపంచవ్యాప్తంగా ఏం జరుగుతోందనే దానిపై దృష్టిసారించా. చైనా అనుభవం ఆసక్తికరంగా ఉంది. చేతివృత్తిదారులు కుటీర పరిశ్రమల్లో పనిచేస్తారు. అక్కడే అన్నిటినీ తయారు చేస్తారు. వాటిని ప్రపంచవ్యాప్తంగా విక్రయిస్తారు. రాష్ట్రంలోనూ అటువంటి వాతావరణాన్ని తీసుకురావాలని నిర్ణయించాను.

మనది ప్రజాస్వామ్యం! ఇక్కడ ప్రజలదే అధికారం! కానీ, ఇప్పుడు రాష్ట్రంలో పరిస్థితి ఏమిటి!? కనీసం ఒక్కరంటే ఒక్కరైనా సంతోషంగా ఉన్నారా!? అధికారం కాదు కదా.. కనీసం ప్రశాంతంగా, కనీసం ఒక్క పూటయినా కడుపు నిండా తినే పరిస్థితి ఉందా!? ప్రజలతో ఎన్నికైన ఈ ప్రభుత్వం ఎంత అన్యాయంగా వ్యవహరిస్తోంది!! ఈరోజు ఉదయం గిరిజన తండాల్లో పర్యటించా. వాస్తవ పరిస్థితి చూసి కళ్లు బైర్లు కమ్మాయి. తండాల్లోని వారంతా పేద లంబాడాలు. కొండ కోనల్లో కష్టపడి నాలుగు రాళ్లు వెనకేసుకున్నారు. సొంత డబ్బులతో ఇళ్లు కట్టుకున్నారు. కానీ, ఇందిరమ్మ పథకం కింద కట్టామని చెప్పుకొని వాటికి కూడా బిల్లులు చేసుకుని కాంగ్రెస్ నాయకులు మింగేశారు. ఇంతకంటే దారుణం మరొకటి ఉంటుందా?

జగన్నాథ్‌పూర్‌లో అమాయక రైతులు. వారికి చదువు రాదు. వారి పొలాలను కొంతమంది స్థానిక కాంగ్రెస్ నాయకులు కౌలుకు తీసుకున్నారు. వాటిలో గంజాయి పండిస్తున్నారు. పంట సొమ్మును వారు జేబుల్లో వేసుకుంటున్నారు. పోలీసులు వచ్చి కేసులు పెడితే అసలు రైతును బుక్ చేయిస్తున్నారు. ఏ పాపం చేయకుండానే రైతులు జైలుకు వెళ్లాల్సి వస్తోంది.

ఉపాధి హామీ పథకంలోనూ కూలీల పేరిట డబ్బులను మింగేస్తున్నారు. దారిలో కలుపు తీసుకుంటున్న ఉల్లి రైతును చూశాను. కన్నీళ్లు ఒక్కటే తక్కువ. బొల్లారం నుంచి కొంతమంది కార్మిక సోదరులు వచ్చి సంఘీభావం తెలిపారు. విద్యుత్తు కోతలతో తాము రోడ్డున పడ్డామని కన్నీరు మున్నీరయ్యారు. ప్రతి ఒక్కరూ గుండెల నిండా ఆవేదనతో చెప్పేది ఒకటే మాట.. ఆదుకోండి అని!!

సంగారెడ్డి, నవంబర్ 25 (ఆంధ్రజ్యోతి) : టీఆర్ఎస్‌తో పొత్తు పెట్టుకోకపోతే గత ఎన్నికల్లో తామే గెలిచేవారమని తెలుగుదేశం పార్టీ అధినేత చంద్రబాబు అన్నారు. తాను చెప్పిన విషయాలపై ఆలోచించి,వాస్తవమని నమ్మితే తనకు సహకరించాలని ప్రజలను కోరారు. "తెలుగుదేశం అధికారంలోకి వస్తే ఇంటికి పెద్దకొడుకులా మీ జీవితాల్లో ఆనందం నింపుతా''నని చంద్రబాబు హామీ ఇచ్చారు. మెదక్ జిల్లాలో ఎనిమిదో రోజైన ఆదివారం ఆయన మనూర్ నుంచి నారాయణఖేడ్ వరకు 9 కిలోమీటర్లు నడిచారు.

శనివారం రాత్రి మనూర్‌లో బస చేసిన చంద్రబాబు ఆదివారం మధ్యాహ్నం వరకు కొంత విరామం తీసుకున్నారు. ప్రతి ఆదివారం ఆయన కుటుంబ సభ్యులకు సమయమిస్తున్నారు. అందులో భాగంగా సతీమణి భువనేశ్వరితో మధ్యాహ్నం వరకు గడిపారు. అనంతరం ఎంపీ దేవేందర్‌గౌడ్‌తో మాట్లాడి 2.30 గంటల సమయంలో నడక ప్రారంభించారు. పాదయా।త మొదట్లోనే వికలాంగులు ఎదురై సమస్యలు చెప్పుకున్నారు. అక్కడే ఉన్న వృద్దురాలు రత్నమ్మను పలకరించగా, పింఛను రావడం లేదని వాపోయింది.

మనూర్ తాండాకు వెళ్లి గిరిజనులతో మాట్లాడారు. ఇందిరమ్మ పథకంలో భాగంగా ఇళ్లు కట్టుకున్నా బిల్లులు చెల్లించడం లేదని వారు వాపోయారు. టీఎన్‌టీయుసి ఆధ్వర్యంలో జిన్నారం మండలం నుంచి సుమారు వంద మంది కార్మికులు ఆయన సమక్షంలో పార్టీలో చేరారు. జగన్నాథపూర్ సమీపంలో రాణాపూర్‌కు చెందిన రైతు సంగారెడ్డిని కలవగా, పంట నష్టపరిహారం అందలేదని ఆవేదన వ్యక్తం చేశాడు. ఆదర్శరైతుల ద్వారా కాంగ్రెస్ నాయకులే ఇన్‌పుట్ సబ్సిడీ డబ్బులను స్వాహా చేస్తున్నారని సంగారెడ్డి ఫిర్యాదు చేయగా, న్యాయం చేస్తానని భరోసా ఇచ్చారు.

ఈ క్రమంలో పిప్రీ గ్రామ శివారులో పోమ్యానాయక్‌కు చెందిన ఉల్లిగడ్డ పంటను చూశారు. ఈ సమయంలో కార్యకర్తలు, మీడియా కొంత హడావుడిచేయడంతో పంట కొంత దెబ్బతింది. దీనికిగాను పోమ్యానాయన్‌కు చంద్రబాబు రెండు వేల రూపాయలు పరిహారంగా ఇచ్చారు. ఈ సందర్భంగా పిప్రి, నారాయణఖేడ్‌లలో జరిగిన సభలలో చంద్రబాబు ప్రసంగించారు. కేసీఆర్‌పై విరుచుకుపడ్డారు.

ఆయన పార్టీతో పొత్తు వల్ల నష్టపోయామని ఒకింత ఆవేదన వ్యక్తం చేశారు. సినీనటుడు చిరంజీవి.. పార్టీ పెట్టక పోయినా అధికారంలోకి వచ్చే వారమన్నారు. తెలంగాణకు ఎప్పుడూ తమ పార్టీ వ్యతిరేకం కాదని, అలాగెప్పుడూ మాట్లాడలేదని చెప్పారు. తెలంగాణ గురించి మహానాడులో తమ వైఖరి చెప్పామని, అఖిలపక్షం పెట్టాలని కేంద్రానికి లేఖ రాశామని గుర్తుచేశారు.

దీనిపై కేంద్రం నాటకాలాడుతున్నదని విమర్శించారు. అసలు కేసీఆర్‌కు మంత్రి పదవి ఇచ్చి ఉంటే బయటకు పోయేవారా? పార్టీ పెట్టేవారా అంటూ ప్రశ్నించారు. ముఖ్యమంత్రి కిరణ్‌కుమార్‌రెడ్డి తన సీటును కాపాడుకునేందుకే ప్రయత్నిస్తున్నారని, ప్రజల సమస్యలను పట్టించుకోవడం లేదని విమర్శించారు. పంటలకు గిట్టుబాటు ధర రాక, కరెంట్ సరఫరా కాక, విత్తనాలు, ఎరువులు దొరకక రైతులు అవస్థలు పడుతుంటే ముఖ్యమంత్రి కిరణ్‌కుమార్‌రెడ్డి మాత్రం కనీస స్పందన కనబరచడం లేదన్నారు.

వ్యవసాయ ధరలపై కనీసం సమీక్షలు కూడా నిర్వహించడం లేదని విమర్శించారు. నిత్యావసర సరకుల ధరలు పెరిగి ప్రజలు అనేక అవస్థలు పడుతున్నారన్నారు. 30 రూపాయలకు కిలో ఉన్న మంచినూనే 110 రూపాయలైందని, ఆ స్థాయిలో ప్రజల ఆదాయం మాత్రం పెరగలేదన్నారు. "ఇది రాక్షస ప్రభుత్వం. అవినీతి, అసమర్థ, పేదల వ్యతిరేక ప్రభుత్వం. ఈ ప్రభుత్వం ఒక్క రోజు కూడా సాగడానికి వీల్లేదు'' అని మండిపడ్డారు.

రైతులకు రుణ మాఫీ చేస్తానంటే సీఎం కిరణ్ కిరికిరి పెడుతున్నారని విమర్శించారు. రైతులకు ఎప్పుడూ కాంగ్రెస్ వ్యతిరేకమేనన్నారు. తొమ్మిదేళ్లు అధికారంలో ఉన్న కాంగ్రెస్ నాయకులు దొంగల్లా దోచుకుని తల్లి కాంగ్రెస్, పిల్ల కాంగ్రెస్‌లుగా విడిపోయారని చెప్పారు. ఆ నాయకులు ఇలా రెండు పార్టీలుగా ఎందుకు విడిపోయారో చెప్పాలన్నారు. అక్రమంగా దోచుకున్న డబ్బులను కాపాడుకోవడానికే పిల్ల కాంగ్రెస్ ఏర్పాటయిందని పేర్కొన్నారు. బీసీలకు సామాజిక న్యాయం కల్పించేందుకే బీసీ డిక్లరేషన్ ప్రకటించామన్నారు.

టీడీపీ హయాంలో వరుణుడు శీతకన్నేయడం వల్ల వర్షానికి కరువొచ్చింది. కానీ.. ఎన్నడూ ఎరువుకు కరువు లేదు. పురుగు మందులకు కరువు లేదు. విత్తనాలకు కరువు లేదు. విద్యుత్తుకూ కరువు లేదు. ఇప్పట్లా చుక్కల్లో కాకుండా వాటి ధరలూ నేలమీదే ఉండేవి. పంట ఉత్పత్తుల మద్దతు ధరకూ కరువు ఉండేది కాదు! కానీ, ఇప్పుడు ఇదేం దౌర్భాగ్యం!? అన్నీ ఉన్నా అల్లుడి నోట్లో శని చందంగా.. విత్తనాల ధర పెంచేశారు. ఎరువులు, పురుగు మందుల ధరలను చుక్కల్లో కలిపేశారు.

విద్యుత్తు మాటే లేదు. అయినా, అసలు, కొసరు అంటూ చార్జీలతో బాదేస్తున్నారు. ఆరుగాలం కష్టపడి పండించిన పంటకూ మద్దతు ధర లేదు. ఈ ప్రభుత్వ విధానాల కారణంగానే రైతులు అప్పుల పాలయ్యారు. ఫలితంగా ఆత్మహత్యలకు పాల్పడుతున్నారు. ఇలాంటి విపత్కర పరిస్థితుల్లో ప్రభుత్వం అధికారాన్ని చలాయించడమే కాదు.. బాధ్యతనూ తీసుకోవాలి. వారిలో ఆత్మస్థైర్యాన్ని పెంచాలి. ప్రభుత్వం తనకు ఉన్న విస్తృత అధికారాలను రైతుల్లో ఆత్మస్థైర్యాన్ని నింపడానికి ఉపయోగించాలి. కానీ, ఇప్పుడు అటువంటి పరిస్థితి లేదు. రైతుల దుస్థితిని చూసే వారి రుణాలను మాఫీ చేయాలని నిర్ణయించుకున్నాను. ఈ ఒక్క హామీతోనే వారు గట్టెక్కుతారని కూడా భావించడం లేదు. ఎరువులపై సబ్సిడీ ఇవ్వాలి. ఉచితంగా విద్యుత్తు ఇవ్వాలి. పంట ఉత్పత్తులకు గిట్టుబాటు ధర కల్పించాలి.

ఇలాంటి ఆలోచనలను నేను చేస్తుంటే, తల్లి కాంగ్రెస్, పిల్ల కాంగ్రెస్ నేతలు విమర్శిస్తున్నారు. వాళ్లకు వాళ్ల కుటుంబాలు బాగుంటే చాలు. వాళ్లు దోచుకుని బాగుపడితే చాలు. రైతులకు మేలు జరిగే నిర్ణయాలను భరించలేకపోతున్నారు. ఆత్మస్థైర్యం కోల్పోయిన వారిలో మరిన్ని అనుమానాలను కలిగించే ప్రయత్నం చేస్తున్నారు. ఇది దారుణం!

ముఖ్యమంత్రి కిరణ్‌కుమార్‌రెడ్డిపై తెలుగుదేశం పార్టీ అధినేత మరోసారి చెలరేగి విమర్శలు చేశారు. రుణ మాఫీకి 'కిరికిరి' పెడుతున్న కిరణ్...అవినీతి మంత్రులను మాత్రం బాగా వెనకేసుకువస్తున్నారని చంద్రబాబు కన్నెర్ర చేశారు. వాన్‌పిక్ వ్యవహారంలో మంత్రి ధర్మాన ప్రసాదరావుపై సీబీఐ చార్జిషీట్ వేయగా.. సీఎం క్లీన్‌చిట్ ఇస్తున్నారని ఘాటుగా విమర్శించారు. ఇలాంటి సీఎం పాలనకు పనికిరాడని, తక్షణం జైలుకు పంపాలని డిమాండ్ చేశారు. ఈ రెండేళ్లలో ఏమి చేశారని సంబరాలు జరుపుకొంటారని మెదక్‌జిల్లా పాదయాత్రలో నేరుగా కిరణ్‌ను నిలదీశారు. రైతుల రుణమాఫీపై బహి రంగ చర్చకు రావాలని కాంగ్రెస్, వైసీపీ నేతలనూ సవాల్ చేశారు. ఆ రెండు పార్టీలను గెలిపిస్తే ఇళ్ల కప్పులూ మిగలనివ్వరని హెచ్చరించారు. జగన్ దోచుకున్న లక్ష కోట్లను స్వాధీనం చేసుకొంటే ఒకటి కాదు.. మూడు సార్లు రుణమాఫీ చేయొచ్చునని స్పష్టం చేశారు. దొంగలూ దోపిడీలూ పోయి రాష్ట్రమూ ప్రజలూ అభివృద్ధి చెందేందుకు టీడీపీని అధికారంలోకి తీసుకురావాలని కోరారు. అలాచేస్తే.. బీఎడ్ అభ్యర్థులను ఎస్జీటీ పోస్టుల్లో భర్తీ చేస్తామని, 'టెట్' రద్దు చేసి ఏటా డీఎస్సీలు నిర్వహిస్తామని హామీ ఇచ్చారు. ముస్లింల కోసం ప్రత్యేక ఇస్లామిక్ బ్యాంకును పెట్టి వడ్డీ లేని రుణం అందిస్తామని, ప్రత్యేక డీఎస్సీల ద్వారా ఉర్దూ టీచర్ పోస్టులను భర్తీ చేస్తామని, ఇమామ్‌లకు రూ. ఐదు వేలు, మౌజమ్‌లకు రూ. మూడు వేల చొప్పున వేతనాలు అందిస్తామని వాగ్దానం చేశారు. బీసీల కోసం పది వేల కోట్లతో ప్రత్యేక కార్యాచరణ ప్రకటిస్తామని, గొల్లకురుమల కోసం రూ. 500 కోట్లతో బడ్జెట్ రూపొందిస్తామని భరోసా ఇచ్చారు.

సంగారెడ్డి , నవంబర్ 24 (ఆంధ్రజ్యోతి) : అవినీతి మంత్రి ధర్మాన ప్రసాదరావును కాపాడేందుకు ప్రయత్నిస్తున్న ముఖ్యమంత్రి కిరణ్‌కుమార్‌రెడ్డిని జైలులో పెట్టాలని టీడీపీ అధినేత చంద్రబాబు తీవ్రంగా మండిపడ్డారు. దొంగలను కాపాడే ముఖ్యమంత్రిని ఏమనాలని తీవ్ర స్వరంతో ప్రశ్నించారు. చార్జిషీట్‌లో మంత్రి పేరును సీబీఐ ప్రస్తావించినా "ధర్మాన తప్పు ఏమీ లేద''ని కిరణ్‌కుమార్‌రెడ్డి చెప్పడం విడ్డూరమని ధ్వజమెత్తారు. తెల్లదొరల పాలనలో జరిగిన దోపిడీకన్నా వైఎస్ ఎక్కువగా దోచుకున్నారని ఘాటుగా విమర్శించారు.

మెదక్ జిల్లాలో ఏడో రోజయిన శనివారం న్యాల్‌కల్, మనూర్ మండలాల్లో చంద్రబాబు పాదయాత్ర కొనసాగింది. పలు ప్రాంతాలలో జరిగిన సభల్లో కిరణ్, కాంగ్రెస్, వైసీపీ నేతలపై నిప్పులు చెరిగారు. వాన్‌పిక్ భూముల కేటాయింపులో ధర్మాన ప్రసాద్‌రావు డబ్బులు తిని సంతకాలు చేశారని విమర్శించారు. 26 జీవోలకు సంబంధించి సుప్రీంకోర్టు ఆరుగురు మంత్రులకు నోటీసులిస్తే వారికీ ముఖ్యమంత్రి అండగా ఉంటున్నారని ధ్వజమెత్తారు. " ముఖ్యమంత్రిగా రెండేళ్లు పూర్తి చేసుకున్నానని గొప్పగా చెప్పుకుంటున్న కిరణ్‌కుమార్‌రెడ్డి ఈ కాలమంతా ఏమి సాధించారు? మద్యం సిండికేట్‌ల వ్యవహారంలో 1100 మంది ఉద్యోగులపై ఏసీబీ కేసులు నమోదు చేసింది.

మరి ఈ కేసులో మంత్రుల మాటేమిటి?. సిండికేట్లలో దోచుకున్న వారంతా హాయిగా ఉన్నారు. బొత్స మాఫియా లిక్కర్ డాన్ అని ఆ పార్టీకి చెందిన కేంద్ర మంత్రి కిశోర్ చంద్రదేవ్ అ«ధిష్ఠానానికి లేఖ రాశారు'' అని గుర్తుచేశారు. రైతులకు రుణాలను మాఫీ చేస్తానని తాను ప్రకటిస్తే ఎలా చేస్తారో చెప్పాలని కాంగ్రెస్, వైసీపీ ప్రశ్నించడం అర్ధరహితమన్నారు. జగన్ దోచుకున్న లక్ష కోట్ల రూపాయలను స్వాధీనం చేసుకుంటే ఒక్కసారి కాదు మూడుసార్లు రైతుల రుణాలను మాఫీ చేయవచ్చన్నారు. దీనిపై ఆ పార్టీలతో బహిరంగ చర్చకు సిద్ధమని సవాల్ విసిరారు. రుణమాఫీ ఎలా సాధ్యమో నిరూపిస్తామని స్పష్టం చేశారు. కాగా, తెలుగుదేశం అధికారంలోకి రాగానే 'టెట్'రద్దు చేసి ఏటా డీఎస్పీ నిర్వహించి ఉపాధ్యాయ పోస్టులను భర్తీ చేస్తామని చంద్రబాబు తెలిపారు.

బీఈడీ అభ్యర్థులను ఎస్జీటీ పోస్టులలో భర్తీ చేసేందుకు చర్యలు తీసుకుంటామన్నారు. రూపాయి కిలో బియ్యం, ఇతర సంక్షేమ కార్యక్రమాలను రద్దు చేసి 'నగదు బదిలీ' చేస్తామంటే ఊరుకునేది లేదని హెచ్చరించారు. మైనారిటీల కోసం ప్రత్యేక ఇస్లామిక్ బ్యాంక్ ఏర్పాటు చేస్తామని ప్రకటించారు. మైనారిటీలకు ఈ బ్యాంక్ ద్వారానే మార్జిన్‌మనీ, రుణాలు అందిస్తామన్నారు. బడ్జెట్‌లో 2,500 కోట్ల రూపాయలను కేటాయించి ఆర్థికాభ్యున్నతికి కృషి చేస్తామన్నారు. ప్రత్యేక డీఎస్సీ ద్వారా ఉర్దూ టీచర్ పోస్టులను భర్తీ చేస్తామని హామీ ఇచ్చారు. ఇమామ్‌లకు, మౌజమ్‌లకు రూ.5 వేలు, రూ. 3 వేల చొప్పున వేతనాలు ఇస్తామని ప్రకటించారు.

స్థానిక సంస్థలకు ఎన్నికలు నిర్వహించే దమ్ము ఈ ప్రభుత్వానికి లేదని విమర్శించారు. దీనివల్ల ప్రజలు ఇబ్బందులు ఎదుర్కొంటున్నారని ఆవేదన వ్యక్తం చేశారు. తాము అధికారంలో ఉంటే ఇప్పటికే ఎన్నికలు నిర్వహించే వారమన్నారు. స్థానిక సంస్థలలో బీసీలకు రిజర్వేషన్లు కల్పిస్తామని, వారికోసం పది వేల కోట్ల రూపాయలతో ప్రత్యేక కార్యాచరణ ప్రకటిస్తామని చెప్పారు. గొల్లకురుమల కోసం 500 కోట్లతో బడ్జెట్ రూపొందించి, వడ్డీ లేని రుణాలు ఇస్తామన్నారు.

కాంగ్రెస్, వైసీపీలు అధికారంలోకి వస్తే మన ఇళ్లపై కప్పులు ఉండవని, బతుకు అధోగతేనన్నారు. రాష్ట్రంలో దొంగలు పడ్డారని, రాష్ట్రం అభివృద్ధి చెందాలంటే, తెలుగుదేశం అధికారంలోకి రావాలని చెప్పారు.

ఇషాంత్‌రెడ్డి తండ్రికి పరామర్శ
తెలంగాణ సాధన కోసం ఆత్మబలిదానం చేసుకున్న బసంత్ పూర్‌కు చెందిన ఇషాంత్‌రెడ్డి తండ్రి ఇంద్రసేనారెడ్డి శనివారం చంద్రబాబును కలిశారు. ఇబ్రహీంపూర్-చాల్కి చౌరస్తాల మధ్య కొద్దిసేపు బాబుతో కలిసి నడిచారు. కొడుకు పోయి పుట్టెడు దుఃఖంలో ఉన్న ఇంద్రసేనారెడ్డిని ఈ సందర్భంగా చంద్రబాబు ఓదార్చారు. అధికారంలోకి వస్తే ఇషాంత్‌రెడ్డి కుటుంబాన్ని తప్పకుండా ఆదుకుంటానని హామీ ఇచ్చారు.

" వైఎస్ రాజశేఖరరెడ్డి హయాంలో జగన్ దోచుకున్న లక్ష కోట్ల రూపాయలను రికవరీ చేస్తే రైతు రుణాలను మాఫీ చేయొచ్చు. అంతేకాదు, రాష్ట్రంలోని ప్రతి రైతుకూ రెండు లక్షల రూపాయలు చొప్పున పంచొచ్చు. నిజానికి, రైతులు తీసుకున్న రుణాలను మాఫీ చేయాలని 2009కి ముందు నేనూ, ఎస్పీ నేత ములాయంసింగ్, అన్నాడీఏంకే అధినేత్రి జయలలిత కలిసి జాతీయ స్థాయిలో ఉద్యమించాం. అప్పట్లో నా ప్రయత్నాలను వైఎస్ గట్టిగా వ్యతిరేకించారు. రుణమాఫీ చేస్తే బ్యాంకులు దివాలా తీస్తాయంటూ ఆయన కేంద్రానికి లేఖ కూడా రాశారు. దానికి బదులు రైతులకు ఐదు వేల రూపాయల చొప్పున చెల్లిస్తే సరిపోతుందని సూచించారు. అయితే మా ఒత్తిడికి కేంద్రం దిగి వచ్చి రుణమాఫీ ప్రకటించింది. పంచాయతీ సర్పంచ్‌గా కూడా ఎన్నిక కాలేని వారూ అవినీతి డబ్బుతో పార్టీ పెట్టిన వారా రుణ మాఫీపై నన్ను ప్రశ్నించేది?''
- సంగారెడ్డి సభలో చంద్రబాబు

సంగారెడ్డి, నవంబర్ 23 (ఆంధ్రజ్యోతి): రైతుల రుణాలను మాఫీ చేసేందుకు తల్లి కాంగ్రెస్, పిల్ల కాంగ్రెస్ (వైసీపీ) వ్యతిరేకమని టీడీపీ అధినేత చంద్రబాబు ధ్వజమెత్తారు. వైఎస్ రాజశేఖరరెడ్డి హయాంలో ఆయన కుమారుడు వైఎస్ జగన్ దోచుకున్న లక్ష కోట్ల రూపాయలను రికవరీ చేస్తే రైతు రుణ మాఫీ పెద్ద విషయమేమీ కాదని తెగేసి చెప్పారు. అంతేకాదు, ఆర్ఆర్ చట్టం కింద ఆ డబ్బునంతా వెలికితీస్తే, రాష్ట్రంలోని ప్రతి రైతుకూ రెండు లక్షలు చొప్పున సాయం చేయొచ్చుననీ సూచించారు.

"చంద్రబాబూ.. ఏ ప్రభుత్వాన్ని అడిగి రైతు రుణ మాఫీ చేస్తావో చెప్పు..''అని వైసీపీ నాయకురాలు విజయలక్ష్మి చేసిన సవాల్‌కు చంద్రబాబు దీటుగా ప్రతిస్పందించారు. రైతు రుణం విషయమై కాంగ్రెస్ ఫ్రభుత్వం, వైఎస్ చేసిన ద్రోహాన్ని వివరిస్తూ మెదక్ జిల్లాలో ఆరో రోజు పాదయాత్రను చంద్రబాబు కొనసాగించారు. ఆయన శుక్రవారం ఝరాసంగం, న్యాల్‌కల్ మండలాలలో పలు సభల్లో ప్రసంగించారు. ఈ సందర్భంగా పదేపదే రైతు రుణ మాఫీ అంశాన్ని ప్రస్తావిస్తూ వైఎస్‌పైనా కేంద్ర ప్రభుత్వంపైనా నిప్పులు చెరిగారు. '2009కి ముందు మేం ఉద్యమిస్తే.. రుణమాఫీ చేస్తే బ్యాంకులు దివాళా తీస్తాయని అప్పటి సీఎం వైఎస్ అడ్డుతగిలారు.

అదే విషయం ఆయన కేంద్రానికి లేఖ కూడా రాశారు. దానికి బదులు రైతులకు ఐదు వేల రూపాయల చొప్పున చెల్లిస్తే సరిపోతుందని సూచించారు. అయితే మా ఒత్తిడికి కేంద్రం దిగి వచ్చి రుణమాఫీ ప్రకటించింది'' అని వివరించారు. రుణ మాఫీ ఎలా చేస్తారని విజయలక్ష్మి ప్రశ్నించడాన్ని ఆయన ఎద్దేవా చేశారు. 'పంచాయతీ సర్పంచ్‌గా కూడా ఎన్నిక కాలేని వారూ.. అవినీతి డబ్బుతో పార్టీ పెట్టిన వారా నన్ను అడిగేది?' అని ప్రశ్నించారు. తొమ్మిదేళ్లు ముఖ్యమంత్రిగా పని చేసిన తనకు రైతుల రుణాలను ఎలా మాఫీ చేయాలో తెలుసన్నారు.

అధికారంలోకి వచ్చాక మొదటి సంతకం రైతుల రుణమాఫీపైనే ఉంటుందని చంద్రబాబు పునరుద్ఘాటించారు. కాగా, ముఖ్యమంత్రిగా రెండేళ్లు పూర్తి చేశానని సంబరాలు చేసుకుంటున్న కిరణ్ ఏం సాధించారో చెప్పాలని డిమాండ్ చేశారు. ప్రతీ ప్రజాసంక్షేమ పనికి ఏదో అడ్డంకి సృష్టించి కిరికిరి రెడ్డిగా మారారన్నారు. రాష్ట్రంలో నెలకొన్న కరెంట్ సంక్షోభానికి రోశయ్య, కిరణ్‌కుమార్‌రెడ్డిలే కారణమని చంద్రబాబు విమర్శించారు. కిరణ్ ప్రజల సీఎం కాదని, సీల్డ్‌కవర్ సీఎం అని విమర్శించారు. మరోవైపు స్థానిక మంత్రి గీతారెడ్డి అభివృద్ధి పనులు ఏమి చేస్తున్నారని ప్రశ్నిస్తున్నారు.

అవినీతికి పాల్పడే కాంగ్రెస్ నాయకులను చిత్తుచిత్తు చేసి శాశ్వతంగా రాజకీయాలకు దూరం చేయాలని పిలుపునిచ్చారు. చిరుధాన్యాలకు గిట్టుబాటు ధర కల్పించాలని తుల్జమ్మ కోరగా, అధికారంలోకి వస్తే గిట్టుబాటు ధర కల్పిస్తానని హామీనిచ్చారు. చిరుధాన్యాలను ఆహారంగా తీసుకుంటే ఎలాంటి రోగాలు రావని ఆయన సూచించారు. తాము అధికారంలోకి వస్తే బీఈడీ అభ్యర్థులకు ఎస్‌జీటీతో పాటుగా నిరుద్యోగ వ్యవస్థను పూర్తిగా నిర్మూలిస్తానని హామీనిచ్చారు.

అది ఆరు పేజీల ముచ్చట
'మీపై కొన్ని పత్రికలలో వ్యతిరేక వార్తలు వెల్లువెత్తుతున్నాయ'ని యువకులు చంద్రబాబు దృష్టికి తెచ్చారు. దానిపై ఆయన తేలిగ్గా స్పందించారు. 'నాపై రాయడానికి ఒకే ఒక్క అవినీతి మీడియా సాక్షి ఉంది. నా గురించి మూడు పేజీలు రాస్తారు. వారి గురించి మూడు పేజీలు రాసుకుంటారు అంతే' అని వ్యాఖ్యానించారు. అవినీతిపై పోరాడడమే కాకుండా అవినీతి నాయకులకు బుద్ధి చెప్పాలని సూచించారు. కడపలో పార్టీ ఉపాధ్యక్షుడు శశికుమార్ వాహనాన్ని దగ్ధం చేసిన సంఘటనపై తక్షణమే విచారణ జరిపించాలని, దుండగులను వెంటనే అరెస్ట్ చేయాలని డిమాండ్ చేశారు.

దూకుడు పెంచిన బాబు!
తెలంగాణపై ఆచితూచి మాట్లాడే చంద్రబాబు అనూహ్య దూకుడు ప్రదర్శిస్తున్నారు. 'అభివృద్ధి' చర్చ నుంచి పక్కకు పోకుండానే ఎదురుదాడిని పెంచేశారు. తెలంగాణ ఉద్యమ సారథి సొంత గడ్డపైనే ఆయననూ ఆయన పార్టీనీ చంద్రబాబు తూర్పారపడుతున్న తీరు చర్చనీయాంశంగా మారింది. మెదక్ జిల్లాలో ఆరు రోజులుగా పాదయాత్రలో ఉన్న చంద్రబాబు తెలంగాణకు టీడీపీ వ్యతిరేకం కాదని పదేపదే నొక్కిచెప్పారు.

భవిష్యత్తులోనూ తెలంగాణ రాష్ట్ర ఏర్పాటును వ్యతిరేకించబోదని రెట్టించిన స్వరంతో చెప్పడం పార్టీ వర్గాలకు ఊరటనిచ్చింది. 'ఆరు నెలలు నిద్ర.. ఒక రోజు గారడీ మాటలు'గా కేసీఆర్ ఉద్యమిస్తున్నారని కూడా బాబే ఎద్దేవా చేశారు. దీన్నిబట్టి ఆ పార్టీనీ, కేసీఆర్‌నూ చంద్రబాబు లక్ష్యం చేసుకొని ముందుకు వెళుతున్నట్టు జిల్లాలోని రాజకీయ వర్గాలు భావిస్తున్నాయి. చంద్రబాబు ఇస్తున్న ఊపుతో ఇక తమకు తెలంగాణలో ఇబ్బందులు తొలగినట్టేనని పార్టీవర్గాలు అంటున్నాయి. మరోవైపు నడిపించే నాయకుడు నడుస్తుంటే..అనుసరించాల్సిన అనుచరులు వాహనాలను ఆశ్రయిస్తున్నారు.

వయస్సునూ లెక్కచేయకుండా అధినేత ముందుకు దూసుకెళుతుంటే అనుయాయులు మాత్రం కార్లపై అనుసరిస్తున్నారు. మెదక్ జిల్లాలో ఆరు రోజులుగా కొనసాగుతున్న చంద్రబాబు పాదయాత్రలో కనిపిస్తున్న దృశ్యమిది. సెక్యూరిటీ భారీ స్థాయిలో ఉండడం, వారికి తోడు రోప్‌పార్టీ దూకుడు వల్ల.. చంద్రబాబుతో కలిసి పాదయాత్ర చేయడం అందరికీ సాధ్యం కావడం లేదు. ఈ కారణంగానే తామంతా ఏదో వాహనంలో వెళ్లాల్సి వస్తున్నదని స్థానిక నేతలు చెబుతున్నారు.