తెలుగుదేశం పార్టీ అధినేత చంద్రబాబు నాయుడు బావ మరిది, సినీ హీరో నందమూరి బాలకృష్ణను గుజరాత్ ముఖ్యమంత్రి నరేంద్ర మోడీ తన ప్రమాణ స్వీకారానికి రావాల్సిందిగా ఆహ్వానించారు. రెండు రోజుల క్రితం బాలయ్యకు ఆయన ఫోన్ చేసి ఈ ఆహ్వానం అందచేసినట్లు సమాచారం. 'ఎన్టీ రామారావు అంటే మాకు గౌరవం. ఎన్టీఆర్ కుటుంబ సభ్యునిగా మిమ్మల్ని ఆహ్వానిస్తున్నాను. మీరు తప్పనిసరిగా రావాలి' అని ఆయన బాలయ్యను కోరారు.

తెలుగుదేశం పార్టీ రాజకీయంగా బిజెపితో దూరంగా ఉంటుండడంతో పార్టీ ప్రతినిధిగా కాకుండా ఎన్టీఆర్ కుటుంబం పేరుతో మోడీ ఆయనను ఆహ్వానించినట్లు కనిపిస్తోంది. మోడీ ఆహ్వానానికి బాలకృష్ణ వ్యక్తిగతంగా సానుకూలంగా ఉన్నారు. దేశవ్యాప్తంగా మంచి పేరు తెచ్చుకొన్న వ్యక్తి పిలిస్తే వెళ్ళడంలో తప్పులేదని, దానిని రాజకీయ కోణంలో చూడకుండా వెళ్తేనే బాగుంటుందని ఆయన అభిప్రాయపడుతున్నట్లు సమాచారం. కాని తాను తెలుగుదేశం పార్టీలో క్రియాశీలంగా ఉంటున్నందువల్ల పార్టీతో చర్చించిన తర్వాతే తుది నిర్ణయం తీసుకోవాలని ఆయన అనుకొంటున్నారు.

పార్టీ అధినేత చంద్రబాబుతో చర్చించి ఆయన అభిప్రాయం తీసుకొన్న తర్వాతే వెళ్ళాలో వద్దో ఆయన నిర్ణయించుకొనే అవకాశం ఉంది. 'బాలకృష్ణను మోడీ ఏ పేరుతో పిలిచినా ఆయన వెళ్ళడం అంటూ జరిగితే చంద్రబాబు పంపించారనే అంటారు. వెళ్ళాలో వద్దో రాజకీయంగా తీసుకోవాల్సిన నిర్ణయం. ఒకటి రెండు రోజుల్లో దీనిపై నిర్ణయం తీసుకోవచ్చు' అని ఆ పార్టీ వర్గాలు చెబుతున్నాయి.

  అక్రమాస్తుల వెలికితీతకు వైఎస్ జగన్‌కు చెందిన భవనాల్లో నేల మాళిగలను అత్యాధునిక సాంకేతిక పరిజ్ఞానంతో శోధించాలని తెలుగుదేశం పార్టీ పొలిట్‌బ్యూరో సభ్యుడు యనమల రామకృష్ణుడు డిమాండ్ చేశారు. సోమవారం ఆయన ఈ మేరకు ఒక ప్రకటన చేశారు. 'జగన్ వద్ద రూ. లక్ష కోట్ల డబ్బు ఉందని అందరూ అనుకొంటున్నారు. వాటిని బెంగుళూరు, హైదరాబాద్, పులివెందుల, ఇడుపులపాయ తదితరచోట్ల నిర్మించిన భవనాల నేళ మాళిగల్లో దాచి ఉంచారని ప్రచారం జరుగుతోంది.

సిబిఐ, ఇడి, కేంద్ర విజిలెన్స్ సంస్ధలు ఇంతవరకూ ఆ ప్రాంతాలకు వెళ్ళి తనిఖీలు చేయలేదు. దీనిపై అనేక అనుమానాలు కలుగుతున్నాయి. ఈ తనిఖీలు జరగకుండా తల్లి కాంగ్రెస్, పిల్ల కాంగ్రెస్‌ల మధ్య అవగాహన కుదిరిందనే అనుకోవాల్సి వస్తోంది' అని ఆయన అన్నారు. జగన్ అవినీతిని పూర్తి స్ధాయిలో నిర్దారించడానికి పై మూడు సంస్ధలు ప్రత్యేక తనిఖీ బృందాలను పెట్టి అత్యాధునిక సాంకేతిక పరిజ్ఞానంతో ఈ భవనాల నేల మాళిగల్లో తనిఖీలు నిర్వహించాలని, తమ నేత కడిగిన ముత్యంలా బయటకు వస్తాడని చెప్పే వైఎస్సార్ కాంగ్రెస్ నేతలు దీనికి పూర్తి స్ధాయిలో సహకరించాలని ఆయన కోరారు.

ఈ సంస్ధలు దీనికి స్పందించకపోతే టిడిపి తరపున తాము హైకోర్టు, సుప్రీం కోర్టుల దృష్టికి ఈ అంశాలు తీసుకువస్తామని, కోర్టు ఆధ్వర్యంలో విచారణ జరిపించాలని కోరతామని ఆయన పేర్కొన్నారు.