వైసీపీ అధినేత జగన్ ముందు చిత్రగుప్తుడు కూడా పనికి రాడని చంద్రబాబు విమర్శించారు. "వైఎస్ అధికారంలో ఉన్నప్పుడు బెంగళూరులో ఉండే జగన్ ఇంత పెద్ద అవినీతికి పాల్పడ్డారు. 53 సెజ్‌లకు 8 వేల ఎకరాల భూములను అప్పనంగా ఇచ్చి కోట్ల రూపాయలను విదేశాలకు తరలించారు. తప్పుడు, గొలుసు కంపెనీల పేరిట అక్కడి నుంచి డబ్బులు తెచ్చిన జగన్ పెద్ద వ్యాపారిలా ఫోజు పెట్టారు. ఇలా లెక్కల తయారీలో చిత్రగుప్తుడిని మించిపోయారు'' అని మండిపడ్డారు.

అవినీతి డబ్బులతో పత్రిక పెట్టి మూడు పేజీలు వాళ్ల గురించి రాసుకుని, రెండు పేజీలు తమకు వ్యతిరేకంగా రాస్తున్నారని దుయ్యబట్టారు. ఇలాంటి వ్యక్తి రాజకీయాల్లో ఉంటే మన ఇంటి పైకప్పులను కూడా లాక్కెళ్తారన్నారు. తీవ్రవాదులు, నక్సలైట్లకన్నా అవినీతే ప్రమాదమని చంద్రబాబు చెప్పారు. అవినీతికి వ్యతిరేకంగా కలిసికట్టుగా పోరాడాల్సిన అవసరం ఉందని, ఇందుకు మీరందరూ సహకరించాలని కోరారు.

మాఫీ చేసి చూపిస్తాం
రైతు రుణాలపై చంద్రబాబు
తొలి సంతకం దానిపైనే
అప్పట్లో వైఎస్ వ్యతిరేకించారు
మా పోరాటంతోనే దేశవ్యాప్తంగా అమలు
సాధ్యాసాధ్యాలు మాకు తెలుసు
అన్నీ ఆలోచించాకే హామీలు
తెలంగాణ అమరుల కుటుంబాలకు న్యాయం చేస్తా
ఈ రాష్ట్ర ప్రజలకు చంద్రుడే దిక్కు
రాత్రి పూట వెన్నెల వెలుగే శరణ్యం

ఇప్పటి వరకు సుమారు 800 కిలోమీటర్ల పాదయాత్ర చేసిన తాను కాళ్లు నొప్పులు.. పాదాలకు బొబ్బలతో ఇబ్బందులు పడుతున్నానని చంద్రబాబు తెలిపారు. నడిచి నడిచి కాలు, ఒక వేలు నొప్పి ఎక్కువగా ఉందన్నారు. ప్రతిరోజూ సాయంత్రానికి కుంటుకుంటు నడుస్తున్న రాత్రి నిద్రకుపక్రమించే సమయంలో పాదయాత్రపై పట్టుదల మరింత పెరుగుతోందని చెప్పారు.

తాను ఇప్పటి వరకూ నడిచిన 51 రోజులలో చరిత్రలో ఎన్నడూ లేని విధంగా ప్రజలు కష్టాలు పడుతున్న విషయం తన దృష్టికి వచ్చిందని, వాటి ముందు తాను పడుతున్న ఇబ్బంది పెద్దదేం కాదని చంద్రబాబు అన్నారు. డిప్యూటీ సీఎం దామోదర రాజనర్సింహ తమను ఇబ్బంది పెడుతున్నారంటూ అందోల్ నియోజకవర్గం మునిపల్లి మండలం బుధేర చౌరస్తాలో పలువురు ఆయన దృష్టికి తీసుకవచ్చారు. ఇందుకు స్పందించిన చంద్రబాబు తమ పార్టీ కార్యకర్తల జోలికి వస్తే తీవ్ర పరిణామాలు ఎదుర్కోవల్సి వస్తుందని హెచ్చరించారు.

రూపాయి బియ్యమిచ్చి రూ.60 లాక్కుంటున్నారు.. ఆరూర్ సభలో రైతులు చంద్రబాబు మధ్య ఆసక్తికర సంభాషణ జరిగింది. 'రూపాయికి కిలో బియ్యం కావాలని మేం అడగనే లేదు. అయినా కాంగ్రెస్ వాళ్లు ఇస్తున్నారు. అయితే ఇలా బియ్యం ఇచ్చి మిగతా సరకుల పేరిట రూ.60లు లాక్కుంటున్నారు. ఈ ప్రభుత్వం వ్యాపారిలా వ్యవహరిస్తోంది' అని కోనాపూర్‌కు చెందిన రైతు ఎండి అక్బర్ ఆరూర్ సభలో చంద్రబాబు దృష్టికి తెచ్చారు.

ఉపాధి హామీ పథకం డబ్బులను కాంగ్రెస్ నాయకులు స్వాహా చేస్తున్నారని, ఇది దొంగ ప్రభుత్వమని వ్యాఖ్యానించారు. రాష్ట్రాన్ని భ్రష్టు పట్టిస్తున్న కాంగ్రెస్‌కు ఓటేయరాదని అక్బర్ అనడంతో చంద్రబాబులో ఉత్సాహం రెట్టింపయింది. దీని తర్వాత చంద్రబాబు మాట్లాడుతూ కాంగ్రెస్ పాలనలో రాత్రి విద్యుత్ వల్ల రాష్ట్రంలో నాలుగు వేల మంది చనిపోయారని చంద్రబాబు తెలిపారు.

సంగారెడ్డి, నవంబర్ 21: 'ఎక్కడ పరిశ్రమలు పెట్టారో.. అక్కడి వారికే ఉద్యోగాలివ్వండి'.. టీడీపీ అధినేత చంద్రబాబు తాజా నినాదమిది. పరిశ్రమలలో స్థానికులకే ఉద్యోగాలు కల్పించేలా చర్యలు తీసుకోవాలంటూ పోరాటానికి సిద్ధమవుతామని ఆయన ప్రకటించారు. మెదక్ జిల్లా సదాశివపేట ప్రాంతంలో జిన్నింగ్, టెక్స్‌టైల్ పరిశ్రమలు ఎక్కువగా ఉన్నాయని, అయితే వాటిలో ఇతర ప్రాంతాల వారికే ఉద్యోగాలు ఇచ్చారని అన్నారు.

'వస్తున్నా మీకోసం' పాదయాత్ర జిల్లాలో నాలుగో రోజు కొనసాగింది. బుధవారం సదాశివపేట సమీపంలోని మద్దికుంట చౌరస్తా నుంచి మునిపల్లి మండలం పెద్దచల్మెడ వరకు 18.6 కిలోమీటర్లు పాదయాత్ర నిర్వహించారు. కాంగ్రెస్ ప్రభుత్వం రాష్ట్రంలో ధరల సలహా మండలి లేకుండా చేసిందని ఈ సందర్భంగా విమర్శించారు. టీడీపీ అధికారంలోకి రాగానే ధరల సలహా మండలిని ఏర్పరుస్తామని హామీనిచ్చారు.

డీఏపీ బస్తా ఒక్కటి రూ.1,300 కు అమ్ముతున్నారని, అదీ పోలీస్ స్టేషన్‌లో పెట్టి నాలుగు లాఠీ దెబ్బలు తిన్నాకే రైతులకు అందుతోందని మండిపడ్డారు. విత్తనాలు కూడా పోలీస్‌స్టేషన్‌లోనే అమ్మే దుస్థితి దాపురించిందని అన్నారు. తాము అధికారంలోకి రాగానే తిరిగి వ్యవసాయాన్ని లాభసాటిగా మారుస్తామని ఎరువుల ధరలు తగ్గిస్తామని చెప్పారు. అలాగే తొమ్మిది గంటలు నాణ్యమైన విద్యుత్‌ను ఉచితంగా సరఫరా చేస్తామన్నారు. కాంగ్రెస్ హయాంలో ప్రజలందరి బతుకులు చితికిపోయాయన్నారు. నాయకులు బలిసిపోయాయన్నారు.

ప్రజల బాధలు చూస్తే కోపం వస్తొందని, అయితే సంస్కారం అడ్డు వస్తొందన్నారు. హైదరాబాద్‌ను మళ్లీ పునర్నిర్మించాల్సిన అవసరం ఏర్పడిందని చంద్రబాబు వ్యాఖ్యానించారు. మల్కాజిగిరి కార్పొరేటర్ సుమలతారెడ్డి ఆధ్వర్యంలో పలువురు ఆరూర్ శివారులోకి వచ్చి ఆయనను కలిశారు. ఈ సందర్భంగా చంద్రబాబు మాట్లాడుతూ, టీడీపీ హయంలో హైదరాబాద్‌ను అభివృద్ధి చేసి, ప్రపంచ పటంలో చోటు కల్పించామన్నారు. అలాంటి హైదరాబాద్‌లో ఇప్పుడు అన్నీ అవస్థలేనన్నారు. వీటన్నిటికి కారణమైన తల్లి కాంగ్రెస్, పిల్ల కాంగ్రెస్, టీఆర్ఎస్‌లను తరిమికొట్టాలని బాబు పిలుపు ఇచ్చారు.

బాబు వచ్చినా గేటు తీయని ఎంఆర్ఎఫ్
సదాశివపేట సమీపంలోని ఎంఆర్ఎఫ్‌కు బాబు వార్నింగ్ ఇచ్చారు. పాదయాత్రగా వెళ్తున్న బాబును ఎంఆర్ఎఫ్ వద్ద కార్మికులు 'అన్నా రండి' అంటూ పిలిచారు. మీరే రోడ్డుపైకి రావాలంటూ పార్టీ నాయకులు కోరడంతో.. గేటు తీయడం లేదని వారు తెలిపారు. దాంతో బాబు ఎంఆర్ఎఫ్ గేట్ వద్దకు వచ్చారు. అయినా సెక్యూరిటీ సిబ్బంది గేటు తీయలేదు. గేటు బయట నుంచే బాబు ఎందుకు తీయడం లేదని కార్మికులను అడిగారు. డ్యూటీ సమయంలో గేటు తీయరని కార్మికులు చెప్పడంతో ఇదేమన్నా జైలా అని ప్రశ్నించారు. అధికారంలోకి వచ్చాక ఎంఆర్ఎఫ్ సంగతి చూస్తానని హెచ్చరించారు.