పెరుగుతున్న కాలునొప్పి

పాదయాత్ర 17వ రోజుకు చేరింది. చంద్రబాబుకు కాళ్ల నొప్పులు కూడా రోజురోజుకు పెరుగుతున్నాయి. రెండు రోజులుగా నడిచేటప్పుడు ఆయన కుడి కాలు నొప్పితో బాధ పడుతున్నారు. గురువారం నొప్పి ఇంకా పెరుగుతున్నట్లు అనిపించడంతో తారు రోడ్డుపై కాకుండా రోడ్డు అంచున ఉన్న మట్టిపై నడవడం మొదలుపెట్టారు. నిర్ణీత వేళలకు మించి పాదయాత్ర జరుగుతుండడం, విశ్రాంతి తక్కువ కావడం కూడా బాబుకు ఇబ్బందికరంగా మారింది. బుధవారం రాత్రి ఆయన నిద్రించేసరికి 12 దాటింది.

గురువారం ఉదయం 10 గంటలకల్లా బయటకు వచ్చి రోజువారీ కార్యక్రమాన్ని మొదలుపెట్టారు. ఈలోపే తాను రోజూ క్రమం తప్పకుండా చేసే యోగా, ట్రెడ్‌మిల్, కాళ్లకు సంబంధించిన వ్యాయామాలు, కాలకృత్యాలు పూర్తి చేసుకున్నారు. ఇవన్నీ ఉదయమే జరగాల్సి రావడంతో ఆయన నిద్రపోయే సమయం తగ్గిపోతోందని, దీనివల్ల కూడా అలసట పెరుగుతోందని పార్టీ నాయకులు చెబుతున్నారు. ప్రస్తుతం ఆయన పాదయాత్ర రోజూ సరాసరిన 20 కిలోమీటర్ల వరకూ ఉంటోంది. దానిని కనీసం 15 కిలోమీటర్లకు తగ్గించాలంటూ పార్టీ నాయకులు ఒత్తిడి తెస్తున్నా చంద్రబాబు అంగీకరించలేదు.