మైదాన ప్రాంతాల్లో నివసించే గిరిజనుల సమస్యల పరిష్కారానికి కృషి చేస్తానని
విజయవాడ పార్లమెంటు సభ్యులు లగడపాటి రాజగోపాల్ అన్నారు. ఆదివాసి సంక్షేమ
సంఘం ఆధ్వర్యంలో ఆదివారం స్థానిక స్వాతంత్య్ర సమరయోధుల భవన్‌లో ట్రైబల్
సబ్‌ప్లాన్‌పై రౌండ్ టేబుల్ సమావేశం జరిగింది. ఈ రౌండ్ టేబుల్ సమావేశానికి
కృష్ణా, గుంటూరు, పశ్చిమ గోదావరి జిల్లాల్లో వివిధ శాఖలలో పనిచేస్తున్న
ఎస్టీ ఉద్యోగులు హాజరయ్యారు. ఈ కార్యక్రమంలో లగడపాటి రాజగోపాల్ మాట్లాడుతూ
ఎస్సీ, ఎస్టీ సబ్‌ప్లాన్ చట్టం ఆమోదం తెలపడం ద్వారా రాష్ట్ర ప్రభుత్వం ఈ
వర్గాల సంక్షేమానికి కృషి చేస్తోందని అన్నారు.
ఏ రాష్ట్రంలో
లేనివిధంగా మన రాష్ట్ర ప్రభుత్వం ఎస్సీ, ఎస్టీ వర్గాల అభ్యున్నతి కోసం
సబ్‌ప్లాన్ ఏర్పాటు చేసిందన్నారు. ఈ నిధులు దుర్వినియోగం కాకుండా సంఘాలు
కృషి చేయాలని కోరారు. ఈ సమావేశంలో సంఘం నేతలు తిమ్మసర్తి నాగేశ్వరరావు, ఎం.
శ్రీనివాస్, డి. వెంకటేశ్వరరావు, జగన్నాథం వాకిలయ్య, కె గురవయ్య తదితరులు
ప్రసంగించారు. సమావేశంలో గిరిజనులు ఎదుర్కొంటున్న సమస్యలపై వినతి పత్రం
తయారుచేసి ప్రభుత్వానికి సమర్పించాలని నిర్ణయించారు.
