వస్త్ర వ్యాపారులకు టీడీపీ అండ

కవాడిగూడ:: వ్యాట్‌ను రద్దు చేసేవరకూ వస్త్ర వ్యాపారులకు టీడీపీ అండగా ఉంటుందని నగర అధ్యక్షుడు తలసాని శ్రీనివాస్‌యాదవ్, మాజీ మంత్రి సోమిరెడ్డి చంద్రమోహన్‌రెడ్డి హామీ ఇచ్చారు. అసెంబ్లీ ముట్టడికి పిలుపునిస్తే టీడీపీ మద్దతు ఇస్తుందని అన్నారు. వ్యాట్‌ను వెంటనే రద్దు చేయాలని డిమాండ్ చేస్తూ ఆంధ్రప్రదేశ్ ఫెడరేషన్ ఆఫ్ టెక్స్‌టైల్ అసోసియేషన్ ఆధ్వర్యంలో ఇందిరాపార్క్ వద్ద చేపట్టిన రిలే నిరాహార దీక్షలు బుధవారానికి ఐదో రోజుకు చేరాయి. చంద్రమోహన్‌రెడ్డి, తలసాని, టీడీపీ నగర ప్రధాన కార్యదర్శి ఎమ్మెన్ శ్రీనివాస్‌రావు, సింగిరెడ్డి శ్రీనివాస్‌రెడ్డిలు దీక్షలో పాల్గొని మద్దతు ప్రకటించారు. కాంగ్రెస్ పార్టీ అధికారంలో ఉన్న అన్ని రాష్ట్రాలలో వస్త్రాలపై వ్యాట్ వి«ధించడం లేదని, మన రాష్ట్రంలో ఎందుకు విధిస్తున్నారని ఆయన ప్రశ్నించారు. మీ సమస్యలను అసెంబ్లీలో చర్చించి పరిష్కారానికి కృషి చేస్తామని హామీ ఇచ్చారు.