వే లాది మంది ఆయనకు నీరాజనాలు పలికారు. పూల వర్షం కురిపించారు. తమ కష్టాలను చెప్పుకున్నారు. అందుకు తగ్గట్టుగానే చంద్రబాబు కూడా అన్ని వర్గాలనూ కలుపుకొని పోతూనే 'అధికారంలోకి వస్తే అందరికీ న్యాయం చేస్తా. పేదరికం లేని సమాజమే లక్ష్యం' అంటూ భరోసా ఇచ్చారు. 'నా తొమ్మిదేళ్ల పాలనలో తప్పులుంటే చెప్పండి. సరిదిద్దుకుంటాను' అంటూ ప్రజలతో మమేకమయ్యారు. బీసీ, ఎస్సీ, ఎస్టీ, మైనార్టీలతోపాటు, రైతులు, చేతి వృత్తిదారులు, మధ్య తరగతి వర్గాలను దగ్గర చేర్చుకునే ప్రయత్నంలో భాగంగా చంద్రబాబు అనేక హామీలు ఇవ్వడం ఆ పార్టీ శ్రేణుల్లో మరింత ఉత్సాహాన్ని రేకెత్తిస్తోంది.

కాళ్లు బొబ్బలెక్కినా.. కళ్లు మంట పుడుతున్నా.. మధ్యలో కొంత అస్వస్థతకు గురైనా.. సూరీడు భగభగమండుతున్నా.. నడుము కండరాలు పట్టేసినా ఏమాత్రం లెక్క చేయకుండా.. వైద్యుల సలహాలు తీసుకుంటూ 63 ఏళ్ల వయసులో కూడా అలుపెరుగకుండా చంద్రబాబు పాదయాత్ర సాగించారు. పొలాల వెంబడి, రాళ్లు రప్పలు, గుంటలు దాటుకుంటూ జనం వద్దకు చేరుకుని వారి సమస్యలు ఆలకించి తానున్నానంటూ భరోసా ఇచ్చారు.

పాదయాత్రలో భాగం గా, ఎస్సీ వర్గీకరణకు కృషి చేస్తానని, వాల్మీకులు, వడ్డెర్లు, సంచార జాతులను ఎస్టీ జాబితాలోకి, రజకులను ఎస్సీ జాబితాలోకి చేరుస్తామని, లక్ష రూపాయలతో పక్కా ఇళ్లు నిర్మిస్తామని, వృద్ధాప్య, వితంతు పింఛన్లు రూ.500లకు పెంచడమే కాకుండా, వికలాంగులకు రూ.వెయ్యి నుంచి రూ.1500 వరకు పెంచే దిశగా చర్యలు చేపడతామని చంద్రబాబు హామీ ఇచ్చారు. విద్యార్థులకు ఫీజు రీయింబర్స్‌మెంట్ కొనసాగిస్తామని స్పష్టం చేశారు. తాము అధికారంలోకి వస్తే ఒక్కో కుటుంబానికి ఏడాదికి పది గ్యాస్ సిలిండర్లు ఇస్తామని, రైతులను రుణ విముక్తులను చేస్తామని, అగ్రవర్ణ పేదలకు ప్రత్యేక విధానాన్ని తీసుకొస్తామని, చేనేతలకు బడ్జెట్లో వెయ్యి కోట్లు కేటాయిస్తామని భరోసా ఇచ్చారు.

పాదయాత్రలో జనంతో మమేకం కావడం, నేరుగా వచ్చి సమస్యలు చెప్పుకునే వీలు కల్పించడం, వ్యక్తిగతంగా సమస్యలు విన్నవించుకున్న పలువురికి ఆర్థిక సాయం అందించడం చంద్రబాబును ప్రజలకు దగ్గర చేశాయి. జిల్లాలో 33 మందికి ఆయన రూ.2.17 లక్షల ఆర్థిక సాయం అందించారు. అనంతపురం సరిహద్దులో ఉన్న కర్ణాటక రాష్ట్రంలో జరిగిన పాదయాత్రలోనూ చంద్రబాబుకు ఘన స్వాగతం లభించడం ఒక విశేషం అయితే.. కన్నడిగులు చంద్రబాబుకు రూ.1,00,116 విరాళంగా అందించడం మరో విశేషం.