ప్రియనేతకు జన దీవెన

 జిల్లాలో అడుగుపెడుతున్న చంద్రబాబుకు సమైక్యాంధ్రపై కనువిప్పు కలిగిస్తామని కాంగ్రెస్ నాయకులు చేసిన సవాళ్ళు గాలికి కొట్టుకు పోయాయి. బాటసారి చంద్రబాబుకు తెలంగాణ జిల్లాల కంటే మిన్నగా.. అశేష ప్రజానీకం బ్రహ్మరథం పట్టింది. దిక్కులు పిక్కటిల్లేలా ప్రజల జయజయధ్వానాలు, కేరింతల నడుమ చంద్రబాబు పాదయాత్ర తొలి రోజు ఎలాంటి ఆటంకం లేకుండా జరిగింది. చంద్రబాబు పార్టీకి ఏ విధంగా పూర్వవైభవం కల్పించాలని కలలు కన్నారో.. ఆ సన్నివేశం సోమవారం పాదయాత్రలో కనిపించింది. జిల్లాలోని దారులన్నీ.. జగ్గయ్యపేటవైపుకే దారి తీశాయి. జన సంద్రంతో జాతీయ రహదారి కిక్కిరిసిపోయింది. స్వచ్ఛందంగా పాదయాత్రకు వచ్చిన జనాన్ని చూసి, టీడీపీ అధినాయకుడే మహదానందపడిపోయారు. జాతీయ రహదారిపై పసుపు సైన్యం కవాతు చేసింది. పాదయాత్ర ఆద్యంతం నిండైన జనాభిమానం మధ్య సాగింది.