December 6, 2012
బాసరకు ఇవేం బాధలు!
అవినీతి విషయంలో వాళ్ల అవగాహన ముచ్చటేసింది. అవినీతికి తామూ బాధితులమేనంటూ వారు సొంత అనుభవాలను చెప్పుకొచ్చారు. " లంచం ఇవ్వడం తప్పని తెలిసినా తప్పడం లేదు సార్. చిన్న సర్టిఫికెట్ కావాలన్నా డబ్బు పెట్టాల్సి వస్తోంది. ఎమ్మార్వో నుంచి పంచాయతీ సర్పంచ్ దాకా.. లంచాలు ఆశించేవారే సార్. చాలాసార్లు ఎదురు తిరిగినా, గట్టిగా వాదించినా కొన్నిసార్లు మాకూ తప్పడం లేదు'' అంటూ ఓ విద్యార్థిని తల దించేసుకోవడం చూసినప్పుడు, లక్షల కోట్లు తిన్న బడాబాబులు, చోటాబాబులు తల ఎగరేసి తిరగడం, జైళ్ల దగ్గర, కోర్టుల దగ్గర చేతులు ఊపుతూ సిగ్గులేకుండా నవ్వులు చిందించడం గుర్తుకొచ్చింది.
వాళ్ల మాటలు విన్నప్పుడు అవినీతిపై పోరాటానికి అర్థమంతమైన ముగింపు ఇవ్వడం సాధ్యమేనన్న నమ్మకం నాకు కలిగింది. బాసరలో అడుగుపెట్టినప్పటి నుంచీ కనిపించిన దృశ్యాలే ఈ అత్యాధునిక సాంకేతిక విద్యా సంస్థలోనూ కనిపించడం విస్మయపరిచింది. ఐటీ ప్రాంగణంలో కొన్ని నీళ్ల ట్యాంకర్లు కనిపించాయి. వాటి గురించి ఆరా తీయగా, పంపులు, కుళాయిలు, పైపులైన్లు సరిగ్గా లేవని తెలిసింది. గోదావరి ఒడ్డున ఉన్నా విద్యార్థులకు ఇదేమి దుస్థితి!
