చంద్రబాబుకు నీరాజనం..

జై చంద్రబాబు అంటూ యువత విక్టరీ మార్కును చూపిస్తూ చంద్రబాబును స్వాగతించారు. ఈ సందర్భంగా చంద్రబాబు గిరిజనులకు వరాల జల్లులు కురిపించారు. మైదాన ప్రాంత గిరిజనులకు సైతం ప్రత్యేక ప్యాకేజీని ప్రకటిస్తామన్నారు. రూ. 1.50 లక్షలతో గిరిజనులందరికి పక్కా గృహాలు నిర్మిస్తామని హామీ ఇచ్చారు. అలాగే ప్రతి 500 జనాభా కలిగిన తండాలను పంచాయతీలుగా ఏర్పాటు చేస్తామని పునరుద్ఘాటించారు. దీంతో గిరిజనులు చ ప్పట్లతో చంద్రబాబుకు మద్దతు ప్రకటించారు. కనీవినీ ఎరుగని రీతిలో జిల్లాలో కొనసాగిన ఈ పాదయాత్రకు కేవలం ఖానాపూర్ నియోజక వర్గంలోనే అత్యంత ఆదరణ, ఆప్యాయత లభించినట్లు స్పష్టమవుతోంది.

ఎంపీ తనయుడు రితీష్ రాథోడ్ సైతం యువత సమీకరణలో కీలక భూమిక పోషించారు. అలాగే ఖానాపూర్‌లో పెద్దఎత్తున అన్నదాన కార్యక్రమాన్ని ఏర్పాటు చేశారు. ఈ ఏర్పాట్లను మాజీ సర్పంచ్ ఆకుల శ్రీనివాస్ పర్యవేక్షించారు. చివరి రోజు బాదనకుర్తి వద్ద ఘనంగా వీడ్కోలు తెలిపి బాబు పాదయాత్రను విజయవంతం చేస్తామని ఎంపీ రాథోడ్ రమేష్, ఎమ్మెల్యే సుమన్‌రాథోడ్‌లు పేర్కొన్నారు.