టీడీపీ అధినేత చంద్రబాబు 'వస్తున్నా.. మీ కోసం' పాదయాత్ర మంగళవారం మహబూబ్‌నగర్ జిల్లా ఆత్మకూర్ మండల కేంద్రంలోని ఆంజనేయ స్వామి దేవాలయం నుంచి ప్రారంభమవుతుంది. అక్కడి నుంచి బయలు దేరి సుమారు మూడు కిలోమీటర్ల దూరంలోని ఆత్మకూర్‌కు చేరుకుంటారు. అనంతరం కానాపూర్, సింగంపేట క్రాస్, మస్తీపూర్ గేట్, అమరచింత, వీప్లనాయక్ తండా, చంద్రానాయక్ తండా ద్వారా మద్దూర్ చేరుకుంటారు. రాత్రికి అక్కడే చంద్రబాబు బస చేస్తారు.

 తెలంగాణ ప్రాంతానికి న్యాయం చేసే బాధ్యత తెలుగుదేశం పార్టీదేనని చంద్రబాబునాయుడు వెల్లడించారు. ఇప్పుడు గానీ, భవిష్యత్తులో గానీ తాను తెలంగాణకు వ్యతిరేకం కాదని పునరుద్ఘాటించారు. పేదలు బతకడమే కష్టంగా మారిందని, వారి కష్టాలు తీర్చేదాకా నిద్రపోనని ప్రతీనబూనారు. కాంగ్రెస్ దొంగలను నమ్మితే మిగిలేది కష్టాలేనని హెచ్చరించారు. 'వస్తున్నా మీ కోసం' పాదయాత్రలో భాగంగా 27వ రోజు చంద్రబాబు మహబూబ్‌నగర్ జిల్లా ధరూర్, ఆత్మకూర్ మండలాల్లో పర్యటించారు.

రైతులు, మహిళలు, కూలీల సమస్యలను అడిగి తెలుసుకున్నారు. అధికారంలోకి వచ్చాక ప్రతి ఇంటికి మరుగుదొడ్డి, ఊరి మొత్తానికి సామూహిక మరుగుదొడ్లు నిర్మిస్తామని తెలిపారు. కాంగ్రెస్ అధికారంలోకి వచ్చాక ఒక్క ఇల్లు కూడా కట్టని ఊళ్లు ఎన్నో చూశానని చెప్పుకొచ్చారు. కొన్ని ప్రాంతాల్లో కొన్ని కుటుంబాలు పెత్తందారిగా వ్యవహరిస్తుండగా ప్రజలు బానిసలుగా ఉండాల్సిన దుస్థితి కొనసాగుతోందంటూ మంత్రి డీకే అరుణపై పరోక్షంగా మండిపడ్డారు. గిరిజన నాయకుడు కొమురం భీం, వాల్మీకి స్ఫూర్తితో టీడీపీ పని చేస్తుందని చంద్రబాబు అన్నారు.

వాల్మీకి జయంతి ఉత్సవాలను ప్రతి సంవత్సరం రాష్ట్ర ప్రభుత్వం అధికారికంగా నిర్వహించాలని డిమాండ్ చేశారు. బోయలను కర్ణాటకలో ఎస్టీలుగా, తమిళనాడులో ఎస్సీలుగా గుర్తిస్తుండగా, మన రాష్ట్రంలోని మైదాన ప్రాంతంలో మాత్రం బీసీలుగా గుర్తించడం శోయనీయమన్నారు. వారిని తక్షణం ఎస్సీ జాబితాలో చేర్చాలని కోరారు. కాగా, సోమవారం గంటకు రెండు కిలోమీటర్ల చొప్పున కొనసాగింది. ఆదివారం మధ్యాహ్నం మెల్లిమెల్లిగా నడిచిన చంద్రబాబు సోమవారం కొంత వేగం పెంచే ప్రయత్నం చేశారు.

ఉదయం 10.40 గంటలకు బయలుదేరిన ఆయన.. ధరూర్ మండలం పెద్దపాడు చేరుకొన్నారు. వేరు శనగచేనులోకి వెళ్లి మహిళా కూలీల సమస్యలను అడిగి తెలుసుకొన్నారు. కలుపు తీసే పరికరంతో కొద్దిసేపు కలుపు తీశారు. మధ్యాహ్నం ఒంటి గంటకు చిన్నచింత రేవులకు చేరుకొని స్థానికులను ఉద్దేశించి ప్రసంగించారు. సమీపంలోని కిరాణ షాపుకు వెళ్లి కూల్ డ్రింక్ తాగారు. మధ్యాహ్నం రెండున్నరకు జూరాల ప్రాజెక్టు వద్దకు చేరుకున్నారు. భోజనం చేసి కొద్దిసేపు విశ్రమించారు. 3.30లకు పాదయాత్ర కొనసాగించి ప్రాజెక్టు మీద నుంచి నందిమల్ల మీదుగా మూలమల్ల చేరుకున్నారు.

కరుణానిధి పరామర్శ: చంద్రబాబుకు తమిళనాడు మాజీ ముఖ్యమంత్రి, డీఎంకే అధినేత కరుణానిధి లేఖ రాశారు. ' బాబూ.. ఆరోగ్యం జాగ్రత్త'' అంటూ పరామర్శించారు. తగిన విశ్రాంతి తీసుకోవాలని బాబుకు సూచించారు. యాత్రలో భాగంగా మహబూబ్‌నగర్ జిల్లా గద్వాల్ పట్టణంలో వేదిక కూలడంతో చంద్రబాబు వెన్నుకు దెబ్బతగిలిన విషయం తెలిసిందే. కాగా, ఎమ్మెల్సీ చుక్కా రామయ్య, ప్రెస్ అకాడమీ మాజీ చైర్మన్ పొత్తూరి వెంకటేశ్వర్లు సోమవారం ఉదయం చంద్రబాబు పాదయాత్ర వద్దకు వచ్చి సంఘీభావం ప్రకటించి, ఆయనను పరామర్శించారు.

పాదయాత్ర తెలంగాణ సమస్యకు పరిష్కారం అవుతుందన్న ఆశాభావాన్ని చుక్కా రామయ్య వ్యక్తం చేశారు. కాగా, అధినేతకు సంఘీభావంగా టీడీపీ మహిళా విభాగం సోమవారం సాయంత్రం పాదయాత్రలో పాల్గొంది. విభాగం రాష్ట్ర అధ్యక్షుడు శోభాహైమావతి, రాష్ట్ర కార్యదర్శి జయశ్రీ తదితరులు ఆత్మకూర్ మండలం నందిమల్ల వద్ద పాదయాత్రలో పాల్గొన్నారు.

 తెలుగుదేశం పార్టీ అధికారంలోకి వస్తే పేదవారికి లక్ష రూపాయలు ఖర్చుపెట్టి ఉచితంగా ఇల్లు నిర్మిస్తామని ఆ పార్టీ అధినేత చంద్రబాబునాయుడు ప్రకటించారు. ప్రజల కష్టాలు తెలుసుకుని వారికి అండగా ఉండేందుకే ఈ యాత్ర చేపట్టినట్లు తెలిపారు. టీడీపీ అధికారంలోకి వస్తే పూర్తిగా బెల్టు షాపులు రద్దు చేస్తామని అన్నారు.

'వస్తున్నా...మీకోసం' పాదయాత్ర కార్యక్రమంలో భాగంగా చంద్రబాబు నాయుడు జిల్లాలోని సోమవారం థరూర్ మండలం, చినపాడు నుంచి 27 వ రోజు పాదయాత్రను ప్రారంభించారు. అక్కడి వేరు శెనగ, పత్తి పంటలను పరిశీలించిన బాబు రైతుల సమస్యలను అడిగి తెలుసుకున్నారు. అనంతరం చింతరేపుపల్లిలో ఏర్పాటు చేసిన సభలో ఆయన మాట్లాడుతూ ఆదరణ పథకం మళ్లీ అమలు చేస్తామని చెప్పారు. ఈ పథకం ద్వారా వృత్తిదారులకు పరికరాలు అందజేయనున్నట్లు తెలిపారు.

గ్రామాస్తులు తాగునీటి సమస్య గురించి ప్రస్తావించగా ఎన్టీఆర్ సుజల పథకం ద్వారా తాగునీటి సమస్య పరిష్కారానికి కృషి చేయనున్నట్లు చంద్రబాబు నాయుడు తెలిపారు. మహిళలు మరుగుదొడ్ల గురించి ప్రస్తావించగా ప్రతి ఇంటికి మరుగుదొడ్లు మంజూరు చేయనున్నట్లు చెప్పారు. అనంతరం అక్కడి నుంచి చంద్రబాబు మక్తల్ నియోజక వర్గంలో ప్రవేశంచారు. అక్కడ చంద్రబాబుకు నేతలు, అభిమానులు, కార్యకర్తలు, మహిళలు పెద్దన తరలవచ్చి స్వాగతం పలికారు.

  మహబూబ్‌నగర్ జిల్లా గద్వాల పట్టణంలో సభా వేదిక కూలి నడుము, కండరాల నొప్పికి గురైన చంద్రబాబు కొద్ది రోజుల పాటు రోజూ 15 కిలో మీటర్ల దూరంలోపే పాదయాత్ర చేయనున్నారు. ఈ మేరకు ఆయన షెడ్యూల్‌లో మార్పులు చేశారు. దీంతో ఆదివారం చంద్రబాబు నడకలో వేగం ముందుకంటే తగ్గింది. ప్రత్యేక బస్సు దిగిన ఆయన రెండున్నర కిలోమీటర్ల దూరంలో ఉన్న శెట్టి ఆత్మకూర్‌కు చేరుకునే సరికి సాయంత్రం 4 గంటలు అయ్యింది.

ఈ దూరం నడవడానికి ఆయనకు 1:15 గంటల సమయం పట్టింది. 8.8 కిలోమీటర్ల మేర నడిచి ధరూర్ మండలం భీంపురం వద్ద రాత్రి బస చేశారు. మట్టి రోడ్డుపైనే పాదయాత్రను కొనసాగిస్తున్నారు. పాదయాత్రలో భాగంగా బాబు అనంతపురం జిల్లాలో కొన్ని సందర్భాల్లో 20 నుంచి 24 కిలోమీటర్లు కూడా పాదయాత్ర చేసిన సంగతి తెలిసిందే. కొద్ది రోజుల తరువాత దూరాన్ని పెంచే అవకాశం ఉంటుందని టీడీపీ సీనియర్ నేత, ఎమ్మెల్యే రావుల చంద్రశేఖర్ రెడ్డి ఆంధ్రజ్యోతికి చెప్పారు.