చంద్రబాబు పాదయాత్రకు భారీ స్వాగత ఏర్పాట్లు

కౌంట్ డౌన్ మొదలైంది. గరికపాడు చెక్‌పోస్టు దగ్గర బాబుకు ఘన స్వాగతం పలకటానికి తెలుగుదేశం పార్టీ శ్రేణులు కదం తొక్కుతున్నాయి. లక్షమంది కార్యకర్తల గర్జన మధ్య బాబు జిల్లాలోకి అడుగు పెట్టే క్షణం కోసం ప్రతి ఒక్క తెలుగుదేశం పార్టీ కార్యకర్త ఆశతో ఎదురుచూస్తున్నాడు. సంక్లిష్ట రాజకీయాల నడుమ.. ప్రజల్లోకి చొచ్చుకు వెళ్లేందుకు 63 ఏళ్ళ వయసులో చంద్రబాబు పాదయాత్రతో జిల్లాలోకి అడుగు పెడుతున్నారు. రాష్ట్రస్థాయి నాయకులెవ్వరూ ఇప్పటి వరకు జిల్లాలో పాదయాత్ర తలపెట్టలేదు. జిల్లాలోకి అడుగు పెడుతున్న ఈ బాటసారికి ఘన స్వాగతం పలికేందుకు నాయకులు సిద్ధమయ్యారు. బాబు తొమ్మిది రోజుల పర్యటనను దిగ్విజయం చేయటానికి సర్వం సిద్ధం చేశారు. కాంగ్రెస్ హయాంలో జిల్లాలోని సమస్యలు ఒక్కటీ పరిష్కారం కాకపోవటాన్ని ప్రజల్లో చంద్రబాబు ఎత్తిచూపేలా చంద్రయాన్ షెడ్యూల్‌ను ఖరారు చేశారు. పార్లమెంట్ నియోజకవర్గం పరిధిలోని జగ్గయ్యపేట, మైలవరం, విజయవాడ పశ్చిమం, సెంట్రల్, తూర్పు నియోజకవర్గాలలో పాదయాత్ర జరిపే చంద్రబాబు మొత్తం 19 చోట్ల బహిరంగ సభల్లో మాట్లాడతారు.