పూలబాట

మండలంలోని నక్కలంపేట, పరిటాలలో శనివారం జరిగిన చంద్రబాబు పాదయాత్రకు విశేష స్పందన లభించింది. పార్టీ కార్యకర్తలు, ప్రజలు అధిక సంఖ్యలో విచ్చేశారు. బాబును పూలపై నడిపించారు. మహిళలు గుమ్మడి కాయలతో దిష్టి తీసి, పాదయాత్ర విజయవంతం కావాలని హారతులిచ్చి దీవించారు. బాబు వెంట నడిచారు. ముస్లిం మహిళలు సైతం బాబును ఆశీర్వదించారు. కరెంట్ బిల్లులు ఎక్కువగా వస్తున్నాయని, ఒక బల్బు ఉన్నప్పటికీ వేలల్లో వస్తున్న బిల్లులు చూసి తట్టుకోలేకపోతున్నామని మహిళలు వాపోయారు. స్పందించిన బాబు టీడీపీ అధికారంలోకి వచ్చేవరకు ఓపిక పట్టాలన్నారు. పైలాన్ ఆవిష్కరణకు రాష్ట్ర, జిల్లా స్థాయి నాయకులు తరలివచ్చారు. పైలాన్ వద్దకు బాబును, భువనేశ్వరిని పూలపై డిపించుకుంటూ తీసుకువెళ్లారు. పరిటాలలో జనస్పందన చూసి బాబు సంతోషం వెలిబుచ్చారు. పరిటాలకు చరిత్రలో ఎంతో ప్రాధాన్యత ఉందన్నారు. నిజాంపై తిరుగు బాటు చేసి స్వతంత్ర గడ్డగా ఏర్పడిందన్నారు.