December 11, 2012
ఆడపడుచులతో ఆత్మీయబంధం!
స్వాతంత్య్రం వచ్చిన తరువాతే ఏ ప్రభుత్వం చేయనంత మేలు వాళ్ల కోసం ఎన్టీఆర్ చేశారు. ఆడపిల్లకు ఆస్తిలో సగం హక్కును కల్పించడం అప్పట్లో సంచలనమే. మహిళా విశ్వవిద్యాలయం ఏర్పాటు ఆడపడుచులపై ఆయనకున్న ప్రత్యే క అభిమానానికి నిదర్శనం. నేను వచ్చాక కాలేజీల్లో 33 శాతం కేటాయించాను. డ్వాక్రా సంఘాలు పెట్టి ఆత్మవిశ్వాసం పెంచాను. సమాజంలో ఆర్థికంగా, రాజకీయంగా, సామాజికంగా ఎదగడానికి ప్రోత్సహించాను. డ్వాక్రా వేదికగా పేదరిక నిర్మూలన కోసం వెలుగు పథకాన్ని ఇదే జిల్లా ఖానాపూర్‌లో ప్రారంభించాను. ఆ పాటలోని ప్రతి చరణమూ నన్ను అప్పటి జ్ఞాపకాల్లోకి నడించింది. వాళ్లలా గతాన్ని గుర్తుచేసుకుంటున్నారంటే.. వర్తమానంలో వాళ్ల బతుకు నరకప్రాయం కావడమే కారణమనిపిస్తోంది. వీళ్లొచ్చి పథకాల రూపుమార్చి నిలువునా మోసం చేశారు.
గ్యాస్ ధర తగ్గిస్తామని గాలి మాటలు చెప్పారు. పావలా వడ్డీ అని చెప్పి రెండు రూపాయల వడ్డీతో నడ్డి విరిశారు. మైక్రో ఫైనాన్స్ కోరలకు బలిచేశారు. ఆ రోజున వాళ్లలో ఆశలు రేపి వాటికి రెక్కలు తొడిగి గగనవీధుల్లోకి నడిచించిన వాడిగా.. వాళ్ల కష్టంలో భాగమూ నాదే. డ్వాక్రా అప్పుభారం తగ్గించడానికి అందుకే సూత్రప్రాయంగా సిద్ధమయ్యాను. కానీ, ఎలా? ఏమి చేస్తే వాళ్ల జీవితాల్లో పునర్వైభవం చూడగలను?..ఈ ఆలోచనలతోనే చిట్యాల గ్రామం దాటొచ్చాను.
