విశాఖరూపురేఖలు మారుస్తా

విశాఖపట్నం: అధికారం చేపట్టగానే విశాఖ జిల్లా రూపురేఖలు మారుస్తామని తెలుగుదేశం పార్టీ అధినేత చంద్రబాబునాయుడు అన్నారు. గురువారం సబ్బవరం కూడలిలో జరిగిన బహిరంగ సభలో ఆయన మాట్లాడుతూ, విశాఖను పరిశ్రమల కేంద్రంగా మారుస్తానని చెప్పారు. వైఎస్ రాజశేఖరరెడ్డి విశాఖ ప్రజలను మోసం చేశారన్నారు. అనకాపల్లి నుంచి ఆనందపురం వరకు నాలుగు లైన్ల రహదారిని నిర్మిస్తామని, రూ.7.800 కోట్లతో ఉత్తరాంధ్ర సుజల స్రవంతిని ఏర్పాటు చేస్తామని చెప్పి ఏమీ చేయలేకపోయారన్నారు. తాము అధికారంలోకి వస్తే ఆయా ప్రాజెక్టులను తక్షణమే పూర్తిచేస్తామన్నారు. సింహాచలం దేవస్థానం భూ సమస్య పరిష్కారానికి తమ ప్రభుత్వం 578 జీఓను విడుదల చేస్తే, దాన్ని రద్దుచేసిన కాంగ్రెస్ ప్రభుత్వం ఇక్కడ ప్రజలను మోసం చేసిందన్నారు.