కర్నూలు : ఫొటోలు, ఫ్లెక్సీల వివాదం ఏదో రూపంలో రాజకీయ రంగాన్ని తాకుతూనే ఉంది. " ఎన్టీఆర్ కుమార్తెగా..మీ ఇంట్లో ఆయన ఫొటోలు పెట్టుకోండి. పూజించుకోండి. కానీ, ఆ మహానేత ఫొటోలను కాంగ్రెస్ నేతల చేతుల్లో పెట్టకండి'' అని టీడీపీ పోలిట్‌బ్యూరో సభ్యుడు, డోన్ ఎమ్మెల్యే కేఈ కృష్ణమూర్తి ..కేంద్ర సహాయ మంత్రి పురందేశ్వరికి సలహా ఇచ్చారు. కర్నూలులోని జిల్లా పార్టీ కార్యాలయంలో సోమవారం ఆయన విలేకరులతో మాట్లాడారు.

కాంగ్రెస్ పార్టీకి వ్యతిరేకంగానే అప్పట్లో ఎన్టీఆర్ టీడీపీని స్థాపించారని గుర్తు చేశారు. కాంగ్రెస్ పార్టీ వాళ్లని కుక్క మూతి పిందెలు అని ఎన్టీఆర్ విమర్శించేవారని, అధికారం కోసం అలాంటి పార్టీలో చేరిన పురందేశ్వరిని ఏమనాలో ఆమే చెప్పాలని కోరారు. ఎన్టీఆర్ బొమ్మను పెట్టుకొనే హక్కు టీడీపీకి మాత్రమే ఉందన్నారు. తెలుగుదేశం పార్టీకి లక్ష్మీపార్వతి శనిగ్రహం లాంటిదని, ఎన్టీఆర్ మరణానికి ఆమే కారణమని విమర్శించారు. ఆమె ఎన్టీఆర్ జీవితంలోకి రాకపోయి ఉంటే ప్రధాన మంత్రో, రాష్ట్రపతో అయ్యేవారని చెప్పారు.