రాష్ట్రంలో కాంగ్రెస్ పార్టీని కుళ్లబొడవాలని టీడీపీ అధ్యక్షుడు చంద్రబాబు నాయుడు పిలుపు నిచ్చారు. రానున్న సహకార ఎన్నికలలో ఆ పార్టీని గెలిపిస్తే రుణమాఫీని కూడా మింగేస్తారని హెచ్చరించారు. కృష్ణా జిల్లా జగ్గయ్యపేట నియోజకవర్గం మక్కపేట వద్ద ఆయన పాదయాత్ర ప్రారంభించారు. మక్కపేట, పెనుగంచిప్రోలులో జరిగిన బహిరంగ సభలకు జనం పోటెత్తారు. రాష్ట్ర ప్రభుత్వానికి ఎన్నికలకు వెళ్ళే సత్తాలేదని ఈ సందర్భంగాచంద్రబాబు దుయ్యబట్టారు.

పంచాయతీల కాలపరిమితి ముగిసినా, మునిసిపాలిటీలు, కార్పొరేషన్లు, జడ్‌పీటీసీలకు ఎన్నికలు నిర్వహించకుండా తాత్సారం చే స్తూ వస్తోందన్నారు. కేంద్ర ప్రభుత్వం చొరవతోనే సహకార ఎన్నికలకు ప్రభుత్వం వెళుతోందని విమర్శించారు. ఈ ఎన్నికలలో కాంగ్రెస్ పార్టీకి ఎట్టిపరిస్థితులలోను అవకాశం కల్పించవద్దని పదేపదే కోరారు. కాంగ్రెస్, వైసీపీలు రెండూ రుణమాఫీకి వ్యతిరేకమని చెప్పారు. అవినీతి వ్యతిరేక ఉద్యమాన్ని ప్రతి ఒక్కరూ చేపట్టాలని పిలుపునిచ్చారు. ప్రతి ఒక్కరు తమ ఫోన్ల నుంచి 5 ఎస్ఎంఎస్‌లు అవినీతి వ్యతిరేకత కోసం పంపిస్తే..ఒక ఉద్యమం ఊపందుకుంటుందని పేర్కొన్నారు.

తాము అధికారంలోకి వచ్చాక ప్రభుత్వం పెంచిన విద్యుత్ చార్జీలు తగ్గిస్తామని హామీ ఇచ్చారు. అలాగే.. దళిత క్రిస్టియన్లను ఎస్సీల జాబితాలో చేర్చి రిజర్వేషన్లు కల్పిస్తామని చెప్పారు. చంద్రబాబు ప్రసంగిస్తుండగా ఓ మహిళ లేచి, 'మీ హయాంలో ఆడ పిల్ల పుడితే డబ్బులు డిపాజిట్ చేసే పథకం పునరుద్ధరించండి సార్'' అని కోరగా సానుకూలంగా స్పందించారు. రెండు రోజులో దీనిపై ఆలోచించి ప్రస్తుత పరిస్థితులకు తగ్గట్టుగా ఎంత డిపాజిట్ (అప్పట్లో రూ. ఐదువేలు) చేయవచ్చు, ఏ సమయంలో ఆ డబ్బు వారికి అందించాలని తదితర అంశాలను నిర్ణయిస్తామని హామీ ఇచ్చారు.