వచ్చే స్థానిక సంస్థల ఎన్నికలపై తెదేపా పూర్తి స్థాయి దృష్టిసారించింది.
పంచాయితీ ఎన్నికల నేపథ్యంలో.. రాష్ట్రవ్యాప్తంగా ప్రాంతీయ సదస్సులను
నిర్వహించాలని పార్టీ నిర్ణయించింది. పంచాయితీల వారీగా ప్రతినిధులు
పాల్గొనే ఈ సదస్సలో స్థానిక సంస్థల ఎన్నికల్లో అనుసరించాల్సిన వ్యూహాలపై
చర్చించనున్నట్లు తెలుస్తోంది. ఈ ప్రాంతీయ సదస్సులలో భాగంగానే తెదేపా
అధినేత చంద్రబాబు నాయుడు రేపు (బుధవారం) విశాఖలో పర్యటించనున్నారు. పార్టీ
అధినేత చంద్రబాబు నాయుడు ఆధ్వర్యంలో.. వైజాగ్ లో నిర్వహించే ఈ ప్రాంతీయ
సదస్సుకు శ్రీకాకుళం, విజయనగరం, విశాఖ, తూర్పుగోదావరి జిల్లాల పంచాయితీల
నుంచి ప్రతినిధులు హాజరుకానున్నారు. అయితే, రాష్ట్ర వ్యాప్తంగా నిర్వహించే 6
ప్రాంతీయ సదస్సులలో విశాఖలో నిర్వహించే సదస్సు మొదటిది. కాగా, బాబు
రాష్ట్రవ్యాప్తంగా చేపట్టిన ”వస్తున్నా.. మీకోసం” పాదయాత్ర, చత్తీస్ గడ్
బాధితులను ఆదుకోవడంలో చూపిన చొరవ.. తదితర అంశాలు స్థానిక సంస్థల ఎన్నికల్లో
తెదేపాకు కలసివస్తోందని పార్టీ వర్గాలు భావిస్తున్నట్లు సమాచారం.
