ముఖ్యమంత్రికి సిగ్గుంటే సమాచార కమిషనర్ల నియామకంపై హైకోర్టు ఇచ్చిన తీర్పుకు నైతిక బాధ్యత వహించి తన పదవికి రాజీనామా చేయాలని తెలుగుదేశం పార్టీ డిమాండ్ చేసింది. గురువారం ఇక్కడ ఎన్టీఆర్ భవన్‌లో ఆ పార్టీ ప్రధానకార్యదర్శి వర్ల రామయ్య విలేకరులతో మాట్లాడారు. సమాచార హక్కు చట్టం కింద నియమించే కమిషనర్లకు ఉండాల్సిన అర్హతలపై చట్టంలో స్పష్టమైన నిబంధనలు ఉన్నా వాటిని తోసిరాజని తమ పార్టీకి చెందిన క్రియాశీల రాజకీయ నాయకులను ఈ పదవిలో నియమించాలని ముఖ్యమంత్రి చూడటం దారుణమని, అందుకే కోర్టు ఆయనకు చెంపపెట్టు వంటి తీర్పు ఇచ్చిందని వర్ల వ్యాఖ్యానించారు.