'చిరంజీవి, కావూరి, లగడపాటి తదితర సీమాంధ్ర కాంగ్రెస్ నాయకులందరూ చేతకాని దద్దమ్మలు. ఢిల్లీలో, హైదరాబాద్‌లో ఏసీ గదుల్లో కూర్చుని మాట్లాడుతున్నారు. ఉద్యమం ఎగసిపడుతున్నా సోనియా భజనే చేస్తున్నారు.' అని కృష్ణాజిల్లా టీడీపీ అధ్యక్షుడు, మైలవరం శాసన సభ్యుడు దేవినేని ఉమామహేశ్వరరావు కాంగ్రెస్ నాయకులపై మండిపడ్డారు. 47 రోజులుగా సీమాంధ్రలో పెద్ద ఎత్తున ప్రజలు ఉద్యమిస్తున్నారన్నారు.

తెలంగాణ రాష్ట్ర ఏర్పాటుపై కేంద్ర ప్రభుత్వానికి ఇచ్చిన లేఖను వాపస్ తీసుకునేది లేదని, కొన్ని పార్టీలు కావాలనే తప్పుడు ప్రచారం చేస్తున్నాయని, పార్లమెంట్‌లో బిల్లు పెట్టే వరకు పోరాటం చేస్తామని తెలంగాణ టీడీపీ ఫోరం కన్వీనర్ ఎర్రబెల్లి దయాకర్ రావు అన్నారు. ఆదివారం ఆయన కరీంనగర్‌లో విలేకరుల సమావేశంలో మాట్లాడుతూ తెలంగాణకు అనుకూలంగా ఇచ్చిన లేఖకు పార్టీ కట్టుబడి ఉందన్నారు. తెలంగాణలో హైదరాబాద్ అంతర్భాగమని పది జిల్లాలతో కూడిన తెలంగాణను టీడీపీ కోరుకుంటుందన్నారు.

తెలుగుదేశం అధినేత చంద్రబాబు నాయుడు ఒక నాయకుడిగా రెండు ప్రాంతాలలో పార్టీని రక్షించుకునే విదంగా ముందుకు వెళుతున్నారని టిడిపి ఎమ్.పి డాక్టర్ ఎన్.శివప్రసాద్ వ్యాఖ్యానించారు. రాష్ట్ర విభజన అనివార్యమని కొందరు బిజెపి,కాంగ్రెస్ నేతలు చెబుతున్నారని, నిజంగానే విభజన అనివార్యమైతే రెండు ప్రాంతాల ప్రయోజనాలను కాపాడడానికి చంద్రబాబు నాయుడు ప్రయత్నిస్తున్నారని అన్నారు. అందుకే ఇరు ప్రాంతాలకు సమన్యాయం చేయాలని కోరుతున్నారని చంద్రబాబు వైఖరిని శివప్రసాద్ సమర్ధించారు.అయితే తాను సమైక్యవాదినని మాత్రం ఆయన స్పష్టం చేశారు.తమ పార్టీ ఏకపక్షంగా విబజన కోరినట్లు దుష్ప్రచారం చేస్తున్నారని,కాని తమ పార్టీ సమన్యాయం కోరుతోందని,పార్టీ తీర్మానం చూస్తే అర్దం అవుతుందని ఆయన అన్నారు.