February 4, 2013
కార్పొరేషన్‌ను దోచేశారు
విజయవాడ
కార్పొరేషన్‌ను కాంగ్రెస్ దొంగలు దోచుకున్నారని, సిబ్బందికి నెలవారీ
జీతాలు సక్రమంగా ఇవ్వలేని దుస్థితికి తీసుకొచ్చారని తెలుగుదేశం పార్టీ
అధినేత నారా చంద్రబాబునాయుడు తీవ్ర ఆరోపణలు చేశారు. ఆదివారం సాయంత్రం
విజయవాడ నగరంలోని డాబాకొట్ల సెంటర్ వద్ద ఏర్పాటు చేసిన బహిరంగ సభలో
కార్పొరేషన్‌లో కాంగ్రెస్ నాయకుల పరిపాలనా తీరును ఎండగట్టారు. నగరానికి
కనీసం డంపింగ్ యార్డుల్లేని స్థితికి తీసుకొచ్చారని, ఈ విషయంలో నాయకులకు
సిగ్గులేదా అని ప్రశ్నించారు. హడ్కో ఇళ్లు పూర్తిగా శిథిలావస్థకు
చేరుకున్నాయన్నారు. నగరంలో 1.50 లక్షల మంది ఇళ్లు లేని నిరుపేదలున్నట్లు
గుర్తించినా వారికి ఈనాటి ఇళ్ల స్థలాలు ఇవ్వలేదని ఆరోపించారు. బుడమేరు
ముంపు నుంచి నగరాన్ని కాపాడేందుకు రూ.40 కోట్లు అవసరమని, ఆ సొమ్మును మంజూరు
చేయని ప్రభుత్వం తక్షణం నగర వాసులకు క్షమాపణ చెప్పాలని డిమాండ్ చేశారు.స్థానిక దుర్గా కో-ఆపరేటివ్ బ్యాంక్ ఖాతాదారుల నుంచి అధిక వడ్డీలను వసూలు చేస్తోందన్నారు. రూ.50 వేల రుణం తీసుకుంటే లబ్ధిదారుడు రూ.2 లక్షల వరకు వడ్డీ రూపంలో చెల్లించాల్సి వస్తోందని చంద్రబాబు ఆవేదన వ్యక్తం చేశారు. దుర్గగుడి వద్ద ఫ్లై ఓవర్ నిర్మాణాన్ని అడ్డుకుంటున్న అధికార పార్టీ ప్రజా ప్రతినిధులకు సిగ్గు లేదా అని ప్రశ్నించారు. ఔటర్ రింగ్ రోడ్ ఎలైన్‌మెంట్‌ను మార్పు చేశారని దుయ్యబట్టారు. ప్రజల ఆస్తులను కాపాడాల్సిన నాయకులు వారి ఆస్తులను దోచుకుంటున్నారని చంద్రబాబు ఎద్దేవా చేశారు. తాము అధికారంలోకి వచ్చిన వెంటనే వృద్ధులు, వితంతువులకు రూ.600ల చొప్పున పింఛన్ ఇస్తామన్నారు.
సీల్డ్ కవర్ల సీఎం కిరణ్ ఢిల్లీలో పైరవీలు చేసుకోవడంతోనే సమయాన్నంత వెచ్చించిస్తున్నారన్నారని ఎద్దేవా చేశారు.నకిలీ బదిలీ పథకం కాంగ్రెస్ పార్టీ ప్రవేశపెట్టిన నగదు బదిలీ పథకం నకిలీదని చంద్రబాబు వ్యగంస్త్రాలు సంధించారు. ఈ పథకం ద్వారా ప్రజల్లో ఆర్థిక అసమానతలు తొలగించాల్సిందిపోయి వాటిని పెంచుతున్నాయన్నారు. ఈ పథకం ద్వారా తక్కువ ధరకు నిత్యావసరాలను అందించాల్సిపోయి ప్రజలను మార్కెట్‌లకు వెళ్లి అధిక ధరలకు నిత్యావసరాలను కొనుగోలు చేసుకునేలా చేస్తోందన్నారు.
కాంగ్రెస్‌వారికే 'గృహకల్ప' రాజీవ్ గృహకల్ప పేరిట కాంగ్రెస్ ప్రభుత్వం నిర్మిస్తున్న ఇళ్లు పూర్తిగా నాసిరకంగా ఉంటున్నాయన్నారు. నిజమైనా పేదలు స్థానే కాంగ్రెస్ పార్టీ నాయకులు ఈ ఇళ్లల్లో తిష్ఠవేస్తున్నారని దీంతో ఇది కాంగ్రెస్ గృహకల్పగా మారిందన్నారు. ఇప్పటికైనా ఆ పార్టీ నాయకులు తమ పద్ధతులు మార్చుకోవాలని హితవు పలికారు. దీపం ఉండగానే ఇల్లు చక్కబెట్టుకునే విధంగా ఆ పార్టీ నాయకులు వ్యవహారిస్తున్నారని మండిపడ్డారు.
.jpg)
